Salmokuéra 109 - Biblia en Guaraní - ?anderuete ?e’? Por? 2015

David ojerure Ñanderuete pytyvõ rehe

1Romomba’eguasu ndéve ore Ruete, ani rekirirĩ chehegui.

2Umi iñañáva ha ijapúva ojejurupe’a oñe’ẽvai hag̃ua cherehe ijapu rupi.

3Chemongora hikuái ipy’aro opukaha vaípe, reiete chejopy hikuái.

4Che mborayhu ningo omyengovia hembiapo vaikue, che katu añembo’e hesehapekuéra.

5Che mba’eporã omyengovia mba’evai rehe.

6Emoĩ peteĩ iñañáva ombojovake hag̃ua ichupe, ha katuete Satana opytáta ijakatúape ohekombo’e vai hag̃ua ichupe.

7Pe ñembojovakégui osẽta heko vaíva ramo, ha iñembo’e rupi ojehechakuaáta hembiapo ivaiha.

8Toñemombykyve hekove ára ha ambue tojapyhy hembiapo (ombojovake hag̃ua).

9Ita’yrakuéra taityre’ỹmba ha hembireko taimenave’ỹ.

10Ita’yrakuéra toiko reipa ha tomba’ejerure hembi’urã rehe, ha toheka hembi’urã mombyryete hóga taperégui.

11Toñeme’ẽmba ha’e oguerekóva guive, ipirapire porukahárape, ha tetã ambueygua tomonda hembiapo repy.

12Ani avave ipy’a porã hendive ha ani avave oiporiahuvereko umi ityre’ỹvape.

13Iñemoñarenguéra toñehundipa, ha iñemoñare rerakuéra toñemboje’opa.

14Ñanderuete taimandu’a itúva rembiapo vaikue rehe ha isy rembiapo vai toñemboje’o’ỹ,

15toĩ tapiaite uvei Ñanderuete renondépe, ha héra toñekytĩ yvy ape árigui.

16Imandu’a rãngue oporoporiahuvereko hag̃ua, ha’e omuña hapicha ojejopýva ha imboriahúvape, ha ojopyseve ohóvo ichupe ojukaite hag̃uáicha.

17Ha’e ohayhu pe maldicion ha péva voi tohupity ichupe, ha’e ndohovasaséi haguére avavépe, upévare tojei ichugui oimeraẽva jehovasa.

18Pe maldicion ha’e oiporu ijaóicha, ha ýicha oike hi’angapýpe, ha acéiteicha ikanguekuápe.

19Upévagui pe maldicion toñu’ã ichupe ku ijaóicha ha ku iku’a jokua háicha oiku’akuáva ichupe.

20Péicha Ñanderuete tomyengovia umi cherehe oñemoĩva, ha umi che ánga rehe oñe’ẽvaívape.

21Ha Nde, ore Ruete, chepytyvõmíkena nde réra rayhupápe, ha cheguenohẽmína che jejopy vaígui nde réra ha ne mborayhu rehehápe.

22Cheporiahuverekomína, aikotevẽ itereígui nderehe, ha che py’apýpe añeñandu vaietéma.

23Che ahasa ku kuarahy’ã ka’arúicha, pe yvytu chetyvyro ha chemboveve tukúicha.

24Che ndakaruvéigui che renypy’ã ikangypa ha che rete ipiru, opágui ikyrakue (imbaretekue).

25Ha’ekuéra opuka cherehe, ha umi cherecháva oñembohory cherehe ombovavávo iñakã.

26Chepytyvõmína, ore Ruete, che Jára tee chepytyvõmi nde poriahuvereko rupi.

27Ha tohechakuaa hikuái nde po ojapoha ko’ã mba’e.

28 Tomaldeci ha’ekuéra, Nde cherovasáma guive, ha opu’ã joa ramo hikuái cherehe toñemotĩmba hikuái ha tavy’aite che, ne rembiguái.

29Umi cherehe oñe’ẽ vaíva toñemoherakuã vai, toñeñu’ã hikuái ñemotĩme oñemonde háicha peteĩ pónchope.

30Che juru rupi amomba’eguasúta ore Ruetépe, ha heta apytépe amboetéta ichupe.

31Ha’e oñemoĩta imboriahúva ykére, oipytyvõ hag̃ua ichupe, ani hag̃ua umi ohayhu’ỹva ojuka ichupe.