1Oikova’ekue Uz retãme peteĩ kuimba’e hérava Job. Ko kuimba’e kóva heko porã ha heko potĩva. Ha’e okyhyje Ñanderuetégui ha upévare opia opaichagua mba’evai apógui.
2Job ita’ýra 7 ha itajýra mbohapy.
3Ha hymbakuéra reta: 7.000 ovecha ha kavara, 3.000 caméllo, 500 guéi joaju (yúnta), 500 búrro kuña. Ha hetaite hembiguái. Upéicha rupi ha’e pe kuimba’e imba’eretavéva mayma kuarahyresẽ gotyoguáva.
4Ha ita’yrakuéra ojapómi karuguasu hogakuérape, peteĩteĩva hi’ára mbotýpe (icumpleáñope); ha’ekuéra ohenoiuka jepi heindy mbohapyvévape, okaru ha omboy’u hag̃ua hendivekuéra.
5Ha ohasa rire umi karuguasu ára, Job ohenói ichupekuéra ombohekopotĩ hag̃ua. Ha Job opu’ã pyharevete oikuave’ẽ hag̃ua kuave’ẽmby ojehapypáva peteĩteĩva rehe. Job he’ígui ipy’apýpe: Ikatúntemo oime hembiapo vaíra’e che ra’ykuéra, ha oñe’ẽvai mba’e Ñanderuete rehe ipy’apýpe. Péicha Job ojapo jepi tapiaite hesehapekuéra.
6Peteĩ árape Ñanderuete ra’ykuéra oñemboja Ñanderuete renondépe ha ou avei hendivekuéra Satana (aña).
7Ha Ñanderuete he’i Satanáme: Mamóguipa reju. Ha Satana ombohováivo Ñanderuetépe, he’i: Ajere yvy apére ha aguata aikóvo hyepýre.
8Ha Ñanderuete he’i Satanáme: Nderejesarekóipara’e che rembiguái Job rehe, ndaipóri ambue ha’eichagua yvy apére, kuimba’e heko porã ha heko potĩva, okyhyjéva Ijapoharégui ha opiáva opaichagua mba’evai apógui.
9Ha Satana ombohovái Ñanderuetépe: Job piko okyhyje rei mba’e ndehegui.
10Neremo’ãi piko ichupe ku korapy jere yvatéicha ha reñangareko hóga ha opaite mba’e oguerekóva rehe. Rehovasa avei opaite hembiapokue ha opaite imba’erepy oñemboheta hetave ohóvo.
11Eipyso katu nde po ha epoko opaite mba’e oguerekóva guive rehe, ha rehecháta katuete opoitaha ndehegui.
12Ha Ñanderuete he’i Satanáme: Péina ápe, opaite mba’e ha’e oguerekóva guive oĩmbaite nde pópe; hekovére katu ani repoko. Ha Satana osẽ Ñanderuete renondégui.
13Ha peteĩ árape ita’ýra ha itajyrakuéra oñembyaty jave ityke’ýra ypykue rógape,
14ou sapy’a Job rembiguái peteĩva hendápe, ha he’i ichupe: Gueikuéra oara joa jave, ha burrokuéra okaru joa jave avei ijypypekuéra,
15og̃uahẽ umi Sabaygua ha oguerahapa ne rymbaita ha ojukapa che irũnguérape kyse puku hãimbépe, che añoiténte akañykuaa ajúvo amombe’u hag̃ua ndéve.
16Kóva oñe’ẽ jave gueteri hína, og̃uahẽ ambue hembiguái he’íva: Ñanderuete rata ho’a áragui ha ohapypa nde ovecha ha kavarakuérape, ha umi hese oñangarekóvape ombokusuguepa avei pe tata, che añoite cheremby ha aju amombe’u hag̃ua ndéve umi mba’e ojehúva.
17Ha oñe’ẽ aja gueteri hína kóva, ou ambue he’íva: Umi Caldeaygua oñembyaty mbohapy atýpe, ha ojeity umi caméllo ári ha oguerahapa hikuái ne rymbakuéra ha ne rembiguaikuérape katu ojukapa kyse puku hãimbépe; cheñoiténte akañy ha aju amombe’u hag̃ua ndéve.
18Ha oñe’ẽ gueteri hína kóa, ou ambue he’íva: Nde ra’y ha nde rajykuéra okaru ha omboy’u joa jave víno ityke’ýra tenondeguáre rógape,
19ou peteĩ yvytu hatãva ha oipeju hóga irundyve yke rehe, ha pe óga ho’a nde ra’ykuéra ha nde rajykuéra ári, ha omanomba hikuái, ha che añoiténte akañy amombe’u hag̃ua ndéve.
20Upémaramo Job opu’ã, omondoro ijaokuéra, omoperõ iñakã, oñesũ yvýpe ha oñembo’e Ñanderuetépe,
21he’ívo: Opívo asẽva’ekue che sy ryégui, ha opívo aha jevýta, Ñanderuete ome’ẽmba ha Ha’e oipe’apa, amomba’eguasu Ñanderuete réra.
22Opaite ko’ã mba’ére Job noñemohembiapo vaíri (noñemoangaipái) ha nde’íri mba’eve ivaíva Ñanderuete rehe.
Who We AreWhat We EelieveWhat We Do
2025 by iamachristian.org,Inc All rights reserved.
