Josue 17 - Biblia en Guaraní - ?anderuete ?e’? Por? 2015

1Ojeity po’a jeporavo Manases tríbupe g̃uarã, ha’e Jose ra’y ypykue. Manases ra’y ypykue, Maquir, kóa Galaad ru. Maquir peteĩ kuimba’e ipy’aguasúva ha oñeme’ẽ ichupe Galaad ha Basan imba’e ramo.

2Ha ojeity avei po’a jeporavo ambue Manases ra’ykuérape g̃uarã hogaguasu heta háicha, umía ha’e Abiezer, Helec, Asriel, Siquem, Hefer ha Semida; ko’ãva Manases ra’y, Jose ra’yre, hogaguasukuéra rupi.

3Ha Zelofehad, Hefer ra’y, Galaad ra’yre, Maquir ra’yre, Manases ra’yre katu, ndaita’ýrai, itajýramante, péicha hína herakuéra: Maala, Noa, Hogla, Mílca ha Tirsa.

4Ko’ãva ou pa’i Eleazar ha Josue, Nun ra’y ha karai ancianokuéra rendápe ha he’i ichupekuéra: Ñanderuete he’íkuri Moiséspe ome’ẽ hag̃ua avei oréve peteĩ yvy pehẽngue ore pehẽnguekuéra apytépe. Ha Jose ome’ẽ ichupekuéra ijyvyrã ipehẽnguekuéra apytépe, Ñanderuete he’i haguéicha.

5Péicha Manases tríbupe g̃uarã oñeme’ẽ 10 yvy pehẽngueguasu imba’erã ramo ha hi’ári Galaad ha Basan yvy, opytáva pe Jordan mboypýri (Jordan rembe’y asúpe).

6Upéicha oñeme’ẽ avei Manases rajykuérape ijyvy ita’yrakuéra apytépe; ha Galaad yvy opytákuri ambue Manases ra’ýpe.

7Ha Manases yvy ojepyso Aser yvy guive Micmetat peve, opytáva Siquem rovái, ha oho sur gotýo Tapúa ypy peve.

8Pe táva Tapúa Efrain mba’e; pe yvy ijerekuévo katu opyta Manaséspe g̃uarã.

9Ijyvy rembe’y oguejy Cana yakã (arróyo) meve. Ko’ã Efrain táva opyta ko yakã sur gotýo, Manases tavakuéra pa’ũme; ha Manases yvy rembe’y opyta ko yakã nórte guive, ho’a peve Yguasu Mediterráneope.

10Efrain opyta sur gotýo, ha Manases nórte gotýo, ha hembe’y pe yguasu; ha oja Aser yvy rehe nórte gotýo, ha Isacar yvy rehe kuarahyresẽ gotýo.

11Ha Manases oguereko avei Isacar ha Aser yvýpe ko’ã táva: Betsean ha itava’ikuéra, Ibleam ha itava’ikuéra, Dorgua tava’ikuéra, Endorgua tava’ikuéra, Taanacgua tava’ikuéra, ha Meguidoygua tava’ikuéra ko’ã mbohapy táva paha opyta mbohapy cérro michĩva ári.

12Ha Manases ñemoñarenguéra ndaikatúi omosẽ Canaanguakuérape ko’ã 4 táva tuichávagui (itava’ikuéra katu ho’a Israelguakuéra pópe), upévare Canaanguakuéra oñemoĩ Israelgua rehe.

13Israel ñemoñarenguéra katu oñemombarete porã rire oheja umi Canaangua oiko hembiguái ramo ha nomosẽvéi ichupekuéra.

14Ha umi Jose ñemoñare oñe’ẽ Josuépe, ha he’i: Mba’érehepa peme’ẽra’e oréve peteĩ po’a jeporavo rupínte peteĩ yvy pehẽngueguasu ore mba’erã ramo, ore ningo peteĩ tetã tuicháva, ha Ñanderuete orerovasa porãgui ko ára kóva peve, roikotevẽve yvy rehe.

15Ha Josue he’i ichupekuéra: Oime ramo peẽ peteĩ tetã tuicháva, ha pende yvy imichĩ ramo tapeho umi Ferezgua ha Refaygua ka’aguýpe ha peity ika’aguy pene mba’erã ramo.

16Ha umi Jose ñemoñare he’i: Ko ka’aguy ndaorerupitypamo’ãi; ha mayma Canaangua oikóva ñuguasúpe, oguereko cárro hierroguiguáva; umi Betseangua ha itava’ikuérape, ha umi oikóva Jizreel cerrokuéra pa’ũme avei.

17Upéramo Josue he’i jevy Jose rogayguakuérape, Efrain ha Manaséspe: Peẽ peteĩ tetã tuicháva, ha peẽ penembarete ramo natekotevẽi pepyta peteĩ yvy pehẽngueguasúpente.

18Pende ka’aguy ha penderehe ija’e’ỹva ka’aguy ituicha, upévare peity ha peguerekóta heta kokue rendag̃ua, ha uperire katuete pembopoguýta avei umi Ferezgua ha Refayguakuérape, oguereko ramo jepe cárro hierroguiguáva ha imbarete ramojepe hikuái.