1Upéramo Salomón ombyatyuka opaite Jerusalen ha Israelgua karai ancianokuérape, opaite Israel tríbu ruvichakuérape ha opaite Israel rogaguasu ruvichakuérape, oguerova hag̃ua Ñanderuete karameg̃ua David távagui, péva Sion, Ñanderuete rogaguasúpe.
2Ha pe areteguasu árape opaite Israel kuimba’ekuéra oñembyaty tetã ruvicha Salomón ndive, octúbre jave.
3Ha oupa Israel ancianokuéra. Pa’ikuéra katu ojapyhy Ñanderuete karameg̃ua,
4ogueraha hag̃ua Ñanderuete rógape, pa’ikuéra ha Leviguakuéra ogueraha pe óga jojohuha imba’ekuéra reheve.
5Ha tetã ruvicha Salomón ha Israelguakuéra oñembyaty hendive oikuave’ẽ hag̃ua Ñanderuete karameg̃ua renondépe hetaiterei ovecha ha torokuéra ojepapakuaa’ỹva.
6Ha pa’ikuéra omoĩ Ñanderuete karameg̃ua Ñanderuete róga kotyguasúpe oñemboykéva Ñanderuete ha pa’iguasúpe g̃uarã, umi querubin pepo guýpe.
7Ko’ã querubin oipyso ipepokuéra pe karameg̃ua ári, omo’ã hag̃ua yvatéguio pe karameg̃ua hi’ýva reheve.
8Ha hi’ýva pukuetégui ojehechakuaa ijapýra Ñanderuete kotyguasu hyepýguio, ambue kotyguasu rováiguio katu, ndojehechakuaái, ha péicha opytapa ko ára peve.
9Ñanderuete karameg̃ua ryepýpe oĩ: Umi mokõi ita ipéva Móises ombosako’iva’ekue cérro Horébpe, Ñanderuete oñembopy’apeteĩvo Israel ñemoñarenguéra ndive, osẽ ramoguare hikuái Egípto retãgui.
10Ha pa’ikuéra osẽvo ikotyguasúgui, peteĩ arai omyenyhẽ Ñanderuete rogaguasu.
11Péicha pa’ikuéra ndaikatuvéi opyta oñemohembiapovévo, pe araígui omyenyhẽgui Ñanderuete rogaguasu.
12Upémaramo Salomón he’i: Ñanderuete he’iva’ekue Ha’e oikotaha pytũháme.
13Ha che amopu’ã nde rogaguasu reiko hag̃ua opaite árape ipype.
14Ha tetã ruvicha ojere ohovasa hag̃ua Israel ñemoñarenguérape, ha mayma Israelgua oñembyatyva’ekue oĩmba hikuái ñembo’yhápe.
15Ha Salomón he’i: Toñemomba’eguasu Israel Járape, ojapopágui iñe’ẽ he’imava’ekue che ru Davídpe, he’ívo:
16Anohẽha ára guive Egíptogui che retã Israélpe, ndaiporavói peteĩ táva Israel tribukuéragui oñemopu’ã hag̃ua che rogaguasurã, oñemomba’eguasu hag̃ua che réra porãite, jepémo aiporavo Davídpe omoakã hag̃ua che retã Israélpe.
17Ha che ru David omopu’ãseva’ekue Ñanderuete rogaguasu, Israel Jára réra oiko hag̃ua ipype.
18Ñanderuete katu he’i che ru Davídpe: Iporã nde py’apýpe reñandúva, remopu’ãségui peteĩ óga che rérape g̃uarã.
19Neremopu’ãmo’ãi katu che rogarã, nde ra’y uvei omopu’ãta che rogarã, oñemomba’eguasu hag̃ua che réra.
20Ha Ñanderuete ojapopa iñe’ẽ he’iva’ekue: Che apytáma che ru David rendaguépe, ha aguapy Israel guapyhaguasúpe Ñanderuete he’i haguéicha, ha amopu’ã hogarã, Israel Jára rérape g̃uarã.
21Ha ipype amoĩ Ñanderuete karameg̃ua, ha péva rupi Ñanderuete oñemopeteĩ ñanendive, oguenohẽ ramoguare ñande ypykuérape Egípto retãgui.
22Upéi Salomón oñemoĩ Ñanderuete kuave’ẽmby renda renondépe ha mayma Israel oñembyatyva’ekue renondépe, ha omopu’ã ipo yvága gotýo,
23ha oñembo’e: Israel Jára, ndeichagua Jára ndaipóri yvágape ni yvy apére, Nde reñembopy’apeteĩgui ne rembiguaikuéra ndive, ha reiporiahuverekógui oimeraẽva oikóva ipy’aite guive ne renondépe.
24Rejapóma opaite mba’e, nde ereva’ekue guive che ru David, ne rembiguáipe, ojehechakuaa háicha ko ára kóvape.
25Ko’ágã, Israel Jára, ejapomína avei umi ñe’ẽ Nde reme’ẽmava’ekue ne rembiguái Davídpe, erévo: Tapia ne ñemoñare oguapyva’erã Israel retã guapyhaguasúpe, nde ra’ykuéra oguata porã guive che rapekuéra rehe nde reguata haguéicha.
