Salmokuéra 26 - Biblia en Guaraní - ?anderuete ?e’? Por? 2015

Heko potĩva ñembo’e - David purahéi

1Chepytyvõmína Nde, che Ruete, che aikógui heko potĩva ramo, eha’ãmína che py’apy ajeroviágui nderehe, ha ndapiáigui (nde rapégui).

2Eitypeka che rekove, Nde, che Ruete, ha chembojovake, eipyguara che apytu’ũ ha che py’apy ruguaitépe heñóiva.

3Che resakuéra renondépe oĩ nde poriahuvereko, aikógui nde reko añetegua he’i háicha.

4Ndaguapýi umi tapicha hova mokõiva ndive, ha ndaguatái umi heko japúva ndive.

5Ndahayhúi iñañáva aty ha araka’eve ndaguapýi ijapytepekuéra.

6Py’apy potĩpópe ajohéi che pokuéra, ha péicha aikóta ne kuave’ẽmby renda ypy rupi, Nde, che Ruete.

7Amombe’u porã pe ñe’ẽ nemomba’eguasúva ha amyasãi opaite ne rembiapo porãite.

8Che Ruete, ahayhuete nde rogaguasu, ha nde reko jajaipa.

9Ani rehundi che ánga umi hembiapo vaíva ndive, ha che rekove umi oporojukáva ndive.

10Ipóre oja mba’evai ha ijakatúa henyhẽ pirapire oñembopopeguávagui.

11Che aikogui’aína che reko potĩme, cheperdona ha cheporiahuverekomína.

12Che py oiko justícia rapépe, yvyarigua atýpe amomba’eguasu che Ruetépe.