2 Crónicas 35 - Biblia en Guaraní - ?anderuete ?e’? Por? 2015

Josías omboarete pe páscua

1Josías omboarete pe páscua Ñanderuetépe g̃uarã Jerusalénpe, ha oikuave’ẽ hikuái pe páscua pe ára 14-hápe pe jasy peteĩháme.

2Omoĩ avei pa’ikuérape hembiapópe, ha he’i ichupekuéra ojapo hag̃ua hekoitépe Ñanderuete rogaguasu pegua tembiapo.

3Ha he’i umi Leviguápe ombo’e hag̃ua opaite Israelgua oñemboheko potĩva’ekuépe Ñanderuetépe g̃uarã: Pemoĩ Ñanderuete karameg̃ua pe ógape, David, Israel retã ruvicha ra’y Salomon omopu’ãva’ekue, natekotevẽvéima peguerahapeína pende ati’y ári. Ko’ág̃a peñemoĩ pemba’apo hag̃ua Ñanderuetépe ha hetã Israélpe.

4Peñembosako’i pende rogaguasúpe ha peñemoĩ pemba’apo hag̃ua aty atýpe Ñanderuete rogaguasu rembiapópe, David, Israel retã ruvicha, ohaiuka haguéicha; ha Salomon ita’ýra he’iuka jevy haguéicha ñandéve.

5Peike Ñanderuete rogaguasu rembiapópe, aty atýpe, pemba’apo hag̃ua pene retãyguakuérape g̃uarã.

6Upéi peikuave’ẽ pe páscua; ha peñembohekopotĩ rire, pembosako’i pende ryke’ykuérape ojapo hag̃ua Ñanderuete ñe’ẽ Ha’e he’i haguéicha Moises juru rupi.

7Ha tetã ruvicha Josías ome’ẽ hetãyguakuérape oñembyatýva guive omboarete hag̃ua pe páscua: 30.000 ovecha, ovecha ra’yrusu ha kavara ra’yrusu hymba atýgui, hi’ári ome’ẽ 3.000 tóro ra’yrusu: Ko’ãva ningo tetã ruvicha rymbakuéra apytégui ha’e ome’ẽ hetãyguakuérape.

8Mburuvichakuéra ome’ẽ avei pojerapópe hetãyguakuéra, pa’ikuéra ha Leviguakuérape g̃uarã. Hilcías, Zacarías ha Jehiel, Ñanderuete rogaguasu ruvichakuéra ome’ẽ pa’ikuérape arete páscuape g̃uarã 2.600 ovecha ha kavara, ha 300 tóro ra’yrusu.

9Upéicha avei Conanías, Semaías ha Natanael, ityvyrakuéra; Hasabías, Jeiel ha Josabad, Leviguakuéra ruvicha, ome’ẽ Leviguakuérape páscua kuave’ẽmbyrã ramo, 5.000 ovecha ha kavara, ha 500 tóro ra’yrusu.

10Oñembosako’ipávo péicha pe tembiapo, umi pa’i oñemoĩ hendarãme, ha Leviguakuéra oñemboja’o aty atýpe oñepyrũ hag̃ua hi’araitépe hembiapo pe tetã ruvicha he’i haguéicha ichupekuéra.

11Upérõ oikuave’ẽ hikuái pe páscua; ha umi pa’i ohypýi pe tuguy ojapyhyva’ekue Leviguakuéra pógui, ha Leviguakuéra oipiro umi tymba ojejukava’ekue.

12Upéi omboja’o ikyrakue ojehapýtava pe so’o oje’útavagui, ha oñeme’ẽ tetãygua hogaguasukuérape, oikuave’ẽ hag̃ua Ñanderuetépe g̃uarã, Moises kuatia ñe’ẽme ojehai háicha; ha péicha omboja’o avei hikuái umi tóro ra’yrusu.

13Upéi ohesy hikuái tatápe omboarete hag̃ua pe páscua; ha umi me’ẽmby oñemboykéma Ñanderuetépe g̃uarã oñemomimói japepópe, japepoguasúpe ha táchope, ha pya’e pya’e omboja’o ja’o ome’ẽ hag̃ua opaite hetãyguakuérape.