26Ko’ágã, Israel Jára, toiko ne ñe’ẽ eremava’ekue ne rembiguái David, che rúpe.
27Añete piko ore Ruete oikóne yvy apére, yvagakuéra jepe imichĩ oiko hag̃ua ipype, ko’ytevépa ikatúne reiko ko ógape che amopu’ãva’ekue ndéve g̃uarã.
28Jepeve ramo péicha ejapysakami ne rembiguái ñembo’e rehe, ha che Jára tee, ehendumína ne rembiguái ojeruréva ko árape ndéve.
29Nde resa toñangareko pyharekuépe ha arakuépe ko óga rehe, ko yvy nde eremava’ekue rehe: Che réra oĩva’erãha upépe, ha ehendumína ne rembiguái ñembo’e ojejapóva ko’a guive.
30Ehendumína ne rembiguái ha ne retã Israel ñembo’ekuéra oje’éva ko’a guive, ehendumi yvága reikoha guive, ehendumi haeperdonami ore angaipa, ore rembiapo vai.
31Oimeraẽva oñemoangaipáva hapicha rehe, ha ojegueru ramo ichupe ko ne kuave’ẽmby renda renondépe ko ogaguasúpe omombe’u porã hag̃ua umi mba’e ojehuva’ekue,
32upérõ ehendumi yvága guive ha embojovake porãmi ne rembiguaikuérape, reitývo pe tembiapo vaikue ijapohare akã ári, ha eipytyvõ ipy’a porãvape rehechaukávo nde reko iporãiteha.
33Ne retã Israel ho’a ramo hese ija’e’ỹva pópe oñemoangaipágui nendive ha oñembyasyete rire nde rapépe, ha ojerovia jevy ramo ha oñembo’e ramo omba’ejerurévo ko óga guive,
34ehendumi yvága guive, ha eperdonami ne retã Israel angaipa, ha egueru jevymi ituvakuéra retãme Nde voi reme’ẽva’ekue ichupekuéra.
35Oñemboty ramo yvága ha ndokyvéi ramo, ha’ekuéra oñemoangaipa haguére nendive, ha oñembyasyete jevy ramo ha opoi ramo hi’angaipágui, Nde remomirĩ haguére ichupekuéra,
36upérõ ehendu jevymi ichupekuéra yvága guive, ha eperdonami ne rembiguaikuérape ha ne retã Israel angaipa, ha embo’e jevymi ichupekuéra oiko hag̃ua tape porãme, ha emongymi yvy apére, ne retãyguakuérape reme’ẽ ndete voi ko yvy kóva imba’etee ramo.
37Israel retãme oĩ ramo ñembyahýi, mba’asy vai iñasãiva, yso hũ, plága tuku, mba’asy vai ha hese ija’e’ỹva omongora ramo Israel távape, térã oimeraẽva mba’asy, taha’e ha’éva rehegua,
38ha peteĩ Israelgua oñembo’e ha omba’ejerure asy ramo, oñembyasyete rire ipy’apýpe, ipy’apyñe’ẽ oñe’ẽ pohýi haguére ichupe,
39upérõ ehendumi, Nde reikoha guive, ha eperdona jevymi ha eme’ẽmi ichupe ha’e oguata haguéicha, Nde ningo reikuaapa voi tetãyguakuéra py’apýpe oĩva guive,
40okyhyje hag̃ua ndehegui oikove aja ko tetã kóvape, Nde voi reme’ẽmava’ekue ore rukuérape.
41Upéicha ehendumi avei tetã ambueyguakuérape, oúva tetã mombyrýgui nde réra rehehápe,
42ha’ekuéra ohenduva’erã nde réra guasuetégui, nde pyapy mbaretégui ha ne rembiapokuéragui, ha ou ramo oñembo’e ko óga kóvape,
43upérõ ehendumi Nde reikoha guive, yvága guive, ha ejapomi avei pe tetã ambueygua omba’ejeruréva ndéve, ikatu hag̃uáicha opaite ambue tetãyguakuéra oikuaa avei nde réra ha okyhyje avei ndehegui ne retã Israel okyhyje háicha, ha toikuaa nde réra oñehenoiha ko óga kóvape, che amopu’ãva’ekue ndéve g̃uarã.
44Ne retãygua osẽ ramo oñorãirõ hag̃ua hese ija’e’ỹva ndive, Nde reipotágui, ha oñembo’e ramo oma’ẽvo Jerusalen táva gotýo, Nde voi reiporavomava’ekue, oĩ hag̃ua Ñanderuete rogaguasu che amopu’ãva’ekue nde rérape g̃uarã,
45upérõ ehendumi iñembo’e ha imba’ejerure asy yvága guive ha eipytyvõmi ichupekuéra nde justícia rupi.
