Jeremías 3 - Biblia en Guaraní - ?anderuete ?e’? Por? 2015

Ñanderuete ohayhu jevýnepa umi opoívape ichugui

1Oje’e ningo: Oime ramo opoíva hembirekógui, ha upéi kóva oho ramo ha oiko ambue kuimba’e ndive, upe kuña upéva ohokuaa jevýnepa iména tenondegua rendápe; ndaiky’apái piko ko yvy kóva pene rembiapo vai rupi. Ha nde katu, reiko kuña reko vaícha heta (jára gua’u) ndive; ha upéicha ramojepe rejuse jevy che rendápe, he’i pende Ruete.

2Ejesaupi umi desiérto rehe, ha ema’ẽ porãke, opa rupiete reñemongy’apa. Umi tape yke rehe reha’ãrõ ñemiháme, umi Arabiaygua ojapo háicha desiértope, rejeity hag̃ua umi ohasáva guive ári ha ne rembiapo vai rupi reju remongy’a rehóvo ko yvy kóvape.

3Ajoko ramojepe pe ama tenondegua ha ipaha pegua, nde nereñembyasýi ku kuña reko vaícha.

4Ha péina ko’ág̃a, nde cherenói erévo, che Ruete, che mitã ára guive Nde chesãmbyhyva’ekue.

5Ipochýnepa Ha’e opaite árape. Naneñeko’õi jeramo’ãvéi piko. Péicha nde ere ha rejapo opaichagua ñaña reko ojejapokuaáva guive.

Ñanderuete he’i jevy jey Israel ha Judayguakuérape opoi hag̃ua hembiapo vaígui

6Ñanderuete he’i chéve tetã ruvicha Josías árape: Rehecha piko, mba’éichapa Israel oñemoĩ cherehe. Ha’ekuéra oho mayma cérro yvate ári, ha mayma yvyra ikuarahy’ã porãva guýpe, omomba’eguasu hag̃ua ambue jarakuérape.

7Che katu aimo’ã ojapopa rire hikuái ko’ã mba’evai ou jevytaha che rendápe; Israel katu ndoúi, ha ikypy’y Juda ohechapa ramojepe mba’éichapa itykéra Israel oiko hague noñemoambuéi avei.

8Oñemohembiapo vaígui Che ahavira ichupe, ndojevýi che rendápe ha oñemongy’apa avei itykéraicha.

9Hembiapo ky’a rupi omongy’apa ijyvy, omomba’eguasúgui ambue járape, ojejapomava’ekue ita ha yvyrágui.

10Ha opaite ko’ã mba’e rupi jepe, ikypy’y ndojevýi ipy’aite guive che rendápe, ojevy gua’únte, he’i pende Ruete.

11Ha he’i chéve Ñanderuete: Amo ipahápe Juda oñemongy’ave Israélgui.

12Tereho ha emyasãi ko ñe’ẽ kóva yvate (nórte) gotýo, ha ere: Nde Israel epoína nde reko ky’águi ha ejevy che rendápe, he’i pende Ruete; che pochykue ndo’amo’ãi ndeári, Che ningo chepy’a porã, he’i pende Jára, ndachepochymo’ãi opaite ára peve.

13Eñembyasy rejapo vai haguére, reñemoĩvo nde Ruete rehe, umi yvyraguasu guýpe remomba’eguasu ambue jarakuéra ndereikuaáivape ha nerehendúi che ñe’ẽ, he’i nde Ruete, nde Jára.

14Peñembyasýke ha pejevy, peẽ ta’yrakuéra, peñemoĩmba haguére cherehe, he’i pende Ruete, Che voi ningo pene ména; opaite távagui agueraha peteĩme ha opaite ogaguasúgui mokõime, pomoinge hag̃ua Jerusalénpe.

15Ha ame’ẽta peẽme pende rerekuarã chembovy’áva, oñangareko hag̃ua penderehe katupyry ha arandúpe.

16Ha ojehuva’erã umi ára umívape peñemoña ha peñemboheta rire pende yvýpe, he’i pende Ruete, avave naimandu’aveiva’erã: Pe karameg̃ua oĩháme pende Ruete rembiapoukapy rehe, ndouveimava’erã iñakãme, ndohechanga’uveiva’erã ha araka’eve ndojejapomo’ãvéi ambue.

17Umi ára umívape Jerusalénpe oñembohérata: Ñanderuete guapyha renda, ha umi tetã ou joáta Jerusalénpe omomba’eguasu hag̃ua pende Ruetépe; ha ndoikomo’ãvéi hikuái ipy’a hatã ñañáva rapykuéri.

18Umi ára umívape oñemopeteĩ jevýta Juda ha Israel, ha oñondive ou jevýta umi tetã yvatevoguágui pe yvy ame’ẽmava’ekue pende rukuérape imba’etee ramo.

19Che aimo’ãva’ekue peẽ peikóta che ra’y ramo ha upévagui Che ame’ẽ peẽme pe yvy iporãvéva tetãnguéra apytépe. Ha Che aimo’ã peẽ cherenoitaha: Ore Ruete, ha napeñemboykemo’ãira’e araka’eve che rapykuérigui.

20Peẽ katu peiko ku tembireko vaívaicha ombotavýva iménape, péicha peẽ pejapo avei cherehe, nde Israel róga, he’i pende Ruete.

21Oñehendu umi desiérto rehe Israel ñemoñarenguéra rasẽ omba’ejerure asýva jeporiahuvereko opia haguére hape porãgui; ha hesaráigui Ijarateégui.

22Pejevy peẽ peñemoĩva pende Ruete rehe ha Che pomongueráta pende reko pu’ãségui. Péina ápe ore rojuroína ne rendápe, Nde ha’eguihína ore Ruete, ore Jaratee.

23Añetehápe roho rei romomba’eguasu hag̃ua ambue járape umi cérrore ha ore rosapukái reipa upérupi; ñande Ruetéguinte ou pe pytyvõ añeteguáva Israélpe g̃uarã.

24Ore rotĩete romomba’eguasu haguére ambue jarakuérape ha upévare rohundipa ore mitãrusu, ore rukuéra rembiapo repy, ore ovecha, kavara ha vaka atykuéra.

25Ore rojeity joa tĩndyhápe ne renondépe ha ñemotĩ taoreñu’ã, roñemoĩ haguére ore Ruete rehe, ore ha ore rukuéra, ore mitã ára guive ko’ag̃aite peve naoreñe’ẽrendúigui ore Ruete, ore Jára ñe’ẽme.