Deuteronómio 9 - Biblia en Guaraní - ?anderuete ?e’? Por? 2015

Ñanderuete ohundipáta Canaan retãnguérape

1Pejapysaka porãke, peẽ Israelguakuéra: Pehasáta ko árape ko Jordan mboypýri peñemomba’e hag̃ua ko’ã tetãnguéra yvýre, ha’ekuéra hetave ha imbareteve pendehegui, itavakuéra ituicha ha itáva tapiakuéra ijyvateiterei.

2Peteĩ tetã tuicha ha ijyvatéva, umi Anac ñemoñare, peikuaa voi ichupekuéra, ha pehendu oje’e ramo: Mávapa ikatúne ipu’aka Anac ñemoñarenguéra rehe.

3Peikuaákena ko’ág̃a, Jahve, Ñanderuete ohasamaha pene renonderãme tata oporombokusugueva’erã ohundi hag̃ua ichupekuéra pene renondépe; Ha’erupi peitýta ha pehundíta sapy’aitépe ichupekuéra, Ñanderuete he’i haguéicha peẽme.

4Ha ani pejétei pende py’apýpe: Jahve, Ñandejára omosẽma ramo ichupekuéra pene renonderãgui, ore roikógui hekoitépe upévare Ha’e oregueru roñemomba’e hag̃ua ijyvy rehe; ko’ã tetãnguéra ningo Ñanderuete omosẽta pene renondégui oñemoangaipágui.

5Ndaha’éi pende reko porã ni pene ñe’ã potĩgui peiketaha Canaánpe peñemomba’e hag̃ua ijyvykuéra rehe, ko’ã tetãnguéra heko vaietéguinte Ñanderuete, Ñandejára renondépe, upévare Ha’e omosẽ ichupekuéra pene renonderãgui, ha omoañete hag̃ua iñe’ẽ, ome’ẽmava’ekue pende rukuéra Abraham, Isaac ha Jacóbope.

Israel heta jevy oñemoĩ Ñanderuetére

6Peikuaa porãke ndaha’eiha pende reko porãgui Ñanderuete, Ñandejára, ome’ẽtaha peẽme ko yvy pene mba’erã ramo, peẽ voi ningo tetã iñe’ẽrendu porã’ỹva.

7Penemandu’áke ha ani penderesaráitei, mbovy jevýpa pembopochy Ñanderuete, Ñandejárape, pe desiértope pesẽ rire Egípto retãgui peg̃uahẽ meve ko tenda kóvape, peẽ voi heta jevy peñemoĩva’ekue Ñanderuete rehe.

8Horeb cérrope pembopochýkuri Ñanderuetépe ha Ha’e ipochyete penendive penehundi hag̃uáicha.

9Che ajupi ramoguare pe cérrope Ñanderuete ome’ẽ hag̃ua chéve umi ita ipéva ñembopy’apeteĩ reheguáva, Ha’e ojapova’ekue peẽme g̃uarã, upéramo aimékuri pe cérrope 40 ára ha 40 pyhare, ha’u’ỹre pan ha hay’u’ỹre.

10Ha Ñanderuete ome’ẽ chéve umi mokõi ita ipéva; ha ipype Ha’e ohai ikuãteépe umi ñe’ẽ Ha’e he’i haguéicha peẽme pe cérrope, tata mbyte guive, pe atyguasuha árape.

11Ha ojehúkuri oñembotývo umi 40 ára ha 40 pyhare, Ñanderuete ome’ẽ chéve umi ita ipéva ñembopy’apeteĩ reheguáva.

12Ha Ñanderuete he’i chéve: Epu’ã ha eguejy pya’e ko’águi, ne retãyguakuéra reguenohẽva’ekue Egíptogui oñemoangaipa jevýma; pya’e oñemboyke pe tape, Che ahechaukava’ekuégui ichupekuéra; ojapo hikuái peteĩ tymba ra’ãnga omomba’eguasu hag̃ua ichupe ijára ramo.

13Ha Ñanderuete oñe’ẽ chéve ha he’i: Ama’ẽ porã Israelguakuéra rehe, ha’ekuéra ningo peteĩ tetã iñe’ẽrendu porã’ỹva rehegua.

14Cherejána tahundi ha tambogue herakuéra ko yvága guýgui, ha upéi Che ajapóta ndehegui peteĩ tetã imbareteve ha hetaitevéva ichuguikuéra.

15Upéramo ajere ha aguejy pe cérrogui, hendyvahína tatápe, umi mokõi ita ipéva reheve che pópe.

16Ha añetehápe peñemoangaipa Ñanderuete, Ñandejára ndive g̃uarã, pejapógui peteĩ tóro ra’yrusu óro mbohykupyrégui; pya’ete peñemboyke pe tapégui Ñanderuete he’iva’ekue peẽme.

17Upéramo amombo che pógui umi mokõi ita ipéva ha ojeka pende resa renondépe.

18Upéi añesũ jevy Ñanderuete renondépe ajapo haguéichama, 40 ára ha 40 pyhare; upejave nda’úi pan ha nday’úi mba’eve, peñemoangaipa haguére Ñanderuete resa renondépe ha pembopochývo ichupe.

19Akyhyjékuri Ñanderuetégui, ipochyetereígui, penehundipa ramoguarã; Ñanderuete katu cherendu jevy.

20Ñanderuete ipochyeterei avei Aaron ndive ohundi hag̃uáicha ichupe; ha añembo’e avei Aaron rehe.

21Upéi ahapy ha amongu’i porã iku’itumi meve pe mba’e penemoangaipáva, pe tóro ra’yrusu pejapova’ekue, ha aity itimbokue ysyrýpe, oguejýva cérrogui.

22Taberápe, Masápe ha Kibrothataavápe pembopochy avei Ñanderuetépe.

23Ha Ñanderuete penemondo ramoguare Cades-barnéagui, ha he’i ramoguare peẽme: Tapeho ha peñemomba’e pe yvy Che ame’ẽva’ekue rehe peẽme; pepu’ãkuri avei Ñanderuete rehe, ha ndapegueroviáikuri ichupe, ha napehendúi avei iñe’ẽ.

24Che poikuaaha ára guive, peẽ peñemoĩ Ñanderuete rehe.

25Ajeity Ñanderuete renondépe 40 ára ha 40 pyhare, Ñanderuete he’ígui penehunditaha.

26Ha añembo’e Ñanderuetépe, ha ha’e ichupe: Che Jára, ore Ruete, ani rehundítei ne retãyguakuérape ha ne mba’eteéva resalvava’ekue milágro ndetuichaite rupi, reguenohẽvo ichupekuéra pyapy mbaretépe Egípto retãgui.

27Nemandu’ána ne rembiguái Abraham, Isaac ha Jacóbo rehe, anína rema’ẽnte ko’ã tetãygua oñemoĩva rehe, hembiapo vai ha hi’angaipáva rehe,

28ani hag̃ua pe tetã Nde orerenohẽ haguégui he’ikuaa: Jahve, Ijára ndaikatúigui omoinge ichupekuéra pe yvy ome’ẽséva ichupekuéra, ha ipochýgui hendivekuéra, oguenohẽnte ichupekuéra ojuka hag̃ua desiértope.

29Ha’ekuéra ningo ne retã ha ne mba’etee, reguenohẽva’ekue nde pu’akaguasuete rupi ha nde jyva jepysopópe.