46Ha ha’ekuéra oñemoangaipa ramo nendive, ndaipóri voi yvyarigua hi’angaipa’ỹva, ha Nde ndepochýgui hendivekuéra remoĩ ichupekuéra hese ija’e’ỹva pópe, ogueraha hag̃ua ichupekuéra ambue tetã ag̃uívape térã mombyrývape,
47ha oñembyasyete ramo ojapo vai haguére ha oñembo’e ramo ndéve pe tetã ojereraha haguépe, ha he’i ramo hikuái: Roñemoangaipa, rojapo ivaíva, roiko iñañáva ramo,
48ha ojevy ramo ne rendápe ipy’aite guive ha hi’ánga mbytete guive, umi hese ija’e’ỹva retã guive ojereraha haguépe, ha oñembo’e ramo ndéve, oma’ẽvo hetã Israel yvy rehe Nde reme’ẽmava’ekue ituvakuérape, ha oma’ẽvo pe táva reiporavova’ekue rehe, ha pe óga che amopu’ãva’ekue rehe nde réra oĩ hag̃ua,
49upérõ ehendu jevymi nde reikoha guive iñembo’e ha imba’ejerure asy ha eipytyvõ jevymi ichupekuéra,
50ha eperdona jevymi ne retãygua oñemoangaipava’ekuépe, ha opaite ijejavykue ojapova’ekue nderehe, ha iguerahaharekuéra toiporiahuvereko ichupekuéra.
51Ha’ekuéra voi ne retã ha ne mba’e teéva Nde renohẽmava’ekue Egíptogui, pe tatakua hierroguigua mbytégui.
52Nde resa toñangareko ne rembiguái ha ne retã Israel ñembo’e rehe, rehendu hag̃ua ichupekuéra, ha’ekuéra nerenói ramo.
53Nde voi ore Ruete remboyke ichupekuéra ne mba’etee ramo opaite tetã apytégui, ha ere haguéicha ne rembiguái Móises rupi, renohẽvo ore rukuérape Egíptogui.
54Salomón oñesũ oñembo’e ha omba’ejerure rire ko’ã mba’e rehe Ñanderuetépe; upéi opu’ã ha oipe’a ipokuéra yvága gotýo,
55ha ohovasa opaite Israelguakuéra ijatývape, ha hatã he’i:
56Pemomba’eguasu Ñanderuetépe, Ha’e omombytu’u haguére hetã Israélpe; opaite mba’e ojehúma Ha’e he’i hagueichaite, opaite iñe’ẽme’ẽ he’imava’ekue Móises rupi ojehúma avei.
57Ore Ruete eikóna orendive, reiko haguéicha ore rukuéra ndive, anítei repoi orehegui, ha anítei oremboyke.
58Emoañetete uvei ore py’apy nde rape rehe, ore rojapo hag̃ua hekoitépe ne rembiapoukapykuéra ha ne ñe’ẽ Nde reipota háicha, ha ere haguéicha ore rukuérape.
59Ko che ñembo’e ambohasava’ekue ndéve, ore Ruete topyta ne akãme ára ha pyharépe, ha eñangareko ne rembiguái ha ne retãyguakuéra rembiapo rehe ha eme’ẽmi ichupekuéra hemikotevẽ opaite árape.
60Ikatu hag̃uáicha opaite tetã yvy arigua oikuaa ore Ruete, ore Jára añeteha, ha ndaiporiha ambue Ha’eichagua.
61Taiporãitéke pende py’a Ñanderuete ndive g̃uarãnte, peikóvo Ha’e oipota háicha, ha pejapóvo hembiapoukapy ko ára peguáicha.
62Upéramo tetã ruvicha ha opaite Israelguakuéra hendive oĩva, oikuave’ẽ Ñanderuetépe g̃uarã.
63Ha Salomón oikuave’ẽ 22.000 tóro ha 120.000 ovecha, kuave’ẽmby py’aguapy reheguáva Ñanderuetépe g̃uarã. Péicha tetã ruvicha ha opaite Israel ñemoñarenguéra omoñepyrũ pe tembiapo Ñanderuete rogaguasúpe g̃uarã.
64Pe ára pévape tetã ruvicha omoñepyrũ Ñanderuete rogaguasu rembiapo oikuave’ẽvo Jahvépe g̃uarã kuave’ẽmby ojehapypáva, kuave’ẽmby tembi’u reheguáva; kuave’ẽmby py’aguapy reheguáva, Ñanderuete róga korapy mbytépe, imichĩeterei pe kuave’ẽmby renda bronceguiguáva oĩva Ñanderuete rogaguasu renondépe, ha ndaijáigui ipype opaite kuave’ẽmby oñekuave’ẽséva.
65Upéi Salomón ojapo vy’aguasu ha hendive opaite Israelguápe, hetaiterei oñembyatyva’ekue Hamat guive Egípto ysyry peve Ñanderuete renondépe, 7 ára (día) pukukue, ha ambue 7 arave omboty peve 14 ára.
66Ha og̃uahẽvo pe ára 8-ha, Salomón omomaitei paha hetãyguakuérape, ha ha’ekuéra oho hogakuérape vy’a ha py’a rory reheve, opaite mba’eporã Ñanderuete ojapomava’ekue hembiguái David ha hetã Israel rehe.
Who We AreWhat We EelieveWhat We Do
2025 by iamachristian.org,Inc All rights reserved.