14Uperire ombosako’i imba’erãnguéra ha pa’ikuérape g̃uarãva; umi pa’i Aaron ñemoñarenguéra omba’apógui pytũ meve oikuave’ẽmba hag̃ua, Leviguakuéra ombosako’i imba’erã ha avei pa’ikuéra mba’erã, Aaron ñemoñarenguéra apytépe g̃uarã.

15Upéicha avei umi opurahéiva oĩmba hendápe, David rembiapoukapy he’i háicha, Asaf ñemoñarégui, Heman ñemoñarégui, Jedutun, pe tetã ruvicha proféta ñemoñarégui, ha avei umi okẽ ñangarekoharakuéra, peteĩteĩva oĩ hokẽme; ha natekotevẽi avave opoi hembiapógui, ipehẽngue Leviguakuéra ombosako’ipágui avei imba’erã.

16Péicha oñembosako’ipa pe ára pévape opaite tembiapo Ñanderuete rogaguasúpe g̃uarã, oñemboarete porã hag̃ua pe páscua, ha oikuave’ẽ hag̃ua kuave’ẽmby ojehapypáva Ñanderuete kuave’ẽmby renda ári, pe tetã ruvicha Josías he’i haguéicha.

17Ha Israel ñemoñarenguéra oĩva guive upépe omboarete pe páscua umi ára umívape, ha pe pan ilevadura’ỹre arete oiko 7 ára pukukue.

18Araka’eve ndojejapói koichagua páscua Israélpe proféta Samuel ára guive, ha avave Israel retã ruvichakuéra apytégui nomboaretéi koichagua páscua, tetã ruvicha Josías ojapo haguéicha, umi pa’i ha Leviguakuéra ndive, ha opaite Israelgua, Judaygua ha Jerusalenguakuéra ndive.

19Ko páscua kóva oñemboarete pe áño 18-hápe tetã ruvicha Josías oisãmbyhy ramoguare.

Josías omano

20Ko’ã mba’e rire Josías omyatyrõmba rire Ñanderuete rogaguasu, Néco, Egípto retã ruvicha, ojupi ojeity hag̃uáicha Carquémis ári, opytáva Éufrates ysyry rembe’ýpe; ha Josías oho ojeity hag̃uáicha hi’ári.

21Ha Néco omondo hendápe hembiguái, he’íva: Mba’éiko che aguereko nendive Juda retã ruvicha. Ko ára kóvape ndajúi ne rendápe, ajúnte ajeity hag̃ua pe tetã ári oñemoĩva cherehe ha Ñanderuete he’i chéve che añembopya’e hag̃ua. Ani nde reñemoĩ Ñanderuete rehe, oĩva chendive, aníntemo Ha’e nehundi.

22Ha Josías katu noñemomombyryséi ichugui, oñemonde ambuénte ojeity hag̃ua hi’ári, nohendúigui Néco ñe’ẽ, osẽva’ekue Ñanderuete jurúgui; ha ou ojeity hi’ári Megído ñúme.

23Ha umi hu’y mombohakuéra ojapi Josíaspe. Upémaramo he’i tetã ruvicha hembiguaikuérape: Cherenohẽ ko’águi, ajejapi vaietereígui.

24Upémaramo hembiguaikuéra oguenohẽ ichupe icárrogui, ha omoĩ ichupe ambue cárro oguerekóvape, ha ogueru ichupe Jerusalénpe, ha upépe omano; ha oñotỹ ichupe hikuái ituvakuéra tyvýpe. Ha mayma Judaygua ha Jerusalengua ombyasy Josíaspe.

25Ha Jeremías ogueropurahéi jahe’opópe Josías réra. Ha mayma opurahéiva, kuimba’e ha kuñakuéra, opurahéi pe ñe’ẽ ñembyasy Josías reheguáva ko ára kóva peve; ha ojepokuaa hikuái pe ñe’ẽ ñembyasy rehe, ha ojeporu oñe’ẽ ñembyasy hag̃ua Israel rehe, ha oime ojehai Jeremías kuatia ñe’ẽme ko jahe’o reheguáva.

26Ambue Josías rembiapokue, ijeporiahuvereko, Ñanderuete rembiapoukapy he’i háicha,

27ha hembiapokue iñepyrũha megua ha ipaha pegua, ojehai Israel ha Juda retã ruvichakuéra rembiapokue kuatiañe’ẽme.