Salmokuéra 106 - Biblia en Guaraní - ?anderuete ?e’? Por? 2015

Oñemoĩ hikuái Ñanderuetére

1 Alelúia, pemomba’eguasu Ñanderuetépe, imborayhu opytágui tapia g̃uarã.

2Mávapa omomba’eguasu porãkuaa Ñanderuete rembiapokuéra. Ha mávapa omyasãi porãkuaa héra porãite.

3Ovy’a umi heko potĩva ha umi ojapopáva hekoitépe opaite árape.

4Nemandu’amíkena cherehe, Nde, ore Ruete, pe mborayhu rerekóva ne retã rehe, ejumína cheandúvo ne ñepytyvõ reheve.

5Che ahecha hag̃ua umi mba’eporã rejapóva ne rembiporavokuérape g̃uarã, chepy’arory hag̃ua avei ne retã vy’a reheve, ha avy’a hag̃ua ne mba’e reheve.

6Ore reko vai ningo, ore rukuéraicha rojavy ha avei ore rembiapo ivai.

7Ore rukuéra Egíptope ndohechakuaaséi ne milagrokuéra, naimandu’aséi hikuái nde poriahuvereko rehe, opu’ã katu nderehe pe yguasu ypýpe, pe Yguasu Pytã (Mar Rójo) ypýpe.

8Nde katu, ore Ruete, reguenohẽva’ekue ichupekuéra ijejopy vaígui, Nde rehayhúgui ichupekuéra rehechauka nde pu’aka.

9Ñanderuete okorõi pe Yguasu Pytãme ha hypa, ha ombohasa ichupekuéra pe y oĩ hague rupi ku ñu ikã porã rupi ojehasa ramoguáicha.

10Ha oipe’a hesekuéra ija’e’ỹva pógui, ha oguenohẽ umi hesekuéra oñemoĩva pógui.

11Umi y oñu’ãmba umi hesekuéra ija’e’ỹvape, heseguáva nahembýi ni peteĩnte jepe.

12Upémaramo oguerovia hikuái Ñanderuete ñe’ẽngue ha ogueropurahéi ichupe ñemomba’eguasupópe.

13Pya’ete katu hesarái jevy hikuái hembiapokuéragui ha noha’ãrõsevéi hekombo’epy.

14Ha pe ñu perõme oñemoĩ hikuái heko yvyarigua rembipota vai poguýpe, ha upépe oipy’ara’ã hikuái Ñanderuetépe.

15Ha Ha’e ome’ẽ ichupekuéra upe ojerureva’ekue ipy’ajere peve ha upéi ombou hi’arikuéra ñemano.

16Umi Israelgua ipy’arasy Moises rehe ha oñemoĩ hese hekohápe ha Aaron rehe avei pe oñemboykemava’ekue Ñanderuetépe g̃uarã.

17Upémaramo pe yvy ojejurupe’a ha omokõ Datánpe, ha ojaho’i avei Abiram hogayguakuéra ndive.

18Ha tata hendy ijatyhápe ha ohapy umi tekove iñañávape.

19Ojapova’ekue hikuái peteĩ tóro ra’yrusu ra’ãnga Horébpe, ha oñesũ pe tóro ra’yrusu renondépe.

20Péicha omyengovia hikuái Ñanderuete reko ojajaipávape, peteĩ tóro ra’ãnga kapi’i’uha ra’ãngáre.

21Hesarái hikuái Ñanderuete pytyvõgui, mba’eguasuete ojapova’ekue hesekuéra Egíptope,

22tuichaite mba’e Cam yvýpe ojapova’ekue ha mba’e hechapyrãva oporomongyhyjetéva ojapova’ekue Ha’e pe pirity yguasúpe.

23Upévagui Ñanderuete ohundipase ichupekuéra, ndaipóri rire Moises, hembiporavopyréva ojerure asýgui hesekuéra, oñehundipava’erãmo’ã, iñembo’e porã rupi katu Ñanderuete opoi hembipotágui.

