2 Crónicas 23 - Biblia en Guaraní - ?anderuete ?e’? Por? 2015

1Pe año 7-hápe Joiada oñembopy’aguasu, ha oike jekupytýpe umi soldádo aty ruvichakuéra ndive, oisãmbyhýva 100 soldádope: Azarías, Jeroham ra’y ndive; Ismael, Johanan ra’y ndive; Azarías, Obed ra’y ndive; Maasías, Adaía ra’y ndive; ha Elisafat, Zicri ra’y ndive.

2Ha’ekuéra oho Juda retãpy rehe, ha ombyaty umi Leviguápe opaite Juda tavakuéragui, ha oike jekupytýpe avei Israel rogaguasu ruvichakuéra ndive, ha ko’ãva ou avei Jerusalénpe.

3Ha mayma ijatýva guive oike jekupytýpe tetã ruvicha ndive Ñanderuete rogaguasúpe. Ha Joiada he’i ichupekuéra: Péina ápe tetã ruvicha ra’y, ha’e oisãmbyhýta Ñanderuete he’i haguéicha David ra’ykuéra rehe.

4Ko’ág̃a péicha pejapóta: Pemboja’o pe soldádo atyguasu mbohapy atyhápe, pe pytu’uha árape oútava peteĩ aty michĩva opytáta okẽ ñangarekoha ramo pa’ikuéra ha Leviguakuéra ndive.

5Pe aty mokõiha, opytátava tetã ruvicha rógape; ha pe aty mbohapyha oñangarekóta pyenda rokẽ rehe ha ambue soldadokuéra oĩmbáta Ñanderuete róga korapýpe.

6Anítei avave oike Ñanderuete rógape, pa’ikuéra ha Leviguakuéra hembiapóvamante; ha’ekuéra oikekuaa, oñemboheko potĩ rire; opaite ambue tetãyguakuéra katu ojapóta Ñanderuete rembiapoukapykuéra he’i háicha.

7Leviguakuéra katu opytáta tetã ruvicha jerekuévo, ha peteĩteĩva oguerekóta iñorãirõ rembiporu ipópe; oimeraẽva oikéva pe ógape, tomano; ha peiméta tetã ruvicha ndive oikekuévo ha osẽnguévo.

8Leviguakuéra ha opaite Judaygua ojapopa pa’i Joiada he’i haguéicha ichupekuéra; ha umi mburuvicha ojapyhy umi ipoguy peguápe, umi oikétava omba’apo hag̃ua pytu’uha árape hembiapógui, pa’i Joiada ojoko avei pe soldádo aty hembiapópe.

9Pa’i Joiada ome’ẽ avei umi soldádo aty ruvichakuérape yvyra puku akua ha umi soldádo retemo’ãhaguasu ha michĩva tetã ruvicha David mba’ekue, oĩva Ñanderuete rogaguasúpe.

10Ha omohenda porã opaite hetãyguakuérape, ha peteĩteĩ oguereko ikyse puku ipópe, Ñanderuete rogaguasu rugua akatúa gotyogua guive pe hugua asu gotyogua peve, ha pe kuave’ẽmby renda Ñanderuete rogaguasu ha tetã ruvicha jerekuévo.

11Upémaramo Joiada oguenohẽ tetã ruvicha ra’ýpe, ha omoĩ hese pe coróna, ome’ẽ ipópe Ñanderuete rembiapoukapy kuatiañe’ẽ ha omona hese acéite ryakuã porã rehe omoingóvo ichupe péicha Juda retã ruvicha ramo, ha upéi he’i: Toikove tetã ruvicha.

12Atalía ohendúvo tapichakuéra oñaníva ryapu, ha umi oguerosapukáiva tetã ruvichápe, pya’e ou tetãyguakuéra apytépe Ñanderuete rogaguasu korapýpe;

13ha ha’e oma’ẽvo, ohecha tetã ruvichápe oĩvahína umi horconguasu Ñanderuete rogaguasu renondépe, ha umi mburuvicha, umi turu mbopuharakuéra oĩ tetã ruvicha ypýpe, ha opaite tetãyguakuéra ovy’a joa, ombopúvo turukuéra, opurahéi mba’epu reheve omoakã hag̃ua puraheikuéra, ha omomba’eguasu Ñanderuetépe. Upévo Atalía omondoro ijaokuéra, ha he’i: Opu’ã hikuái cherehe, opu’ã hikuái cherehe.

14Ha pa’i Joiada he’i soldádo aty ruvichakuérape, peapresa Atalíape ha peguenohẽ ichupe Ñanderuete rógagui okápe, ha pejuka ichupe kyse puku rãimbépe; pa’i he’ígui ani hag̃ua ojejuka ichupe Ñanderuete rogaguasúpe.

15Ha’ekuéra oapresa ichupe, ha oñemoag̃uívo tetã ruvicha rogagui ha umi kavaju róga rokẽ ypýpe, upépe ojuka hikuái Atalíape.

16Ha Joiada ome’ẽ iñe’ẽ Ñanderuetépe, ha’e ha tetãyguakuéra retã ruvicha ndive, oikotaha Ñanderuete retã ramo.

17Ko’ã mba’e rire opaite tetãyguakuéra oike Baal tupãópe, ha oitypa hikuái ha’ãnga ha ikuave’ẽmby rendaguéra; ha oipehẽ’ãmba umi ta’ãnga, ha ojuka hikuái Matan, Baal pa’ípe, umi kuave’ẽmby renda renondépe.

18Upéi Joiada omoĩ pa’ikuéra ha Leviguakuéra Ñanderuete róga rembiapópe, David omoĩ haguéicha, oikuave’ẽ hag̃ua vy’a ha puraheipópe Ñanderuetépe g̃uarã kuave’ẽmby ojehapypáva, Moises rembiapoukapykuéra he’i háicha, ha David he’iuka hagueichaite avei.

19Omoĩ avei okẽ ñangarekoharakuéra Ñanderuete róga rokẽme, ani hag̃ua oike avave ipotĩ’ỹva.

20Upéi ohenói umi soldádo aty ruvichakuérape, karai ancianokuérape, mburuvichakuérape, umi táva sãmbyhyhárape, ha ambue tetãyguakuérape ogueraha hag̃ua tetã ruvichápe Ñanderuete rógagui tetã ruvicha rógape, omboguapy hag̃ua ichupe tetã ruvicha guapyhaguasúpe.

21Ha ovy’a joa opaite Juda retãyguakuéra; ha pe táva oiko py’aguapýpe, ojejuka rire Atalíape kyse puku rãimbépe.