Deuteronómio 29 - Biblia en Guaraní - ?anderuete ?e’? Por? 2015

Ñanderuete oñembopy’apeteĩ Israel ndive Moab retãme

1Ko’ã ñe’ẽ Ñanderuete he’i Moiséspe, Ha’e oñembopy’apeteĩ jevy ramoguare Israel ndive Moab retãme, oñembopy’apeteĩ haguéicha cérro Horébpe.

2Moises ombyaty Israelguakuérape ha he’i ichupekuéra: Peẽ pehechapáma opaite mba’e Ñanderuete ojapova’ekue Egípto retãme faraon ha hembiguaikuéra rehe.

3Peẽ pehecha umi jepy’ara’ã ndetuicháva, ha pende resa renondépe oiko avei milágro ndetuicháva.

4Ko ára kóva peve Ñanderuete nome’ẽi gueteri peẽme akã arandu peikuaa hag̃ua, tesa pehecha hag̃ua ha apysa pehendu hag̃ua.

5Ha Che poguerúkuri 40 áño pukukue ko desiérto rupi; ha pende aokuéra ndaitujaiva’ekue penderehe, ha pende sapatu ndaitujaiva’ekue pende py rehe.

6Ndape’úikuri pan, ni ndape’úikuri víno, ni víno hyjúiva, peikuaa hag̃ua Che ningo Jahve, pende Jára.

7Ha peg̃uahẽvo árupi osẽkuri Sehon, Hesbon ruvichaguasu, ha Og, Basan ruvichaguasu, ñande rapépe ojeity hag̃ua ñandeári, ñande katu ñambopoguy ichupekuéra.

8Ha ñañemomba’e ijyvy rehe, ha ñame’ẽ Ruben, Gad ha Manases tríbu mbyterépe ijyvy imba’eteéva ramo.

9Upévagui peñangarekova’erã pe ñe’ẽ ñame’ẽva’ekue rehe Ñanderuetépe ha pejapo hekoitépe osẽ porãmba hag̃ua peẽme opaite mba’e pejapóva guive.

10Peẽ peiméva ko ára kóvape Ñanderuete renondépe: Pende tríbu ruvichakuéra, pende karai ancianokuéra, pene mburuvichakuéra, ha mayma Israel kuimba’ekuéra,

11pene mitãkuéra, pene rembirekokuéra ha tetã ambueyguakuéra oikóva pende apytépe, pene rembiguaikuéra oikytĩva peẽme jepe’a, umi tembiguaikuéra oguenohẽva y peẽme,

12upévare che ha’e peẽme peñembopy’apeteĩ ko ára kóvape Ñanderuete, Ñandejára ndive.

13Peẽ peiko hag̃ua ko ára kóva guive hetãteéva ramo, ha Ha’e oiko hag̃ua peẽme g̃uarã pende Jaratee ramo, Ha’e he’i haguéicha peẽme, ha ome’ẽ haguéicha iñe’ẽ pende rukuéra Abraham, Isaac ha Jacóbope.

14Napenendive añói ajapo ko ñembopy’apeteĩ,

15ajapo umi oĩva ñanendive ko’ápe Jahve, Ñanderuete renondépe, ha avei umi oĩ’ỹva gueteri ñanendive.

16Peẽ peikuaa porã mba’éichapa jaikókuri Egípto retãme, ha mba’éichapa jaguatákuri umi tetã pa’ũ rupi;

17ha pehechákuri umi mba’evai ombopy’aróva Ñanderuetépe: Jára ra’ãngakuéra yvyra ha itágui, pláta ha órogui ojejapova’ekue, ha mba’éichapa omomba’eguasu hikuái umíape.

18Aníke oikótei pende apytépe kuimba’e térã kuña, ogaguasu térã tríbu ko árape oñemboykéva ipy’apýpe Jahve, Ñanderuetégui oho hag̃ua omomba’eguasu ambue tetã jarakuérape; ani oĩ omoheñóiva ka’avo rapo pochy ha pohã vai pende apytépe.

19Ha anítei oĩ pende apytépe umi ohendu rire ko’ã maldicion ko’ãva ojepy’amongeta ipy’apýpe ha oñembotuicha ko’ã ñe’ẽ rupi he’ívo: Chepy’aguapýma, aguata ramojepe che akã oipota háicha. Ko’ã ñe’ẽ rupi oñehundíta umi omokõva ha umi omokõséva pe pohã vai.

20Ñanderuete noperdonamo’ãi, otimbova’erã katu Ñanderuete pochy ha heko rakate’ỹ upe kuimba’e rehe, ha ojava’erã hese ko maldicion ojehaíva guive ko kuatiañe’ẽme ha Ñanderuete ombogueva’erã héra yvága guýgui;

21ha Ñanderuete omboykeva’erã ichupe Israel tribukuéra apytégui, oja hag̃ua hese ko’ã maldicion ko’ãva, Ha’e he’i haguéicha ha ojehai háicha ko tembiapoukapy kuatiañe’ẽme.

22Ha pene ñemoñarenguéra oútava, pende ra’ykuéra opu’ãtava peẽ rire, ha umi tetã ambueygua oútava tetã mombyrýgui ohechava’erã umi jehavira oikóva ko yvy kóva rehe, ha umi mba’asyeta Ñanderuete omboúva ichupekuéra,

23ohechava’erã azúfre ha juky, ha pende yvy kaipapyre noñeñemitỹiva, ndahi’áiva ha nopu’ãiva ipype mba’eveichagua ka’avo ku ojehu haguéicha Sodóma ha Gomórra oñehundi ramoguare, upéicha ojehuva’ekue avei Adma ha Zeboim, umía Ñanderuete ohundiva’ekue ipochy rupi.

24Upérõ umi tetã he’iva’erã: Mba’érehepa Jahve, Israel Jára, péicha ojapo ko tetã kóva rehe, ha mba’érehepa Israel Jára ohavira pohýi ichupekuéra.

25Ha oñembohovaiva’erã ichupekuéra: Opoi haguére Jahve, ituvakuéra Jára ñe’ẽgui, Ha’e ome’ẽva’ekue ichupekuéra ha Ha’e ojapova’ekue oguenohẽ ramoguare ichupekuéra Egípto retãgui,

26ha oho omomba’eguasu ha oñembo’e hag̃ua hikuái ambue járape, ko’ã jára Israelguakuéra ndoikuaaiva’ekue ni nome’ẽiva’ekue ichupekuéra mba’eveichagua provécho,

27upévagui Ñanderuete pochy hendy ko tetã kóva rehe, ogueru hag̃ua hi’ári umi maldicion ojehaíva ko kuatiañe’ẽ kóvape;

28ha Ñanderuete ohapomondoro pochypópe ichupekuéra ijyvýgui, ha jaheipópe oñeko’õi, ha omosarambi ichupekuéra tetã ambuépe, ojehecha háicha ko’ág̃a.

29Umi mba’e ñemi yma ndojekuaáiva Jahve, Ñanderuete mba’e (ha natekotevẽi ñaha’ã jaipyguara hag̃ua); umía Ha’e ko’ág̃a oikuaauka porã ñandéve ha ñande ra’ykuérape g̃uarã, Ha’e ome’ẽ ñandéve jajapo hag̃ua hekoitépe.