24Uperire ndoipotavéima hikuái pe yvy iporãitéva, ndogueroviasevéi hikuái iñe’ẽme’ẽngue.

25Ha oñe’ẽngururu katu hikuái hóga rymbapirekue peguápe, ha nohenduvéi Ñanderuete ñe’ẽ.

26Upévare Ñanderuete ohupi ipo oñe’ẽme’ẽvo ohundi hag̃ua ichupekuéra pe yvy perõme (desiértope).

27Ha omotĩndy hetãme ambue tetãnguéra apytépe, ha omosarambi ichupekuéra yvy ape rupi.

28Upéi oñemoirũ hikuái avei Baalpeor (ambue jára gua’u) rehe, ha ho’u hikuái umi kuave’ẽmby so’o oñekuave’ẽmava ambue járape.

29Upéicha hembiapo vai rupi ombopochy hikuái Ñanderuetépe, ha upévagui ñemanoguasu iñasãi ijapytepekuéra.

30Upérõ opu’ãva’ekue Finees ha ombojovake hekoitépe, ha upévagui opi pe mba’asy.

31Upévare Ñanderuete ohechakuaa Finees ojapóva, ha ohovasa ichupe iñemoñarenguéra ndive opaite árape.

32Avei ombopochy jevy hikuái Ñanderuetépe Meriba yvúpe, ha Moises ohasa vai ko’ãva rehehápe.

33Oñemoĩ hikuái tapia Ñanderuete Pytu Porã rehe, Moises ipochy ha ojavy avei iñe’ẽ rupi.

34Nohundíri hikuái avei umi tetã oikóva Canaan yvýpe, Ñanderuete he’i haguéicha ichupekuéra,

35ojehe’a uvei hikuái umi tetã rehe, ha oñepyrũ ojapo avei hembiapo vaikuéra.

36Omomba’eguasu hikuái ijára ra’ãngakuéra, upévarehe oñehundi hikuái.

37Oikuave’ẽ hikuái ita’ýra ha itajyrakuéra ambue járape g̃uarã.

38Ha oñohẽ hikuái heko potĩva ruguy. Ita’ýra ha itajyrakuéra ruguy oikuave’ẽ hikuái kuave’ẽmby ramo Canaan jarakuérape ha upévagui pe yvy oñemongy’a huguy rupi.

39Péicha oñemongy’a hikuái hembiapo vai rupi ha oñemboheko vaipa hikuái hi’angaipa rupi.

40Upévarehe Ñanderuete ipochy hetã ndive, ha ojeguaru Israélgui.

41Upévare Ha’e omoĩ ichupekuéra ambue tetãnguéra poguýpe ha oñembojára hesekuéra umi hese ija’e’ỹva.

42Umi hese ija’e’ỹva ojopy asy ichupekuéra ha ojepy’apy asy hikuái ipoguypekuéra.

43Upeichavéramo jepe Ñanderuete heta jevy oipytyvõ ichupekuéra, ha’ekuéra katu oñemoĩmoĩve ohóvo Ñanderuete rembipota rehe, oñemongy’ave ohóvo heko ñaña rupi.

44Upeichavéramo jepe, Ha’e oma’ẽ jevy hesekuéra ojepy’apy vaiete aja ha ohendu jevy imba’ejerure asy.

45Ñanderuete imandu’a jepi iñe’ẽme’ẽ rehe, ha oiporiahuvereko jevy jey, Ha’e ipy’a porãgui.

46Ha ohechauka ichupekuéra iporiahuvereko umi ija’e’ẽva hesekuéra renondépe.

47Orepytyvõmíkena, ore Ruete, ore Jára tee, ha orembyaty jevy (Israel retãme) umi tetã apytégui, romomba’eguasu hag̃ua nde réra porãite, ha vy’apópe romomba’eguasu jevýta.

48Toñemomba’eguasu Ñanderuete, Israel Járape, peteĩ ára atyguasu guive ambue ára atyguasu peve, ha mayma tetã te’i joaite: Taupéicha, amen, alelúia.