Isaías 29 - Biblia en Guaraní - ?anderuete ?e’? Por? 2015

Ariel ha umi hese ija’e’ỹva

1Angái Ariel, angái Ariel (Jerusalen), pe táva David oiko haguépe. Pembojoaju peteĩ áño ambue rehe, hi’aretekuéra reheve.

2Che katu ajopy vaíta Ariélpe, ha ipype oikóta ñembyasy ha jahe’o ha nde reikóta chéve g̃uarã Ariel (Ñanderuete leõ ramo).

3Romongoráta nde jere tuichakue javeve, romongoráta soldádo atyguasu reheve, ha amopu’ãta nde táva jere rehe umi óga yvate ñorãirõ reheguáva ambue tetã soldádo atýpe g̃uarã.

4Upérõ reñemotĩta, reñe’ẽta yvy guive ha ne ñe’ẽ osẽta yvy timbógui; ha ne ñe’ẽ yvýgui osẽva ojoguáta angue ñe’ẽme, peñe’ẽ guyguýtava yvy timbo guive.

5Ha umi nderehe ija’e’ỹva hetaitereíta ku yvy timbo hesa’ietévaicha, ha iñorãirõhára ojeitýta ko táva ári ku yvyra rogue pirukuéicha ovevéva yvytu rehe, upémaramo Ñanderuete sapy’aitépe oúta nepytyvõ hag̃ua.

6Ñanderuete voi oúta neandúvo ára sunu reheve, yvy ryrýi ha tyapuguasu reheve, yvytu jepoka ha yvytu hatãva reheve, ha tata rendy oporombokusuguéva reheve.

7Umi tetã ojeitýva Ariel ári ojopy vai hag̃ua iñorãirõ rembiporuguasu reheve ku képe ha techapáy pyhare peguáicha.

8Ha ojehúta ichupe ku iñembyahýiva ohecha ramoguáicha iképe ha’e okaruha, ha opáyvo ipy’a nandi gueteri; térã ku ijy’uhéiva ohecha ramoguáicha iképe ha’e hoy’uha, ha opáyvo ikane’õ ha ijy’uhéi gueteri; upeichaite ojehu umi tetã ojeitývape Jerusalen cérro ári.

Israel resatũ ha tova mokõi

9Pema’ẽ ha ndapehechái mba’eve, pejesaupi peneresatũ hag̃ua, peẽ pevava peka’úvaicha, ndape’úi ramojepe víno térã ambue mba’e oporomonga’úva.

10Ñanderuete oñohẽ pendeári peteĩ pytu penembohopehýiva ha Ha’e voi omboty pende proféta resa, ha Ha’e omoypytũ penehekombo’éva akã.

11Ko’ág̃a guive opaite pende techapáy noñemohesakãmo’ãvéima, opyta reietéta peẽme g̃uarã ku kuatiañe’ẽ oñembotývaicha. Ha peme’ẽ ramojepe pe kuatiañe’ẽ oñembotýva peteĩ omoñe’ẽkuaávape, he’íta peẽme: Ndaikatúi amoñe’ẽ peẽme ko kuatiañe’ẽ oñeñapytĩ su’úgui.

12Ha peme’ẽ ramo pe kuatiañe’ẽ peteĩ omoñe’ẽkuaa’ỹvape, ha peje ramo ichupe: Emoñe’ẽ kóa, ha’e he’íta: Namoñe’ẽkuaái.

13Upévare Ñanderuete he’i: Ko tetã kóva oñemboja che rendápe ijurúpente, ha chemomba’eguasu hembépente, ipy’apýpe katu oñemomombyry chehegui, ha okyhyje chehegui yvyariguakuéra rembiapoukapy rupínte.

14Upévare Che ahechaukáta ko tetã kóvape tembiapo techapyrãva oporomongyhyjéva; opa rei hag̃ua umi iñarandúva arandu, ha ogue hag̃ua iñakã porãva.

15Angái, angái umi okañýva Ñanderuetégui ha oñomiséva ichugui umi mba’e oguerekóva iñakãme, iñypytũháme ojapo hembiapokuéra, ha he’i hikuái: Máva piko orerecha, ha máva piko orekuaa.

16Peẽ pendetavy, ojogua piko pe ñay’ũ kambuchi apoharépe. He’ínepa pe ñay’ũ kambuchi apoharépe: Nde ndacheapói. He’ínepa pe tembiapo ijapohare rehe: Ha’e ndoikuaái mba’eve.

Israel perdon

17Hi’ag̃uietereíma Libanógui oiko hag̃ua peteĩ kokue hi’a porãva, ha ikokue hi’a porãva ojoguáta ka’aguy porãme.

18Upe ára upévape umi ijapysapéva ohendu porãva’era ko kuatiañe’ẽ; ha umi hesatũva ohecha porãva’erã iñypytũha guive.

19Upéramo umi oñemomirĩva horyeteva’erã Ñanderuete ndive, ha umi imboriahuetéva jepeve tetãyguakuéra apytépe ipy’arory joáta Israel Jára ndive.

20Umi oporojopýva opáta, ha umi oñembohorýva oñehundipáta, ha ojejukava’erã umi ojaposéva mba’evaínte,

21umi oporombotavýva ha ijapúva táva rokẽguasúpe, oñembojovakehápe, ombotavy hag̃ua umi oporombojovakéva ombojovake vai hag̃ua, umía omanombáta avei.

22Upévare Ñanderuete oipytyvõva’ekue avei Abrahámpe, péicha Ha’e he’i Israelguakuérape: Ko’ág̃a Israel noñemotĩmo’ãvéi, ha hova ndahesa’yjupamo’ãvéi;

23Israel ñemoñarenguéra ohechakuaa vove che po rembiapokue ombotuicháta che réra; ha omomba’eguasúta Jacóbo Heko porãitéva, ha okyhyjéta Israel Járagui.

24Ha umi ko’ág̃a hi’angapýpe ojejavýva, iñakã porãta, ha umi oñe’ẽguyguy vaíva ko’ág̃a, oñemohekombo’e porãmbáta.