Apostolkuéra 23 - Biblia en Guaraní - ?anderuete ?e’? Por? 2015

Páblo ojegueraha umi mburuvicha Israel pegua apytépe

1Upérõ Páblo oma’ẽ porã imburuvichakuéra rehe ha he’i: Che ryke’ykuéra, che aiko yma guive ko’ág̃a peve che py’apyñe’ẽ potĩ ha teko porã reheve Ñanderuete renondépe.

2Upévare pe pa’iguasu Ananías he’i pe kuimba’épe oñembo’ýva Páblo ykére, oinupã hag̃ua Páblope ijuru rupi.

3Páblo katu he’i ichupe: Ñanderuete nenupãva’erã avei, nde tekove rova mokõi. Nde reguapy ñembojovake guapyhápe chembojovake hag̃ua Moises rembiapoukapy he’i háicha, ha nde voi remboyke Moises rembiapoukapy chenupãukávo.

4Umi oĩva ijypýpe katu he’i ichupe: Nde ningo reñe’ẽvai pa’iguasúre.

5Upévare Páblo he’i: Che ryke’ykuéra, che ningo ndaikuaái ha’eha pe pa’iguasu. Ñanderuete kuatiañe’ẽme he’i voi: Ne retã ruvicháre anítei reñe’ẽvai.

6Páblo ohechakuaávo umi mburuvicha apytépe oĩha heta saducéo ha heta fariséo, hatã ha’e he’i: Che ryke’ykuéra, che ningo avei peteĩ fariséo ha peteĩ fariséo ra’yre, heta oñemoĩ cherehe ha chembojovakeuka che aha’ãrõgui umi omanova’ekue oikove jevytaha.

7Péicha oñe’ẽ aja oiko apañuãi umi fariséo ha saduceokuéra apytépe, ha oñemboja’o umi oñembyatýva.

8 Saduceokuéra he’ígui umi omanova’ekue araka’eve ndoikovemo’ãveimaha, ha he’i avei ndaiporiha angelkuéra ni pytukuéra, fariseokuéra katu oguerovia opaite ko’ã mba’e.

9Upémaramo oiko peteĩ sarambi, ha umi mbo’ehára fariseokuéra apytégui opu’ã peteĩ ha he’i: Ore ndorojohúi mba’eve ivaíva ko kuimba’e rekove rehe. Ikatu ningo peteĩ ángel térã pytu porãva oñe’ẽ hendive.

10Oikógui ñe’ẽjoapi ndetuicháva, pe soldádo ruvicha okyhyje ojukárõ g̃uarã hikuái Páblope, upévare ogueruka hetave soldadokuérape oguenohẽ hag̃ua ichupe Judayguakuéra apytégui ha ogueraha jevy hag̃ua Páblope soldadokuéra rogaguasúpe.

11Ha pe pyhare ambuépe Ñandejára Hesu Crísto ojehechauka Páblope ha he’i ichupe: Páblo, eñembopy’aguasu. Nde remyasãi porã haguéicha che réra Jerusalénpe péicha nde remyasãita avei Rómape.

12Ko’ẽmbávo heta Judaygua oñembyaty oñemoĩ hag̃ua peteĩ ñe’ẽme ojuka hag̃ua Páblope, okaru ha hoy’u jevy mboyve, ha ome’ẽ iñe’ẽ Ñanderuete rérape péva katuete ojapotaha hikuái.

13Ha oĩve 40 kuimba’égui oñoñe’ẽme’ẽ.

14Umi kuimba’e oho pa’iguasu ha karai ancianokuéra rendápe ha he’i ichupekuéra: Ore roñemoĩma peteĩ ñe’ẽme rojuka hag̃ua Páblope rokaru ha roy’u mboyve, ha ro’ava’erã maldicion poguýpe ore ndorojukái ramo ichupe pe árape.

15Upévare pejerure soldádo ruvichape ha’e ogueruka jevy hag̃ua Páblope, peporandu porãve hag̃uáicha ichupe, ha og̃uahẽ mboyve pene rendápe, ore roha’ãrõta ichupe ñemiháme tape ykére, ha ore rojeitýta sapy’a hi’ári rojuka hag̃ua ichupe.

16Páblo reindy memby katu ohendúvo pe ñuhã ombosako’íva hikuái ichupe g̃uarã, oho Páblo rendápe ha omombe’upa ichupe ohenduva’ekue guive.

