Levítico 17 - Biblia en Guaraní - ?anderuete ?e’? Por? 2015

Pe tenda oñemboykéva Ñanderuetépe g̃uarã peteĩnteva’erã

1Ñanderuete oñe’ẽ Moiséspe, ha he’i:

2Eñe’ẽ Aaron, ita’yrakuéra ha mayma Israel ñemoñarenguérape, ha ere ichupekuéra: Ko ñe’ẽ kóva Jahve (pende Ruete) he’iva’ekue ojejapo hag̃ua:

3Oimeraẽ kuimba’e Israelgua oajúra kytĩ ramo peteĩ tóro, térã ovecha, térã kavara pe tekohápe térã okápe,

4ha ndoguerúi ramo pe óga jojohuha rokẽ renondépe oikuave’ẽ hag̃ua Jahvépe, pe kuimba’e hekomeg̃ua, péva ojehechakuaa oporojukáva ramoguáicha ha hapicha ruguy oñohẽrõ guáicha, ojejukava’erã ichupe hetãyguakuéra apytégui.

5Opaite Israel ñemoñarenguéra ogueruva’erã ikuave’ẽmby Jahve róga jojohuhápe, pa’i rendápe, ha’e oikuave’ẽ hag̃ua kuave’ẽmby py’aguapy reheguáva Jahvépe g̃uarã, ndikatúi oñekuave’ẽ ambue hendápe.

6Ha pe pa’i ohypýita huguykue pende Ruete kuave’ẽmby renda ári hóga jojohuha rokẽ renondépe, ha ohapyva’erã ikyrakue mba’e ryakuã porã ramo pende Ruetépe g̃uarã.

7Ha araka’eve ndoikuave’ẽveiva’erã hikuái ikuave’ẽmby mba’epochýpe, máva rapykuéripa oikova’ekue hikuái oñemongy’ávo; ko’ã mba’e ojererekóta tembiapoukapy ramo peẽme ha pene ñemoñarenguérape g̃uarã opaite árape.

8Eréta avei ichupekuéra: Oimeraẽ kuimba’e Israelgua térã tetã ambueygua oikóva guive pende apytépe, oikuave’ẽ ramo kuave’ẽmby ojehapypáva térã ambue kuave’ẽmby,

9ha ndoguerúi ramo pe óga jojohuha rokẽ renondépe oikuave’ẽ hag̃ua pende Ruetépe g̃uarã, upe kuimba’e upévape ojejukava’erã hetãyguakuéra apytégui.

Ndojehejái oje’u tuguy

10Oimeraẽ kuimba’e Israelgua térã oimeraẽ kuimba’e tetã ambueygua oikóva ijapytépe, ho’u ramo oime haichagua tuguy, Che voi amoĩta che rova upe tapicha upéva rehe, ha ajukáta ichupe hetãyguakuéra apytégui.

11Opaite oikovéva rekove oĩ huguýpe, upévare Che ha’éma peẽme pemoĩ porã jevy hag̃ua pene ánga tuguy rupi, peikuave’ẽvo kuave’ẽmby renda ári.

12Upéicha rupi ha’éma Israel ñemoñarenguérape: Avavete pende apytégui ndo’uiva’erã tuguy, ni tetã ambueygua oĩva pende apytépe ndo’uiva’erã.

13Ha oimeraẽ kuimba’e Israelgua térã tetã ambueygua oikóva pende apytépe omoñuhã ramo mymba térã guyra ikatúva oje’u, oñeñohẽva’erã huguykue ha ojatyva’erã yvýpe.

14Mayma to’o oikovéva rekove oĩ huguýpe; upévagui, ha’éma Israel ñemoñarenguérape: Ndape’uiva’erã mba’eveichagua to’o huguykue reheve, mayma to’o rekove oĩguihína huguýpe; oimeraẽ kuimba’e térã kuña ho’úva tuguy, ojejukava’erã.

15Ha oimeraẽ Israelgua térã tetã ambueygua, ho’u ramo tymba omano reiva’ekue térã mymba ñarõ oñepehe’ãmbava’ekue, ojoheiva’erã ijaokuéra, ha ha’e ojahuva’erã, ha opyta iky’áva ramo kuarahy oike peve; uperire ae ipotĩ jevýta.

16Ha ndojohéiri ramo ijao, ni ndojahúi ramo, ogueraháta ijehe iñaña reko.