Ésdras 10 - Biblia en Guaraní - ?anderuete ?e’? Por? 2015

Kuña tetã ambueygua oñemosẽmba

1Ésdras oñembo’e ha omombe’u jave hi’angaipa, ojahe’óvo Ñanderuete rogaguasu renondépe, oñembyaty ijerekuévo peteĩ aty ndetuichaitéva, kuimba’e, kuña ha mitãkuéra; ha opaite hetãyguakuéra ojahe’o asy hendive.

2Upéramo Secanías, Jehiel ra’y, Elam ra’yrekuéra apytégui, he’i Ésdraspe: Ore ningo roñemoangaipa Ñanderuete ndive, romenda haguére tetã ambueygua kuña rehe, ha jepevémo péicha, oĩ gueteri esperánza Israélpe g̃uarã.

3Upévare ñame’ẽ ñane ñe’ẽ Ñanderuetépe, japoipataha opaite ko’ã kuña ha imembykuéragui, nde orerekombo’e háicha ha Moises rembiapoukapy kuatiañe’ẽ he’i háicha.

4Epu’ã, kóva ningo ne rembiapo, ha ore roĩta nendive; eñeha’ãmba ha ejapo ko tembiapo hekoitépe.

5Upéramo Ésdras opu’ã ha oñembopy’apeteĩ pa’ikuéra, Levigua mburuvichakuéra, ha opaite Israelguakuéra ndive ojejapotaha peichaite; ha opaite Israelguakuéra ome’ẽ iñe’ẽ, omoneĩvo ichupe.

6Ko’ã mba’e rire Ésdras ojei Ñanderuete rogaguasu renondégui, ha oho Johanan, Eliasib ra’y kotýpe; ha oho rire upépe, ndo’úi mba’eve ni ndoy’úi, oñembyasyetereígui umi jepokuahágui ouva’ekue oñemoangaipa vaiete jevy haguére.

7Oñemoherakuã hikuái Juda ha Jerusalen rehe, opaite umi ohova’ekue ojepokuapýpe toñembyaty Jerusalénpe;

8ha upe ouse’ỹva mbohapy ára peve, mburuvichakuéra ha karai ancianokuéra he’i haguéicha, tojepe’apa imba’erepy oguerekóva guive, ha upéva toñemosẽ umi ojepokuava’ekue atýgui.

9Ha péicha opaite Juda ha Benjamin kuimba’ekuéra oñembyaty Jerusalénpe pe ára mbohapyhápe, péva ho’a pe ára 20-hápe, pe jasy 9-hápe, ha tetãyguakuéra maymáva oguapy Ñanderuete rogaguasu renondépe, oryryipa hikuái okyhyjégui umi mba’e ojehútavagui ha okýgui avei.

10Upérõ pa’i Ésdras opu’ã ha he’i ichupekuéra: Peẽ ningo peñemoangaipa vaiete, pemenda haguére kuña tetã ambueygua rehe, pembojo’ave hag̃ua Israel angaipakuéra.

11Ha ko’ág̃a pemomba’eguasu Ñanderuete, pende rukuéra Járape, ha pejapo Ha’e oipotáva, ha peñemboyke ambue tetãyguakuéragui ha ikuñakuéragui.

12Ha opaite ijatýva guive, hatã he’i: Ore rojapopáta nde eréva guive oréve.

13Ore retaiterei ningo, ha oñepyrũma avei oky, upévare ndikatúi ropytapa ama guýpe romyatyrõmba peve hi’areitereítagui.

14Upévare topyta ko’ág̃a ore rendaguépe ore mburuvichakuérante, ha ha’ekuéra tohenói opaite oikóva guivépe tetã ambueygua kuña ndive oñembyatypa hag̃ua peteĩ árape, ha ore mburuvichakuéra tomyatyrõmba ore táva ruvichakuéra ha ore mbojovakehára renondépe, ojei hag̃ua Ñanderuete py’aro ñande apytégui.

