Ésdras 4 - Biblia en Guaraní - ?anderuete ?e’? Por? 2015

Umi Samariaygua ojokose pe tembiapo

1Ohendúvo Juda ha Benjamin rehe ija’e’ỹvakuéra umi ojepokuamava’ekue ouha jevy omopu’ã hag̃ua Israel Jára rogaguasurã,

2oho hikuái Zorobabel ha umi ogaguasu ruvichakuéra rendápe, ha he’i hikuái ichupekuéra: Romopu’ãta avei penendive Ñandejára rogaguasurã, rohekágui peẽicha pende Járape, ha ichupe roikuave’ẽta avei ore kuave’ẽmbynguéra Esarhadon, Asíria retã ruvicha, orembouha ára guive ko’ápe.

3Zorobabel, Jesúa ha ambue ogaguasu ruvichakuéra he’i ichupekuéra: Oréverõ g̃uarã naiporãi romopu’ã penendive ore Jára rogaguasurã, ore añónte romopu’ãse ore Ruete rogaguasurã, he’i haguéicha oréve Círo, Pérsia retã ruvicha.

4Upéramo Samariaygua omongyhyje Juda retãyguakuérape anive hag̃ua omopu’ãve hikuái pe ogaguasu.

5Upéramo ome’ẽ hikuái ñemiháme pirapire umi Pérsia ruvicha’ikuérape ojoko hag̃ua Ñanderuete rogaguasu rembiapo, Círo, Pérsia retã ruvicha, oisãmbyhy aja pukukue ha Darío oñepyrũvo oisãmbyhyha árape.

6Asuéro, pe Pérsia retã ruvicha, oñepyrũvo oisãmbyhy, umi Samariaygua omondo ichupe g̃uarã peteĩ kuatiañe’ẽ oñe’ẽvaíva umi Judaygua ha Jerusalengua rehe.

7Ko’ã Samariaygua: Bislam, Mitrídates, Tabeel ha iñirũnguéra omondo pe kuatiañe’ẽ Aramgua ñe’ẽme Artajérjes rendápe,

8Rehum, Pérsia retã ruvicha rembiguaiguasu, oisãmbyhy aja Judápe, ha Simsai, pe kuatia haihára, ohai hikuái avei peteĩ kuatiañe’ẽ Jerusalen rehe hetã ruvicha Artajérjespe.

9Kóa ningo pe kuatiañe’ẽ Rehum, pe tetã ruvicha rembiguaiguasu, pe kuatia haihára Simsai ha iñirũnguéra, umi mbojovakehára, mburuvichakuéra, soldádo ruvichakuéra, ha umi Persiaygua, Erecgua, Babiloniaygua, Susaygua, ko’ãvahína umi Elamgua,

10ha ambue tetãnguéra, pe tetã ruvichaguasu Asnapar oguerukava’ekue, oiko hag̃ua Samária tavakuérape ha ambue henda rupi pe ysyry Éufratesgui kuarahyreike gotýo,

11opaite ko’ãva ohaiuka ko kuatiañe’ẽ kóva tetã ruvicha Artajérjespe: Ne rembiguaikuéra Éufrates ysyry agotyogua nemomaiteiuka.

12Tetã ruvicha oikuaa hag̃ua, umi Judaygua oñembouva’ekue ore rendápe, oúkuri hikuái Jerusalénpe, ha omopu’ã jevy pe táva tápia, oñemoĩ jevy hag̃ua jepiguáicha ijarakuéra rehe, Jerusalen iñaña voi areiterei guivéma ha ág̃a ha’ekuéra omopu’ã yvatehína itáva tápia ha omyatyrõmba oñekotevẽháme.

13Ha iporã tetã ruvicha oikuaa ko táva kóva oñemopu’ãmba jevy ramo, ha ikorapyjere oñemboyvatepa ramo ha’ekuéra nome’ẽmo’ãvéi hemime’ẽ, ipirapire ni impuestokuéra tetã ruvichápe, ha nde resẽ vaiva’erã avave nome’ẽvéimagui mba’eve tetã ruvichaguasúpe.

14Ha ore roñemongarúva tetã ruvicha rógagui, ore rohecha vaieterei pe tetã ruvichápe ndoje’apói ramo mba’evérõ, upévare romondo ko kuatiañe’ẽ roikuaaukapa hag̃ua tetã ruvichápe umi mba’e ojehumava’ekue guive ko’ápe.

15Ehekauka nde rukuéra kuatiañe’ẽme, ojehaihápe opaite mba’eguasu ojehuva’ekue guive, hi’añetépa térã nahániri ore rohaíva tetã ruvichaguasúpe. Upe kuatiañe’ẽme rejohúta ha reikuaáta ko táva ymaite guive tapia oñemoĩ hague ijára rehe, ha ambue tetãnguéra rehe avei, upévagui ko táva oñembyaipava’ekue.

16Roikuaauka tetã ruvichápe ko táva kóva oñemopu’ãmba jevy ramo, ha ikorapyjere oñemboyvatepa ramo, umi yvy oĩva Éufrates ágotyove, ndaha’emo’ãveimaha ne mba’e.

17Upéi Pérsia retã ruvichaguasu ombohovái ikuatiañe’ẽ ohaívo: Tetã rembiguaiguasu Rehúmpe, kuatiañe’ẽ haihára Simsaípe, ha ambue iñirũnguérape Samária oikóvape, ha ambue mburuvicha umi ysyry Éufrates mboypyriguápe: Tapeneresãi ha tapendepy’aguapy.

18Upe kuatiañe’ẽ peguerukava’ekue oréve oñemoñe’ẽ porãkuri che renondépe.

19Ha che ha’éma ojeheka hag̃ua ha añetehápe ojejohu pe táva ymaiteha ára guive tapia opu’ã hague tetã ruvichakuéra rehe, ha heta jevy oñemopu’ã sarambiguasu tetã ruvicha rehe;

20ha oĩ hague avei Jerusalénpe tetã ruvicha imbaretéva ha oguerekova’ekue ipoguýpe umi yvy Éufrates ysyry mboypýri oĩva guive, ha oñeme’ẽva ichupekuéra impuésto.

21Upévare ha’eukáma Israelguakuérape opoi hag̃ua hembiapógui ha ani omba’apove pe távape, che ha’e jevy peve.

22Ha pema’ẽke ani peheja rei ko’ã mba’e; mba’upéiko jahejáta opu’ã pu’ãve mba’evai tetã ruvichakuéra rehe.

23Ha Rehum, Simsai, pe kuatiañe’ẽ haihára, ha iñirũnguéra renondépe, omoñe’ẽ rire tetã ruvicha Artajérjes kuatiañe’ẽ pya’e pya’e oho hikuái Jerusalénpe, Judayguakuéra rendápe, ha ojoko hikuái hembiapo.

24Ha pe tembiapo ojejapóva Ñanderuete rogaguasu rehe Jerusalénpe opyta rei, pe Persia retã ruvicha pyahu, Darío, oisãmbyhy peve hi’áño mokõiháme.