Salmokuéra 39 - Biblia en Guaraní - ?anderuete ?e’? Por? 2015

Ñande yvyarigua rekove ohasa pya’eiterei - David purahéi

1Che py’apýpe ha’e: Añangarekóta che rape rehe, ani hag̃ua che ajavy che juru rupi, ajokóta che kũ, iñañáva oĩ jave che renondépe.

2Kirirĩháme cheñe’ẽngúra’e, nda’éi mba’eve añeha’ãmba ajejoko hag̃ua, ha añeñandu vai.

3Che py’a tarovaite, ajepy’amongeta jave tatáicha hendy, upévagui apoi che kũgui, añe’ẽ hag̃ua:

4Nde, che Ruete, eikuaauka che ára paha, ha mboy árapa aikovéta, tahechakuaa mba’eichaitépa ohasa pya’e che rekove.

5Ema’ẽ porãke, Nde remombyky che rekove che po pegua ipekuéicha, ha che rekove pukukue mba’evetéicha ne renondépe, añetehápe ore roikovéva guive rojogua yvytu reietépe. Selah

6Añetehápe ñande yvyarigua jajogua kuarahy’ãme, reiete roñeha’ãmba romono’õ hag̃ua mba’erepyeta ndoroikuaái katu mávapa oiporupáta.

7Ha ko’ág̃a, che Ruete, mba’épa aha’ãrõvekuaa, nderehénte ajerovia.

8Chemopotĩ opaite che angaipakuéragui, ha anítei umi ivýrova oñembohory cherehe.

9Che akirirĩ, nda’éi mba’eve rehe Nde voi rembosako’ipa (che rekove).

10Anive chenupã, che amanótama nde po pohýi guýpe.

11Nde rehekombo’e rehavirávo yvyariguakuérape hembiapo vai rehe ha rembyai ysóicha hekovekuéra, añetehápe pe yvyarigua ningo ku yvytu reitéicha. Selah

12Ejapysakamína che ñembo’e rehe, Nde, che Ruete, ha ehendumi che mba’ejerure asy. Ani rekirirĩtei rehechávo che resay, che ningo peteĩ oguatavahína, peteĩ mbohupánte (ko yvy apére), opaite che rukuéraicha.

13Ani rema’ẽ cherehe (nde pochy reheve) che rekove ikatu opytu’u, aha mboyve ko yvy árigui omanómava retãme.