Ezequiel 34 - Biblia en Guaraní - ?anderuete ?e’? Por? 2015

Marandu Israel rerekua hekope’ỹva rehe

1Ou chéve Ñanderuete ñe’ẽ ha he’i:

2Kuimba’e ra’y, emomarandu umi Israel rerekuápe; eprofetiza ha ere ichupekuéra: Péicha he’i pende Ruete: Angái, angái umi Israel rerekua rehe, oñangarekóva ijehénte. Umi ovecha rerekua noñangarekovéima ijovecha aty rehe.

3Pe’u ikamby, peñemonde haguekuépe, ha ikyramivévante pejuka katu, napeñangarekói che ovecha aty rehe.

4Napemombaretéi umi ikangývape ha napeipohãnói umi hasývape; ndapejokuái hetyma upe opẽvape, ndapegueruvéi atýpe pe oñemomombyrymava’ekuépe, ndapehekái pe okañyva’ekuépe, peikónte peñembojára hesekuéra mbaretepópe ha peikosénte pende reko vaípe.

5Che ovechakuéra oñemosarambipa, avave noñangarekóigui hesekuéra, ha oiko hikuái umi mymba ñarõ ñu rupigua rembi’u ramo.

6Okañymba che ovechakuéra cérro rupi ha umi cérro yke ijyvateha rupi; ha che ovechakuéra oñemosarambipa opaite yvy apére, ha ndaipóri avave ohekáva térã oñangarekóva hesekuéra,

7upévare peẽ, herekuakuéra, pehendúke pende Ruete ñe’ẽ:

8Che rekovére, he’iuka pende Ruete, che ovecha aty oñemondapágui ha oikopágui mymba ñarõ ñu rupigua rembi’u ramo, oikógui hikuái herekua’ỹre; ha umi che rerekua ndohekái che ovechakuérape, oikónte uvei oñeñangareko ijehe, ha noñangarekói che ovechakuéra rehe;

9upévare, peẽ herekuakuéra, pehendúke pende Ruete ñe’ẽ,

10péicha he’iuka peẽme pende Ruete: Pema’ẽ porãke, Che apu’ãta umi herekuakuéra rehe, ha ajeruréta ipoguikuéra che ovechakuéra ruguy, ha ahaviráta ichupekuéra noñangareko porãi haguére Che ovechakuéra rehe; oñeñangarekógui ijehénte, Che aguenohẽta che ovechakuéra ijurukuéragui, ha ndoikomo’ãvéima hembi’urã ramo.

11Upévare péicha he’i pende Ruete: Peikuaa porãke, Che voi aháta aheka che ovechakuérape ha añangarekóta hesekuéra.

12Ku ovecha rerekua porã oikuaa háicha umi ñu ijovechakuéra isarambi haguérupi, upéicha avei Che aikuaa che ovechakuéra oĩháme, ha asalváta oñemosarambipa haguégui, ou vove pe pytũ ha ijaraipaha ára.

13Ha Che aguenohẽmbáta ichupekuéra umi tetã apytégui, ha ambyaty jevýta agueru hag̃ua ichupekuéra ijyvyteépe, ha upépe Che añangarekóta hesekuéra Israel cerrokuéra rehe, umi y rembe’y rupi, ha oikóta hikuái hetã tuichakue rupi.

14Ikapi’ipe porãha rupi añangarekóta hesekuéra, ha Israel cérro ijyvateha yke rupi opytu’úta ha añangarekóta hesekuéra Israel cérro hovyũ ha iporãveha rupi.

15Che añangarekóta che ovechakuéra rehe, ha Che amombytu’úta ichupekuéra, he’i pende Ruete.

16Che ahekáta upe okañývape, ha agueru jevýta korapýpe upe osẽ reiva’ekuépe ijatýgui, ajokuáta hetyma opẽva’ekuépe, ha amombaretéta ikangývape; ahundita katu umi ikyra ha imbaretévape; hekoitépe añangarekóta ambuekuéra rehe.

17Ha peẽ che ovechakuéra, péicha he’i pende Ruete: Pema’e porãke, Che ambojovakéta peteĩteĩ che rymba ovecha mácho ha kavara mácho apytépe.

18Naiporãi peẽ pe’u pe kapi’i iporãitéva ha uperire pepyrũmba gueteri pe hembýva rehe; ha pey’u rire y sakã porã, pembotyai pendepýpe pe hembýva.

19Ha che ovechakuéra ho’únte pe kapi’i pende py opyrũmbamava’ekue, ha hoy’únte pe y pende py ombotyaiva’ekue,

20upévare pende Ruete péicha he’i peẽme: Peikuaa porãke, Che ambojovakéta che ovecha ikyra ha ipirúvape.

21Pende ati’ýpe pemyaña ijykéguio, ha pene ratĩme peikutu umi ikangývape, peity ha pemosarambipa peve.

22Che asalváta che ovechakuérape, ha araka’evéma noñemondamo’ãvéi; ha che ovechakuéra apytépe ambojovakéta hekoitépe.

23Ha amoĩta hi’arikuéra peteĩ herekuarã; ha Ha’e oñangareko porãta hesekuéra; amopu’ãta che rembiguái Davídpe, ha ha’e oikóta iñangarekoha ramo.

24Che, pende Ruete, aikóta Ijaraite ramo ha che rembiguái David oikóta ijapytépe mburuvichaguasu ramo, Che, pende Ruete, ha’éma ko’ã mba’e.

25Che aikóta hendivekuéra peteĩ ñe’ẽme’ẽ py’aguapy reheguávare, ha aipe’áta yvy ape árigui umi mymba ñarõ; ha oiko porãta hikuái okyhyje’ỹre, opárupi ha ka’aguy mbytépe jepe okéta hikuái py’aguapýpe.

26Ahovasáta ichupekuéra ha ijyvy, ha amboúta pe ama hi’araitépe; ama ojehovasapyréva.

27Ha upe ñu rupigua yvyra hi’a porãta ha upéicha avei ikóga, ha py’aguapýpe oikóta hikuái ijyvyteépe, ág̃a amondoho vove umi tukumbo icangálla reheguáva, aguenohẽta ichupekuéra umi ojopýva poguýgui, upépe ae oikuaa porãta hikuái Che Ijarateeha.

28Ha ambue tetãnguéra ndoikemo’ãvéi ijyvýpe omonda hag̃ua, mymba ñarõnguéra yvy ape arigua ndo’umo’ãvéi ichupekuéra; oikóta katu hikuái kyhyje’ỹme, ha ndaiporimo’ãi avave omondýiva ichupekuéra.

29Ha upéramo Che amopu’ã porãta hemitỹnguéra, ha hetãme avave nomanomo’ãvéima ñembyahýigui, ha ndoikomo’ãvéi ñembohoryha ramo ambue tetãnguérape g̃uarã.

30Upéramo oikuaáta hikuái Che Ijára tee aĩtaha hendivekuéra, ha Israelguakuéra che retãha, he’i pe Oikovéva tapia g̃uarã.

31Ha peẽ, che ovechakuéra, Che añangarekóta penderehe pe ñu porãme, yvyariguakuéra ningo peẽ, Che katu pende Jára, he’i pende Ruete.