1Che hermanokuéra, pomomandu’ase avei ningo, Ñanderuete ñe’ẽ porãite (evangélio) amombe’uva’ekue rehe peẽme, peẽ peñemomba’eva’ekue hese ha peikopeína ipype,
2ko evangélio kóva rupi pejesalváta, pejapo guive pehendu haguéicha chehegui, peicha’ỹrõ pejerovia gua’u rei ra’e ñepyrũ guive.
3Che ambohasánte peẽme umi ñe’ẽ oñeme’ẽva’ekue chéve raẽ ha ojehai háicha Ñanderuete kuatiañe’ẽme: Hesu omano hague ñande reko vai rehe, (Isaías. 53),
4ha oñeñotỹ hague ichupe, Ñanderuete katu omoingove jevy hague ichupe ára mbohapyhápe, (Salmokuéra 16,10).
5Upéi ojehechauka hague Pédrope ha umi 12 hemimbo’ekuérape.
6Uperire ojehechauka hetave 500-gui hermanokuérape oñembyaty jave, umíva apytégui oĩ umi oikovéva gueteri, ambuekuéra katu omanóma.
7Upéi ojehechauka Jacóbope ha opaite ambue apostolkuérape,
8ipahápe Hesu Crísto ojehechauka avei chéve, ku membykua ramoguáicha.
9Che ningo pe michĩvéva umi apostolkuéra apytépe, ndaijái chéve añehenói hag̃ua apóstol, apersegui haguére Hesu Crísto reheguávape.
10Ñanderuete poriahuvereko rupínte katu che ha’e pe ha’éva, ha pe mborayhu Ha’e oiporúva cherehe ndareíri, añeha’ãmbave opaite ambuekuéragui. Ndachéi jepe ningo, Ñanderuete rembiapo rupi uvei, ipy’aporã chemyañáva,
11upéicha ramo tachéra’e, térã ha’ekuéra jepe, oñondive romyasãi peteĩ evangélionte, ha péicha peẽ pejerovia Hesu Crísto rehe.
12Oñemombe’u ramo Hesu Crísto oikove jevy hague omanóva apytégui, mba’éicha piko oime he’íva pende apytépe: Umi omanova’ekue noñemoingove jevymo’ãiha.
13Umi omanova’ekue ndoikove jevýi ramo, upéicharamo Hesu Crísto ndoikove jevýi avei.
14Ha Hesu Crísto ndoikove jevýi rire, aipórõ ore romyasãi reiete avei ichupe, ha upéicharamo opavave ñande jajerovia reiete avei.
15Upéicharamo ore romombe’u rei Ñanderuete ñe’ẽ porãite, ha roiko techahare japu ramo, romyasãigui Ñanderuete omoingove hague Hesu Crístope, noñemoingovéi ramo ichupe omanova’ekue apytégui.
16Umi omanova’ekue noñemoingove jevýi ramo, péva he’ise noñemoingovéi hague avei Hesu Crístope.
17Ha noñemoingove jevýi ramo Hesu Crístope, peẽ pejerovia rei hese, ha peiko gueteri pende reko vaípe (ha mba’epochy poguýpe),
18upéicharamo avei umi omanova’ekue, ojerovia ramojepe Hesu Crísto rehe, oñehundipáma.
19Ñamoĩ ramo ñane esperánza Hesu Crísto rehe ñande rekove ko yvy ári g̃uarãnte, ñandeporiahuve opaite ambue ñande rapichakuéragui.
20Jaikuaa porã katu Ñanderuete omoingove hague Hesu Crístope omanova’ekue apytégui; Ha’e oikove jevy hag̃ua tenonderãitépe ichupe, omanova’ekue apytégui, koga’a peteĩha ramo.
21Peteĩ kuimba’e rupi og̃uahẽva’ekue pe ñemano, upévare avei peteĩ kuimba’e rupi oñemoingovepa jevýta.
