Jeremías 9 - Biblia en Guaraní - ?anderuete ?e’? Por? 2015

1Mba’eichatamora’e ko che akã tahenyhẽ yetágui, ha che resakuéra toiko tesay yvu ramo, cherasẽ hag̃ua ára ha pyhare pukukue che retã re’õnguekuéra rehe.

2Mba’eichatamora’e desiértope aguereko peteĩ tapýi ahasakuévo aiko hag̃ua, aheja rei hag̃ua che retãme, ha añemomombyry hag̃ua ichuguikuéra. Oporomyakãratĩ ha oporombotavységuinte.

3Ijurukuéra opoi japu, ku guyrapáicha ihu’y, ha che retã noñemombaretéi añetegua rupi; oñemohembiapo vaive ohóvo uvei, ha ndochekuaavéi Itúva rembiapokue.

4Oimeraẽva okyhyje iñirũgui, ani hag̃ua ho’a iñuhãme ha avave nomombe’úi pe añetegua; Ha’ekuéra oporombotavy oporombyai hag̃uáicha, ha oimeraẽva oñe’ẽvai hapichakuéra rehe.

5Oimeraẽva ombotavy iñirũme, ha avave nde’íri pe añetegua; ikũnguéra ojepokuaa ijapu hag̃ua, ha oñeha’ãmba oiko vai hag̃ua.

6Ha’ekuéra oikohápe oĩ ñembotavy, oñombotavy haguére ndachekuaaséi hikuái, he’i pende Ruete,

7upévare pende Ruete, Yvága Atykuéra Jára, he’iuka: Pema’ẽ porãke, Che nambuepotirichénepa ichupekuéra ha namyengoviaichénepa che retã rembiapo vaieta.

8Ijurukuéra ojogua hu’y oñembohakuávape, oñe’ẽ ombotavy hag̃uánte, ijurúpe he’i iñirũme py’aguapy, ipy’apýpe katu omoñuhãma ichupe.

9Ndahaviraichénepa ichupekuéra ko’ã mba’e ko’ãva rehe, he’i pende Ruete. Namyengoviaichénepa umichaguápe.

10Cherasẽ ha che ajahe’óta umi cérro ha umi ñu rehe, itaperepágui ha ndaiporivéima avave ohasáva upérupi; ha noñehenduvéima ñane rymbakuéra rasẽ, guyrakuéra yvate ovevéva guive, mymba ñarõ jepeve okañymbáma.

11Jerusaléngui hembýta ita atyraguasúnte, opyta jagua saite rekoha ramo; Che ambotaperepáta Juda tavakuéra ha avave ndoikomo’ãvéima ipype.

Jekyhyje oikóta tapére ha hetãyguakuérape ojegueraháta mbaretépe

12Mávapa pe kuimba’e iñarandúva oikuaa hag̃ua ko’ã mba’e, ha mávapepa oñe’ẽra’e Ñanderuete juru oikuaauka hag̃ua ko’ã mba’e. Mba’éicha rupípa tetã oñehundíra’e, ha oñembotapere ku yvy perõicha, ndaiporivéi peve avave ohasáva upérupi.

13Pende Ruete he’i: Che apoíma ichuguikuéra ha’ekuéra opoi haguére che rembiapoukapýgui, naiñe’ẽrendúigui Che ha’évape ha ndojapóigui che ñe’ẽ,

14oikónte uvei hikuái ipy’apýpe oñandu háicha, ha oiko hikuái ijára gua’u Baal rapykuéri, ituvakuéra ombo’e haguéicha ichupekuéra.

15Upévare, péicha he’i, Yvága Atykuéra Jára, Israel Jára: Ema’ẽ porãke, ko tetã kóvape Che ha’ukáta ajénjo (peteĩ ñana iróva), ha amboy’ukáta ichupekuéra mba’ero rykuere.

16Ha amosarambíta ichupekuéra tetãnguéra apytépe, ha’ekuéra ha ituvakuéra ndoikuaaiva’ekue; ha amboúta kyse puku hapykuerikuéra, ahundi hag̃ua ichupekuéra.

17Péicha he’i Yvága Atykuéra Jára: Pejepy’amongeta porã ha pehenói umi kuña ojahe’okuaávape, peheka umi kuña ikatupyrýva jahe’o rembiapópe ou hag̃ua,

18ha peñembopya’e pya’éke pejahe’o hag̃ua, tesay tokúi avei ñande reságui, tahenyhẽ ýgui ñande ropepi ha ýicha tosyry ñande resay ñande rováre.

19Oñehendúgui Siónpe pyahẽ: Mba’eichaite pevépa jaju ñañehundi: Ñañemotĩeterei, jaheja ñande yvy, oñembyaipágui ñande rogakuéra.

20Pejapysaka porãke, peẽ kuñakuéra, Ñanderuete ñe’ẽ rehe, ha iñe’ẽ toike pende apysakuérape. Ha pembo’e purahéi ñembyasy rehegua pene membykuñakuérape, ha kuñakuéra peñombo’e pejahe’o hag̃ua purahéi ñemano rehegua péicha:

21Pe ñemano oike ñane rovetã rupi, ha oike ñande rogaguasúpe, ohundipa hag̃ua umi mitã oikóva táva rape rupi, ha umi mitãrusu oĩva plázape.

22Ere, péicha he’i Ñanderuete: Tetãyguakuéra retekue ho’a joáta ku mymba repotícha ñúre, ha ku trígo apesãicha ñemono’õhára rapykuerépe, ha ndaipóri avave ombyatyva’erãva.

Jaikuaa porã ramo Ñanderuetépe ñanearanduva’erã

23Péicha he’i Ñanderuete: Upe iñarandúva anítei ojerovia iñarandu rehe, upe ipy’aguasúva anítei ojerovia ipy’aguasu rehe, ha upe imba’erepyetáva anítei ojerovia imba’erepyeta rehe.

24Upe ojeroviaséva tojerovia cherehe ha toñeha’ãmba chekuaa porãve hag̃ua: Che ningo pende Ruete, Che ahayhu jeporiahuvereko, ñembojovake heko peguáva ko yvy apére, ko’ã mba’e ko’ãva chembovy’a, he’i pende Ruete.

25Cháke, outahína pe ára, he’i pende Ruete, ahavira hag̃ua mayma tetã oikytĩva hete ha ipy’apýpe katu noñekytĩukái.

26Upéicha ahaviráta Egípto ha Judápe, Edom, Amon ha Moab ñemoñarenguérape, ha umi mombyry oikóvape, umi Arabiaygua desiértore oikóvape ha isyva ojehague’óvape. Opaite umi tetã ha Israel oikytĩ hete, ipy’apýpe katu noñekytĩukái (nomosẽséi ipy’apýgui ijepy’amongeta vai).