Deuteronómio 8 - Biblia en Guaraní - ?anderuete ?e’? Por? 2015

Yvy porãite oñeme’ẽta peẽme

1Peñeha’ãmbaiteva’erã pejapo hag̃ua hekoitépe ko’ã tembiapoukapy che ha’éva guive peẽme ko árape, peikove ha peñemboheta hag̃ua, peike ha peñemomba’e hag̃ua pe yvy rehe, Ñanderuete he’imava’ekue ome’ẽtaha ñe’ẽme’ẽ rupi pende rukuérape.

2Penemandu’áke umi tape, pende Jára pendegueruva’ekuére, ko’ã 40 áño pukukue pe desiérto rupi, pendera’ã ha oikuaa’uka hag̃ua peẽme mba’épa oĩ pende py’apýpe, ha pejaposépa térã nahániri hembiapoukapykuéra.

3Ha’e penembohasa asy ha penemoñembyahýi, upéi penemongaru mana reheve, pe tembi’u peẽ ha pende rukuéra ndoikuaáiva, oikuaauka hag̃ua peẽme ndaigalléta añói rehe oikoveha yvyariguakuéra, opaite ñe’ẽ osẽva Ñanderuete jurúgui uvei.

4Pende ao araka’eve ndaitujái pendehegui, ha pende pykuéra ndairurúi ko’ã 40 áño aja pukukue.

5Pehechakuaa hag̃ua pende py’apýpe: Peteĩ túva ohekombo’e háicha ita’ýrape, péicha Ñanderuete penerekombo’e avei.

6Pejapo Ñanderuete rembiapoukapy, peguata hag̃ua hape rehe, ha pekyhyjeva’erã ichugui.

7Ñanderuete penemoingéta yvy porãme, yvy hi’ysakãva, hi’y hetáva, hi’yendáva ha ijyvúva, osẽva umi ñu ha cerrokuéragui;

8ijyvy itrígova, icebádava (ojogua trígope), iparraltýva ha igranadatýva (peteĩ yva); yvy hi’olivotýva (ijyvágui ojejapo acéite), ijacéite ha ijeírava;

9upe yvýpe ndape’u pokãmo’ãihápe pan, ha napeikotevẽmo’ãihápe mba’eve; ijyvy itakuérape oĩ hiérro, ha icerrokuéragui penohẽta cóbre.

10Peẽ pekarúta peneryg̃uatã porã meve, Ñanderuete ohovaságui pe yvy ome’ẽtava peẽme.

Ñemomarandu ani hag̃ua ha’ekuéra hesarái Ñanderuetégui

11Peñangarekóke pendejehe ani hag̃ua penderesarái Ñanderuete, Ñandejáragui, pejapo uvei iñe’ẽ, hembiapoukapy ha imbo’epykuéra, che ha’éva peẽme pejapo hag̃ua hekoitépe ko árape:

12Pekaru ha peneryg̃uatã porã, térã pemopu’ã ramo óga peiko porã hag̃ua,

13térã pende vaka ha pende ovechakuéra oñembohetave ramo ohóvo, ha pende pláta ha óro oñemboheta ramo ha opaite mba’e peguerekóva guive oñemboheta hetavévo, upérõ anítei peñembotuicha,

14ha aníke ovu pene ñe’ã ha penderesarái pende Ruetégui penerenohẽva’ekue Egípto retãgui, tembiguái poguýgui;

15Ha’e penemboguatava’ekue peteĩ desiérto tuicha ha oporomongyhyjéva rupi, henyhẽva mbói pochy ha alacrángui, upépe ndaipóri y, Ha’e katu oguenohẽ peẽme y peteĩ ita hatãvagui.

16Pe desiértope Ha’e ome’ẽ peẽme mana pe’u hag̃ua, tembi’u pende rukuéra ndoikuaaiva’ekue. Omoĩ ñepysãnga pene renondépe pehechauka hag̃ua mba’épa oĩ pende py’apýpe, ha ipahaitépe ojapose penderehe mba’eporã;

17ha ani pejétei pende py’apýpe: Orepu’aka ha orepyapy mbarete rupi rohupitypa ko’ã mba’erepyeta.

18Penemandu’áke Ñanderuete, Ñandejára rehe; Ha’e ome’ẽgui peẽme pu’aka pembyaty hag̃ua mba’erepyeta, omoañete hag̃ua iñe’ẽme’ẽ he’imava’ekue pende rukuérape, ko’ág̃a ojapovahína.

19Ha peẽ penderesarái ramo pende Ruetégui ha peiko ramo ambue jára rapykuéri, ha pemomba’eguasu ichupekuéra ha peñesũ ramo henondepekuéra, añetehápe che ha’e ko’ág̃a peẽme, katuete pemanombava’erã.

20Ñanderuete ohundipa hag̃uáicha umi tetãme pene renonderãgui, upéicha pemanombava’erã peẽ avei, ndapejapói ramo pende Ruete ñe’ẽ.