22Adan angaipa vai rupi opaite kuimba’e ha kuñakuéra omanova’erã, Hesu Crísto rembiapo porã rupi katu oñemoingovepa jevýta.
23Peteĩteĩ hendag̃uáme: Hesu Crísto raẽ, upéi Hesu Crísto reheguáva, Ha’e ouha árape.
24Upérõ Ñanderuete ohupityva’erã ipropósito, ha Hesu Crísto ohundi riréma opaichagua mburuvichakuérape, jarakuérape térã pu’aka oñemoĩva guive hese, upéi ae Hesu Crísto ome’ẽ jevýta isãmbyhy (imburuvicha reko) Ñanderuete pópe.
25Hesu Crísto oisãmbyhyva’erã, Ha’e ombopoguypa peve opaite hese ija’e’ỹvape.
26Ipahápe Hesu Crísto ombopoguýta avei pe ñemano, hese ija’e’ỹva pahapegua.
27Hesu Crísto omoĩva’erã opaite mba’e ipoguýpe. Ñanderuete kuatiañe’ẽme katu he’i: Ñanderuete omoĩmba ramojepe opaite mba’e Hesu Crísto pópe, Ha’e ndopytamo’ãi Ita’ýra poguýpe, (Salmokuéra 8,7).
28Hesu Crísto omoĩmba rire katu ipyguýpe, Ha’e voi oñemoĩ jevýta Ñanderuete poguýpe, Ñanderuete omyenyhẽmba hag̃ua heko jajaipa rupi ha Ha’émante oiko hag̃ua pe mburuvichaguasuteeitéva ramo,
29upeicha’ỹ ramo, mba’épa ojapóne umi ojebautizava’ekue umi omanómava’ekue rendaguépe. Umi omanova’ekue noñemoingove jevýi ramo, upérõ umi ojebautizaukava’ekue hendaguépe, ojebautizauka reiete.
30Mba’érehepa upéicharamo ore roiko asy romano hag̃uáicha opaite árape.
31Che hermanokuéra aime ajejuka hag̃uáicha opaite árape, upeichavéramo jepe chepy’arory penderehehápe, peẽ pejeroviágui Hesu Crísto rehe.
32Che añorãirõ rire yvy arigua rekópe leõnguéra ndive Efésope, mba’e piko che ahupitýta péva rupi, umi omanova’ekue noñemoingove jevymo’ãi ramo. Upéicharamo ko yvy arigua ñe’ẽ iporãva’erãmo’ã avei: Jakaru ha jay’u, ko’ẽrõ ningo ñamanóta.
33Aníke peñembotavy: Irũnguéra vai ombyai jepokuaa porã.
34Pepáykena ha peneakã porã jevýke ha anive pejapo mba’e ivaíva. Oime ningo pende apytépe umi oikuaa’ỹva Ñanderuetépe, péva che ha’eva’erã peẽme, petĩ hag̃ua.
35Oiméne he’íva: Mba’éicha piko oikove jevýta umi omanova’ekue. Mba’eichagua tete rehevépa ou jevýta.
36Ndevýro, upe nde reñotỹva ningo noñemoingovéi omano raẽ’ỹrõ,
37ha upe reñotỹva ningo ndaha’éi imátatee, nde reñotỹ uvei ha’ỹinte, taha’e trígo ra’ỹi térã ambue oime haichagua.
38Ñanderuete katu ombohete Ha’e oipota háicha, ha peteĩteĩ ha’ỹime oñeme’ẽva’erã imatateerã.
39Ndaho’ói peteĩcha (opaite to’o ndaha’éi peteĩchagua to’o) oĩ kuimba’e ro’o, mymba ro’o, guyra ro’o, pira ro’o.
40Oĩ ningo tete yvagaguiguáva, ha oĩ tete yvy ape ariguáva; pe yvága reko jajaipa ojuavy avei pe yvy arigua reko mimbígui.
41Pe kuarahy mimbi iñambue (ojuavy) jasy mimbígui, ha jasy mimbi iñambue jevy jasy tata mimbígui, ha jasy tatakuéra apytépe jepe oĩ mimbi iñambuéva ojuehegui.
