2 Crónicas 33 - Biblia en Guaraní - ?anderuete ?e’? Por? 2015

Manases oiko tetã ruvicha ramo

1Manases oguereko 12 áño oñepyrũ ramoguare oisãmbyhy, ha 55 áño oisãmbyhy Jerusalénpe.

2Ha ojapo ivaíva Ñanderuete resa renondépe, umi mba’evaiete ojapo haguéicha umi tetã Ñanderuete omosẽva’ekue Israel ñemoñare renonderãgui.

3Ha’e omyatyrõmba jevy umi yvy yvate itúva Ezequías oitypava’ekue, ha omopu’ã jevy kuave’ẽmby renda Baalkuérape, ha ojapo Aserápe g̃uarã ta’ãnga, ha omomba’eguasu mbyjaita árare oĩvape, ha oñembo’e ichupekuéra.

4Omopu’ã avei kuave’ẽmby renda ambue járape g̃uarã Ñanderuete rogaguasúpe, Ñanderuete he’iva’ekue rehe: Jerusalénpe oĩva’erã che réra opaite árape.

5Omopu’ã avei heta kuave’ẽmby renda heta mbyja árare oĩvape, Ñanderuete rogaguasu korapy mokõivévape.

6Ha ohapy tata rendýpe ita’yrakuérape, Hinom ra’y cerrokuéra pa’ũme; ha’e oma’ẽ avei arai rehe, oma’ẽ avei oha’ỹvõva rehe ha imba’ekuaáva rehe, ha omba’eporandu omanóva anguépe ha paje apohakuérape; upéicha ojapo opaichagua tembiapo vai Ñanderuete resa renondépe, ombopochy hag̃ua ichupe.

7Ko’ã mba’e ári ojapo avei peteĩ ambue jára ra’ãnga ha omoĩ Ñanderuete rogaguasúpe; umi mba’e rehe he’iva’ekue Ñanderuete Davídpe ha Salomon, ita’ýrape: Ko óga kóva oĩva Jerusalénpe Che aiporavova’ekue opaite Israel tríbu apytégui, amoĩ hag̃ua ipype che réra opaite árape;

8ha araka’eve ndaipe’aveiva’erã Israélgui ko yvy Che ame’ẽva’ekuégui pende rukuérape, pejapo guive opaite ñe’ẽ ha tembiapoukapy Che ha’eva’ekue Moises juru rupi peẽme.

9Manases ogueraha tape vai rehe Juda ha Jerusalenguápe, ojapo hag̃ua mba’e ivaivéva umi tetãgui, Ñanderuete ohundiva’ekue Israel ñemoñarenguéra renonderãgui.

10Ha Ñanderuete oñe’ẽ Manaséspe ha hetãyguakuérape, ha’ekuéra katu noñembyasyséi ni nainẽ’ẽrendúi,

11upévagui Ñanderuete ogueru hi’ári umi Asíria retã ruvicha soldádo atyguasu ruvichakuéra, ha ha’ekuéra omosã cadéna hierroguiguápe Manaséspe, ha oñeñapytĩháme ogueraha ichupe Babilónia retãme.

12Ha oñemoĩma ramo ichupe jepy’apypópe, ha’e oñembo’e Ñanderuete, Ijárape, ha oñemomirĩete ituvakuéra Jára renondépe.

13Ha oñembo’éma ramo ichupe, Ñanderuete ohendu iñembo’e ha ogueru jevy ichupe Jerusalénpe, hetãme. Upémaramo Manases ohechakuaa Ñanderuetenteha yvy ariguakuéra Jára.

14Ko’ã mba’e rire omopu’ã ambue tápia David táva tápia renondépe, Gihóngui kuarahyreike gotýo, pe cérro pa’ũme, Pira rokẽ meve, upéicha omongorapyjere yvate Ofel, ha ombo’yvateve pe táva tápia; ha omoĩ soldádo aty ruvichakuéra umi Juda táva oñemombaretévape.

15Upéicha avei oipe’a umi jára ambue ha umi ta’ãnga Ñanderuete rogaguasúgui, ha mayma kuave’ẽmby renda ha’e omopu’ãva’ekue guive Ñanderuete rogaguasúpe, cerrokuérape ha Jerusalénpe, ha omombopa okápe.

16Upéi omyatyrõ Ñanderuete kuave’ẽmby renda, ha oikuave’ẽ hi’ári kuave’ẽmby py’aguapy ha agradecimiénto reheguáva; ha he’iuka Judayguakuérape ojerovia hag̃ua Ñanderuete, Israel Jára rehe añoiténte.

17Ha hetãyguakuéra oikuave’ẽ gueteri umi yvy yvateha rupi, jepémo ojapo hikuái Ñanderuetépe g̃uarã.

18Ambue Manases rembiapokue, ha iñembo’e Ñanderuetépe g̃uarã, ha umi proféta ñe’ẽngue oñe’ẽva’ekue Ñanderuete, Israel Jára rérape, ojehaipa Israel retã ruvichakuéra rembiapokue kuatiañe’ẽme.

19Iñembo’e ha mba’éichapa Ñanderuete ohendúra’e ichupe, ha mayma hi’angaipakuéra, ha mba’éichapa nomomba’éi Ñanderuetépe, ha mamoitépa omopu’ãra’e umi yvy yvate ha Asera ra’ãngakuéra oñemomirĩ mboyve, ko’ã mba’e ojehaipa profetakuéra kuatiañe’ẽme.

20Ha Manases omano rire oñeñotỹ ichupe hógape; ha hendaguépe oisãmbyhy ita’ýra Amon.

Amon oiko Juda retã ruvicha ramo

21Amon oguereko 22 áño oñepyrũvo oisãmbyhy ha mokõi áñonte oisãmbyhy Jerusalénpe.

22Ha’e ojapo ivaíva Ñanderuete resa renondépe, itúva Manases ojapo haguéicha; oikuave’ẽ ha omomba’eguasúgui umi ta’ãnga itúva Manases ojapova’ekuépe.

23Ha araka’eve noñemomirĩriva’ekue Ñanderuetépe, itúva Manases oñemomirĩ haguéicha; upéicha rãngue oñemoangaipave ohóvo.

24Ha hembiguaikuéra opu’ã ñemi hese ha ojuka ichupe hógape.

25Hetãyguakuéra katu ojukapa umi opu’ã ñemiva’ekuépe Amon rehe ha tetãyguakuéra omoĩ tetã ruvicha ramo hendaguépe ita’ýra Josíaspe.