1Pecherendu, peẽ peñeha’ãva peiko hag̃ua justícia poguy rapykuéri ha peẽ pehekáva pende Ruetépe, pema’ẽ porãke pe itaguasúre peñekytĩ haguégui, ha itakuáre penerenohẽ haguégui.
2Pema’ẽ porãke pende ru Abraham ha pende sy Sára rehe, ha’e hasyhápe imembyva’ekue Che ahenói ramoguare ichupe, ha’eñoite oiko, ha Che ahovasa rire ichupe ha’e oñemoña hetaiterei.
3Añetehápe pende Ruete voi omoangapyhýma Siónpe, oiporiahuverekóta itaperekuérape ha ijyvy perõgui ojapóta Eden, ha iñuguasúgui Ñanderuete ojapóta kokue porã, ipype ojejohu hag̃ua vy’a, tory, purahéi ha ñemomba’eguasu avei.
4Peẽ, che retãygua, pejapysaka porã cherehe, cherendu porãke; chehegui osẽta tembiapoukapy ha justícia ohekombo’e porã hag̃ua tetãnguérape.
5Hi’ag̃uietéma che justícia, og̃uahẽtama che salvacion, ha che jyva ombojovakéta tetãnguérape; umi y rembe’y rupi oikóva chera’ãrõ, ha che jyva mbarete rehe omoĩ ijerovia.
6Pejesaupi yvagakuéra rehe ha pema’ẽ yvy rehe; umi yvága oñehundíta ku tatatĩ oñehundi háicha, ha pe yvy oñembyaíta oñembyai háicha ao tuja, ha ijyvyarigua omanóta mberúicha, che salvacion katu oikóta opaite árape g̃uarã ha che justícia ndopamo’ãi.
7Pecherendúke, peẽ peikuaáva guive pe justícia, pe tetã py’apýpe oĩ che rembiapoukapy. Ani pekyhyjétei yvyarigua jeja’o vaígui, ha ani pendepy’a kangýtei ha’ekuéra ojahéi vai ramo penderehe.
8Ku polílla ho’u háicha pe ao ha pe yso ho’u háicha ovecha rague, upéicha avei ha’ekuéra opa reíta; che justícia katu oikóta opaite árape ha che salvacion oikóta umi yvyarigua ñemoñare paha pegua peve.
9Epaymi, ore Ruete, epaymi, eiporúna nde pu’aka, epáy ku ára ohasa ramoguaréicha, ore ypykuéra oiko ramoguaréicha. Nandéi piko ra’e Rahab kytĩhare, ha pe tejujagua kutuhare.
10Nandéi piko yguasu mbohypahare, ha avei pe yvykua hugua’ỹva avei. Nandéi piko rembohypa pe yguasu rugua ha rejapo tape ohasa hag̃ua umi reguenohẽva jejopy vaietégui.
11Añetehápe umi Ñanderuete ojoguávape oupa jevýta puraheipópe Siónpe, ijuru omomba’eguasúta Ñanderuetépe, vy’a ha tory omoirũta ichupekuéra, mba’asy ha pyahẽ okañymbáta ichuguikuéra.
12Che, Che voi ningo, pomoangapyhýva. Mba’érehepa rekyhyje yvyarigua omanótavagui, iñemoñarẽnguéra ojogua umi kapi’ípe.
13Ha nderesarái Ñanderuete, nde apoharégui, omyasãiva’ekue umi yvága ha omohenda ko yvy tuicháva; opaite ára rekyhyje pe ndejopy asýva pochýgui, nehundi hag̃uáicha. Ha mamo piko oime pe oporojopy asýva pochykue.
14Pya’e ojepoíta umi oñeñapytĩvagui ha umía nomanomo’ãi oguejy hag̃ua omanóva retãme, ha hembi’urã hembýta.
15Che voi pende Ruete, ambopochy pe yguasu ha ambohyapu ypu’ã, Che, nde Jára, che réra yvága atykuéra Jára.
16Ha nde jurúpe amoĩkuri che ñe’ẽ, ha romo’ã che pópe, aipyso umi yvága ha amboguapy ko yvy ipyendápe, ha ha’e Siónpe: Nde voi ningo che retã.
17Epáy, epáy, epu’ã nde Jerusalen, Ñanderuete po nemboy’u ipochy pegua vásope; Ha’e nemboy’u ivásope remokõmbaitéta.
18Opaite Jerusalen membykuéra apytégui, ndaipóri avave nesãmbyhykuaáva; ha ne membykuéra remongakuaava’ekue apytépe ndaipóri peteĩnte jepe nemboguatakuaáva.
19Mokõi mba’evai nderupitýma: Tapere ha jepy’apy vai, ñembyahýi ha kyse puku. Mávapa oñembyasýta nendive. Mávapa nemoangapyhýta.
20Ne membykuéra ipy’a kangypa ha ojepysopa umi tape ojuasaha rupi, ku guasu ñuhã meguáicha, Ñanderuete pochy penderupitýma, Ha’e ipochy haguére penenupã.
21Upévare ehendu, ko’ág̃a ko’ã mba’e ko’ãva, rejepy’apy asýva, reka’úva ndaha’éi katu vínope.
22Péicha he’i nde Ruete, nde Jára, pe oñorãirõva hetã rehehápe: Péina ápe, aipe’átama nde pógui pe váso nembohasa asýva, che váso pochy pegua ha ichugui nderey’uveimava’erã araka’eve.
23Ha amoĩta pe váso umi nembohasa asýva pópe, umi he’imava’ekue ne ángape: Ejeity yvýre rohasa hag̃ua nde ári. Ha nde rejepysova’ekue yvýre, tape ramoguáicha, ohasa hag̃ua hikuái ndeári.
Who We AreWhat We EelieveWhat We Do
2025 by iamachristian.org,Inc All rights reserved.