15Jonatan, Asael ra’y, ha Jahzeías, Ticva ra’y añoite, Israel retãyguakuéra apytégui, ha umi Levigua apytégui Mesulam ha Sabetai añoite oñemoĩ ko ñe’ẽ kóvare.

16Opaite ambue jepokuahágui ouva’ekue katu ojapose Ésdras rembipota. Upémaramo Ésdras oiporavo Israel rogaguasu ruvichakuéra apytégui umi oipytyvõtava ichupe, herakuéra ojehaipa peteĩ kuatianñe’ẽme, ha oñembyaty hikuái pe ára peteĩháme, pe jasy 10-hápe omyatyrõmba hag̃ua.

17Ha ombojovakepáma hikuái umi omendava’ekue tetã ambueygua kuña rehe, pe jasy peteĩha, pe ára peteĩháme.

18Pa’i ñemoñarenguéra apytépe, omendava’ekue tetã ambueygua kuña rehe, ojejohúkuri ko’ãva: Jesúa rógagui, ha Josadac ra’y ha ityke’yrakuéragui: Maasías, Eliezer, Jarib ha Gedalías.

19Ko’ãva ome’ẽ (opu’ã) ipokuéra he’i jave opoitaha hembirekokuéragui, ha oikuave’ẽ hikuái hembiapo vai rehe peteĩ ovecha mácho hymbakuéra apytégui.

20Ha upéi Imer ñemoñarenguéragui: Hanani ha Zebadías.

21Harim ñemoñarenguéragui: Maasías, Elías, Semaías, Jehiel ha Uzías.

22Pasur ñemoñarenguéragui: Elioenai, Maasías, Ismael, Natanael, Jozabad ha Elasa.

23Levi ñemoñarenguéragui: Jozabad, Simei, Kelaía (péva hína peteĩ Kelgua), Petaías, Juda ha Eliezer.

24Umi opurahéiva apytégui: Eliasib; ha okẽ ñangarekoharakuéragui: Salum, Telem ha Uri.

25Ha upéicha avei Israelguakuéragui, Paros ñemoñarenguéragui: Ramías, Jizías, Malquías, Mijamín, Eleazar, Malquías ha Benaías.

26Elam ñemoñarenguéragui: Matanías, Zacarías, Jehiel, Abdi, Jeremot ha Elías.

27Zatu ñemoñarenguéragui: Elioenai, Eliasib, Matanías, Jeremot, Zabad ha Aziza.

28Bebai ñemoñarenguéragui: Johanan, Hananías, Zabai ha Atlai.

29Bani ñemoñarenguéragui: Mesulam, Maluc, Adaía, Jasub, Seal ha Ramot.

30Pahat-moab ñemoñarenguéragui: Adna, Quelal, Benaías, Maasías, Matanías, Bezaleel, Binúi ha Manases.

31Harim ñemoñarenguéragui: Eliezer, Isías, Malquías, Semaías, Simeon,

32Benjamin, Maluc ha Semarías.

33Hasum ñemoñarenguéragui: Matenai, Matata, Zabad, Elifélet, Jeremai, Manases ha Simei.

34Bani ñemoñarenguéragui: Madai, Amram, Uel,

35Benaías, Bedías, Quelúhi,

36Vanías, Meremot, Eliasib,

37Matanías, Matenai, Jaasai,

38Bani, Binúi, Simei,

39Selemías, Natan, Adaías,

40Macnadebai, Sasai, Sarai,

41Azareel, Selemías, Semarías,

42Salum, Amarías ha Jose.

43Ha Nebo ñemoñarenguéragui: Jeiel, Matatías, Zabad, Zebina, Jadai, Joel ha Benaías.

44Mayma ko’ãva omendava’ekue tetã ambueygua kuña rehe, ha ijapytépe oĩ avei umi kuña imembymava’ekue, opaite umívape oñemosẽ Judaygua rogakuéragui.