42Upéicha ojehúta avei pe tete omanova’ekue rehe, oñemoingove jevy ramo. Oñeñotỹ ñembyai reheve ha oikove jevýta ñembyai’ỹ reheve,
43oñeñotỹ mba’e michĩetéva, opu’ãva’erã mba’e mimbipáva; oñeñotỹ kangy reheve ha oikove jevýta mbarete reheve.
44Oñeñotỹ tete ánga reheguáva, oñemoingove jevy katu peteĩ tete pytu porã reheguáva. Oĩ ramo tete ánga reheguáva oĩ avei peteĩ tete pytu porã reheguáva.
45Upéicha ojehaiva’ekue pe Adan peteĩha oñemoingove peteĩ ánga oikóva reheve, pe Adan ipaha pegua katu Pytu Porã oporomoingovéva reheve.
46Pe Pytu Porã reheguáva ningo naitenondéi, pe ánga reheguáva uvei, uperire ae pe Pytu Porã reheguáva.
47Pe kuimba’e peteĩha ningo, yvyguiguare (Adan); pe kuimba’e mokõiha katu yvagaguigua (Hesu Crísto).
48Pe kuimba’e yvyguiguávape (Adan) ojogua umi ambue yvyariguáva; ha pe kuimba’e yvagaguiguáva (Hesu Crísto) ojogua opavave oikétavape yvágape.
49Jaiko háicha pe yvy peguáva ra’ãnga reheve, upéicha avei jaikóta pe yvága pegua ra’ãnga reheve.
50Che ha’éma peẽme che hermanokuérape: To’o ha tuguy ndoikeiva’erã Ñanderuete rekohápe (yvágape); pe oñembyaítava ndaikatúi ohupity pe tekove tapia g̃uarãva.
51Peikuaa porãke peteĩ mba’e ñemi Hesu Crísto oikuaaukámava chéve: Nañamanombamo’ãi ningo, ñañemoambuepava’erã katu,
52sapy’aitépe, peteĩ tesa pirĩme, pe turu ipu (trompéta) pahápe; oñembopúvo pe trompéta Ñanderuete ñanemoingove jevýta, ha ome’ẽta ñandéve peteĩ tete ipyahúva oñembyaive’ỹva araka’eve.
53Ñande rete oñembyaivahína oñemondeva’erã peteĩ tete oñembyai’ỹvape, ha ñande rete omanóva oñemondeva’erã peteĩ tete omanove’ỹvape.
54Ko ñande rete oñembyaíva oñemonde ramo tete oñembyaive’ỹvape, ha ko tete kóva omanova’erãva oñemondéma ramo tete omanove’ỹvape, upéicha ramo oikóta pe ñe’ẽ ojehaíva Ñanderuete kuatiañe’ẽme: Hesu Crísto ombopoguýma pe ñemano, pe ñemano’ỹ omokõma pe ñemano, (Isaías 25,8; Oséas 13,14).
55Ñemano moõpa oime nde pu’aka. Ñemano, moõpa oime ne popía.
56Ñemano popía ningo tembiapo vai (angaipa), ha pe tembiapo vai pu’aka katu ojekuaa porã Ñanderuete rembiapoukapy rupi.
57Upévare jagradece Ñanderuetépe, Ha’e ñanembopu’aka haguére ñemano rehe, Ñandejára Hesu Crísto rupi.
58Upévare che hermanokuéra ahayhúva, peñembo’y hatãkena, pemỹi’ỹre (akatúape ni asúpe, Deuteronómio 28,14), pemba’apo katu kyre’ỹme pene rembiapópe, ha peikuaa porãke opaichagua tembiapo pejapóva guive Ñanderuetépe g̃uarã ndareiriha (ndojeitymo’ãiha tesaráipe).
Who We AreWhat We EelieveWhat We Do
2025 by iamachristian.org,Inc All rights reserved.
