1 Samuel 2 - Biblia en Guaraní - ?anderuete ?e’? Por? 2015

Ana purahéi

1Ána oñembo’e ha he’i: Che py’a hory nderupi ore Ruete, che pu’aka okakuaa tuicha nderupi, che Jára; che juru rupi amyasãi cherehe ija’e’ỹvape, che py’a hory nde chepytyvõ porã haguére.

2Ndaipóri hekoporãva Ñanderuetéicha; ndaipóri voínte avave ndejoguáva, ha ndaipóri ambue mo’ãha renda.

3Ani pemboheta ñe’ẽ vai ha ani pejererovu reive; topa pene ñemomba’eguasu rei; Ñanderuetépe oikuaapaitégui, Ha’émante ikatu oha’ã ñane rembiapokuére.

4Umi imbaretetéva guyrapa opẽmba, ha umi ikangyetéva katu oñemombarete ohupitýgui ichugui ipu’aka.

5Umi hyg̃uatã porãva’ekue ko’ág̃a oho chángape galléta rekávo, ha umi iñembyahýiva naiñembyahyivéi; umi ndikatúiva imemby jepe, ko’ág̃a imemby 7, ha umi imemby retáva katu ikangypáma.

6Ñanderuete oporojuka ha Ha’e oporomoingove; Ha’e oporomboguejy omanóva retãme, ha oporogueru jevy.

7Ñanderuete oporomomboriahu térã ome’ẽ mba’eta; oporoity térã oporomopu’ã.

8Ha’e omopu’ã mboriahu yvytimbo pa’ũgui, Ha’e ombotuicha poriahuetévape yty apytégui, omboguapy hag̃ua ichupe karaiguasukuéra apytépe, ha oreko hag̃ua peteĩ terakuãguasu porã renda; Ñanderuete po voi ningo ojoko ko yvy horcon, ha hi’ári omboguapy ko yvy kóva.

9Ha’e oñangareko heko potĩva rehe hape rupi, ha heko vaíva katu omano pytũmbýpe; avave ndaikatúi oñemombarete ikatupyry rupínte henondépe.

10Ñanderuete renondépe ipehẽnguepáta hese ija’e’ỹva, ha hi’arikuéra Ha’e osunúta ára guive; Ñanderuetépe ombojovake yvy apýra peve, Ha’e omombarete hetã ruvichápe ha ombotuicha tuichave ohóvo. Ha’e ombotuicha umi oiporavova’ekuépe.

11Ha Elcána oho jevy hóga Rama peguápe; ha Samuel opyta Ñanderuete rembijokuái ramo Eli renondépe.

Eli ra’ykuéra angaipa

12Eli ra’ykuéra ningo kuimba’e iñañáva ha ndojeroviáiva Ñanderuete rehe.

13Ha’ekuéra oiko ojepokuaa vai tavayguakuéra ndive; oime ramo oúva oikuave’ẽ hymba rekove, ou jepi pa’i rembiguái ojy jave pe so’o, ha ogueru ipópe ty’ãi akua, hãi mbohapýva,

14ha omoinge japepópe (óllape) térã páilape, térã japepoguasúpe, térã ña’ẽmbépe; ha osẽva guive ty’ãi akua rehe, ogueraha pa’ikuérape. Péicha ojapo hikóni opaite Israelgua rehe, oúva guive Sílope.

15Péicha ojapo avei ikyrakue rehe, ojehapy mboyve ou jepi pa’i rembiguái, ha he’i tymba jukahárape: Eme’ẽke so’o mbichyrã pa’ípe g̃uarã, ha’e ndoipotamo’ãi ndehegui so’o ojypyréva, ipýrante oipota.

16Ha pe kuimba’e oikuave’ẽva he’i ramo ichupe: Tojehapy raẽ ikyrakue, ha upéi pegueraha peipotáva; ha’e he’i jevy: Nahániri, eme’ẽ katu chéve ko’ag̃aite voi; peicha’ỹ ramo che aguenohẽta mbaretépe.

17Péicha Eli ra’ykuéra ombohetaiterei hi’angaipa Ñanderuete renondépe; nomomba’éigui Ñanderuete kuave’ ẽmby.

18Pe mitã Samuel katu oiko Ñanderuete renondépe hembijokuaiteéva ramo ha omonde ao líno peguáva, pa’ikuéra omonde háicha peteĩ poncho mbykýva líno peguáva.

19Ha isy ojapo jepi ichupe g̃uarã peteĩ akã ahoja’i ha ogueru ichupe meme áñonte, ojupi ramo iména ndive oikuave’ẽ hag̃ua hymba rekove ojepokuaa háicha.