17Upérõ Páblo ohenói peteĩ soldádo ruvicha’ípe ha he’i ichupe: Eraha ko karia’ýpe soldádo ruvicha rendápe, ha’e ningo oguereko peteĩ mba’e omombe’uva’erãva ichupe.

18Upérõ pe mburuvicha’i ogueraha ichupe huvicha rendápe, ha he’i ichupe: Cherenói ningo Páblo, pe ojeapresava’ekue, ha ojerure chéve aru hag̃ua ko karia’y ne rendápe, oguerekógui peteĩ mba’e he’iva’erãva ndéve.

19Upérõ pe mburuvicha ojapyhy pe karia’y po ha ogueraha ichupe peteĩ tenda ha’eñoháme, ha oporandu ichupe: Mba’épa remombe’use chéve.

20Ha pe karia’y he’i: Judayguakuéra oñemoĩma peteĩ ñe’ẽme ojerure hag̃ua ndéve ko’ẽrõ reguerahauka hag̃ua Páblope imburuvichakuéra atýpe, oporandu gua’u hag̃uáicha ichupe pe oikóva rehe.

21Nde katu ani regueroviátei mba’e ichupekuéra. Hetave 40 kuimba’egui omoñuhãtavahína Páblope, oñembopy’apeteĩma hikuái anive hag̃ua okaru ni hoy’u ojuka peve Páblope tape rupi, ha péva omoañete peteĩ maldiciónpe, ho’átava hi’arikuéra ndojapopái ramo hekopete he’i haguéicha. Ha’ekuéra oha’ãrõnte nde reguerahauka Páblope ijatypekuéra.

22Upérõ pe soldádo ruvicha he’i pe karia’ýpe: Ekirirĩete, ani remombe’u avavépe nde reñe’ẽ hague ko mba’e kóva rehe chendive.

Páblo ojegueraha Félix, peteĩ Róma ruvicha rendápe

23Upéi pe soldádo ruvicha ohenói ambue mokõi soldádo ruvicha’ípe ha he’i ichupekuéra: Pembosako’i ko pyharépe, 9 hóra rupi g̃uarã, 200 soldádo yvy rupigua ha 70 kavaju arigua, ha 200 soldádo iguyrapa ha hu’ykuéra reheve, oho hag̃ua Cesaréa peve.

24Pembosako’i avei peteĩ kavaju Páblope g̃uarã, ha’e oho hag̃ua avei kavaju ári ha tog̃uahẽ tesãi porã reheve Félix, pe Róma retãruvicha rendápe.

25Ha ohai avei peteĩ kuatiañe’ẽ Félixpe g̃uarã:

26Che, Cláudio Lísias, amomaiteiuka Félix, pe Róma ruvichápe.

27Ko kuimba’e kóva, che apresa Judayguakuéra apytégui che soldadokuéra rupi, ha’ekuéra ojukamo’ãvo ichupe, ha’e he’i chéve peteĩ Romayguaha.

28Aikuaa porãségui hekópe mba’érehepa ojukase hikuái ichupe, arahauka ichupe imburuvichakuéra atyguasúpe.

29Ajohu ningo ha’ekuéra okaguái reike hese ra’e Ijára rembiapoukapykuéra rehe, ha ndojapói hague mba’eve ojejuka térã amoinge jepe hag̃ua ichupe cárcelpe.

30Oñemombe’úgui chéve oĩha umi omoñuhãséva ñemiháme ko kuimba’épe ojuka hag̃ua ichupe, upévare che amondo ichupe pya’e ne rendápe, ha che ha’éma umi okaguáiva hese toho avei ne rendápe.

31Ha pe pyharépe che ha’euka umi soldádo yvy rupigua ogueraha hag̃ua Páblope Antipátris pevénte,

32ha upéi tojevy Jerusalénpe hogaguasúpe, ha umi kavaju arigua tomog̃uahẽ ichupe ne rendaitépe.

33Og̃uahẽvo hikuái Cesaréape ome’ẽ ko kuatiañe’ẽ kóva ha Páblope avei pe Róma ruvicha pópe.

34Ha ha’e omoñe’ẽmba rire ikuatiañe’ẽ oporandu Páblope: Moõpa renaceraka’e, ha ha’e he’i ichupe: Che anace Társope, Cilícia departaméntope.

35Upérõ he’i Páblope: Che rohendu porãta ou rire umi okaguáiva nderehe, ha pe ára pévape ha’e oñangarekouka hese Heródes rogaguasúpe.