Salmokuéra 77 - Biblia en Guaraní - ?anderuete ?e’? Por? 2015

Asaf pensamientokuéra Ñanderuete rembiapo rehe

1Che ñe’ẽ rupive amba’ejerure asy Ñanderuetépe, ahenói ichupe cherendu hag̃ua.

2Ajepy’apyete jave aheka Ñanderuetépe, apytu’u’ỹre amopu’ã che po ichupe g̃uarã pyhare pukukuépe, ha che ánga noñemoangapyhyséi.

3Chemandu’a Ñanderuete rehe, chepyahẽ ha che ánga noñemoangapyhyséi. Selah

4Nde rejoko che resakuéra ropea ha ndaikatuvéi ake, ajepy’apy asýgui ndaikatuvéima añe’ẽ.

5Chemandu’a umi ára ymaguare rehe ha umi áño ohasamava’ekue rehe.

6Pyharekue chemandu’a che puraheikue rehe, che py’apýpe ajepy’amongeta’aína ha che pytu oñeporandu, he’ívo:

7Añete piko Ñanderuete opoiva’ekue orehegui tapia g̃uarã ha ndaoreporiahuverekosevéima.

8Opa piko ipy’aporã. Opa tapia piko iñe’ẽme’ẽmbyre iñemoñarenguérape g̃uarã.

9Hesaráima piko Ñanderuete iporiahuverekógui. Naorepytyvõsevéi piko ipochyeterei haguére. Selah

10Upéi che ha’éra’e: Ko’ã mba’e chemyangekõieterei, Ñanderuete reko ningo oñemoambuéma.

11Che katu añeha’ã chemandu’a jevy hag̃ua Ñanderuete rembiapokue rehe, ha imilagrokuéra ymaguare rehe.

12Ajepy’amongeta ha ama’ẽse mayma ne rembiapokue rehe.

13Nde, che Ruete, nde rape hekopete, moõ piko oĩne peteĩ Jára ndeichagua.

14Nde ningo ore Jára ojapóva mba’e techapyrãva (milagrokuéra) ha rehechaukáma nde pu’aka tetãnguéra apytépe.

15Nde pu’aka rupi reguenohẽ ne retãme, Jacóbo ha Jose ñemoñarenguérape, ijejopy vaígui. Selah

16Pe yguasu nderechávo, ore Ruete, oñemondyiete, ha oryryipa.

17Umi arai oñohẽ yeta, osunumba pe ára ha opa gotýo oho nde hu’ykuéra (aratiri).

18Pe arasunu hyapu yvytu jepokápe, nde aravera ohesapepa pe yvy apére, ha pe yvy oryrýi ha osusũmba.

19Yguasu rupi oho nde rape, Nde voi rembohape ichupekuéra haperã umi yetaha rupi, nde pyporekuéra katu avave ndohechái.

20Moises ha Aaron po rupi Nde reisãmbyhy ne retãme ovechakuéraicha.