20Ha Eli ohovasa Elcána ha hembirekópe, he’ívo: Ñanderuete tome’ẽ ndéve heta ta’ýra ko kuñakarai kóva rupi, pe omba’ejerureva’ekue Ñanderuetépe, Samuel rendaguépe. Ha oho jevy hikuái hógape.

21Ha Ñanderuete ohovasa Ánape, ha ha’e hyeguasu, ha péicha imemby mbohapy kuimba’e ha mokõi kuña. Ha pe mitãrusu Samuel okakuaa ohóvo Ñanderuete renondépe.

22Eli katu itujaitereíma; ha ohendupa ita’yrakuéra ojapoha ivaíva opaite Israelguakuéra rehe, ha mba’éichapa oke kuñakuéra ndive, omba’apóva pe óga jojohuha rokẽme.

23Ha he’i ichupekuéra: Ma’erãiko ãichagua mba’evai pejapo. Che ahendúma opaite tavayguágui pende reko ivaiha.

24Ndaupéichai, che ra’ykuéra, ndaha’éi terakuã porã che ahendúva; peity angaipápe Ñanderuete retãyguakuérape.

25Tetãygua ojapo vai ramo hapicha rehe Ñanderuetépe oikóta imbojovakehára ramo, ombojovake hag̃ua hembiapokue; ha peteĩ tetãygua katu oñemoangaipa ramo Ñanderuete rehe, mávapa omba’ejerurekuaa hese. Ha’ekuéra katu nohenduséi itúva ñe’ẽ, Ñanderuete voi péicha ojapo omano hag̃ua hikuái.

26Ha pe mitãrusu Samuel okakuaave ohóvo, oiko porã katu Ñanderuetépe ha hetãyguakuéra renondépe.

27Ha peteĩ proféta ou Eli rendápe ha he’i ichupe: Péicha he’i Ñanderuete: Che ajehechauka porã nde rukuérape oiko ramoguare gueteri Egíptope, faraon rógape,

28Che poiporavova’ekue che pa’irã opaite Israel ñemoñare apytégui, peikuave’ẽ hag̃ua che kuave’ẽmby renda ári, pehapy hag̃ua mba’e ryakuã asy, pemonde hag̃ua poncho mbyky, pa’ikuéra omondéva che renondépe, ha ame’ẽ nde ru rogayguakuérape Israel ra’ykuéra kuave’ẽmbýgui.

29Mba’érehe piko pepyrũ che kuave’ẽmby rymba ha tembi’u rehegua rehe, Che voi aikuave’ẽukava’ekue pe óga jojohuhápe; ha nde rembotuichave nde ra’ykuérape chehegui, peñemongy’a umi mba’e iporãvévagui, Israelguakuéra oikuave’ẽva’ekue chéve.

30Upévarupi, Israel Jára he’i: Che ha’eva’ekue nde róga ha nde ru rógape peiko hag̃ua che renondépe opaite árape, ko’ágã katu pende Ruete he’i: Araka’eve ndajapomo’ãi ãichagua mba’e, Che amomba’eguasúta upe chemomba’eguasúvape, ha umi chemboykévape katu ndarekomo’ãi ichupe mba’e ramo.

31Eikuaa porãke, og̃uahẽta pe ára Che amopẽta nde jyva, ha nde ru rogaygua jyva anivéma hag̃ua oĩ itujáva nde rogapýpe.

32Rehecháta nde róga ndaha’evéi ramo mba’eve, Ñanderuete omyenyhẽ aja mba’e porãgui Israélpe; ha araka’eve noĩveimava’erã itujáva nde rógape.

33Peteĩ nde reheguáva kuimba’e Che ahejáta che kuave’ẽmby rendápe, ani hag̃ua nde resa omboypi, ha nde py’apy henyhẽ vy’a’ỹgui, opaite ambue katu heñóiva guive nde rogapýpe omanova’erã ikaria’yha árape.

34Ko’ã mba’e ojehúta umi nde ra’y, Ofni ha Fineéspe, peteĩ techauka ramo ndéve g̃uarã: Mokõivéva omanóta peteĩ árape.

35Ha Che amopu’ãta peteĩ pa’i hekoite peguáva, ojapótava che py’apy ha che angapy rembipota; ha Che amopu’ã mbaretéta hogarã, ha ha’e oikóta tapia g̃uarã pe mburuvichaguasurã ykére.

36Ha umi hembýva nde rogapýpe ouva’erã pe mburuvichaguasurã renondépe oñesũ hag̃ua pirapire ha pan pehẽnguemi rekávo, ha he’iva’erã ichupe: Ajeruréko ndéve chemoĩmi hag̃ua oimeraẽ tembiaporãme ikatu hag̃uáicha ha’u pan pehẽnguemi jepe.