Deuteronómio 2 - Biblia en Guaraní - ?anderuete ?e’? Por? 2015

Umi áño

jehasa desiérto

pe

1Upéi jajere ha ñasẽ desiérto gotýo, Yguasu Pytã rape gotýo, Ñanderuete he’i haguéicha chéve, ha jajere Seir cérro rehe heta ára pukukue.

2Ha Ñanderuete oñe’ẽ chéve, he’ívo:

3Hetaitéma pejere ko cérro rehe; pejere ha tapeho nórte gotýo.

4Ha ere tetãyguakuérape: Peẽ pehasávo Seir rupi, pene pehẽngue Esau ñemoñarenguéra retã rupi, ha’ekuéra okyhyjéta pendehegui; peẽ katu peñeñangareko porãke pendejehe.

5Ani peñemoĩ hesekuéra, name’ẽmo’ãigui peẽme ijyvýgui peteĩ pehẽnguemínte jepe, Che ame’ẽgui Seir cerrokuéra Esaúpe imba’etee ramo.

6Pejoguáta ichuguikuéra pirapire rehe hi’upy pe’u hag̃ua, pejoguáta avei ichuguikuéra y pey’u hag̃ua;

7Jahve, pende Ruete, penderovaságui opaite pene rembiapópe; Ha’e oikuaa porã opaite mba’e peẽ peikotevẽtava desiértope; ko’ã 40 áño pukukue Ñanderuete oikóma penendive, ha mba’eve ndofaltái peẽme.

8Ha jahasa mombyry ñane pehẽngue Esau ñemoñarenguéra retãgui, oikóva Seir cerrokuérape, Elat ha Esiongéber guive jaguata Moab desiérto pegua rape rupi.

9Ha Ñanderuete he’i chéve: Ani remyangekõi Moábpe, ha ani peñorãirõ hendive, name’ẽmo’ãigui peẽme ijyvy; Che ame’ẽgui Ar yvy Lot ñemoñarenguérape, imba’etee ramo.

10Umi Emgua oiko ypyva’ekue ipype, tetãyguakuéra tuichaite ha hetáva, ha ijyvate Anac ñemoñarenguéraicha.

11Ichupekuéra ojeguerekóva kuimba’e tuichaitéva ramo, Anac ñemoñarenguéraicha; ha Moabguakuéra ombohéra umívape: Emguakuéra (tekove oporomongyhyjéva).

12Ha Seírpe oikova’ekue ymave umi Horgua, Esau ñemoñarenguéra katu omosẽva’ekue ha omosarambipava’ekue ichupekuéra, ha upéi oiko hikuái hendaguépe. Upéicha Israel ojapo avei pe yvy rehe, Ñanderuete ome’ẽmava ichupekuéra.

13Pepu’ã ha pehasa Zéred yakã rupi. Ha péicha jahasa Zéred yakã.

1438 áño jaiporu jahasa hag̃ua Cadesbarnéa guive Zéred yakã meve; omanomba hag̃ua umi oñemoĩva’ekue Ñanderuete rehe, Ha’e he’i haguéicha ichupekuéra.

15Ha Ñanderuete po ou hi’ári ohundi hag̃ua ichupekuéra, omanomba peve.

16Ha omanomba rire isoldadokuéra hetãyguakuéra apytégui,

17Ñanderuete oñe’ẽ chéve, ha he’i:

18Nde rehasáta ko árape Moab retãgui Ar yvýpe.

19Ha reñemoag̃uívo Amon ñemoñarenguéra rehe, ani remyangekõi ichupekuéra, ha ani reñorãirõtei hendivekuéra; name’ẽmo’ãigui peẽme Amon ñemoñarenguéra yvy pene mba’e ramo, ame’ẽmava’ekue Lot ñemoñarenguérape imba’etee ramo.

20Upépe oikova’ekue avei umi kuimba’e ijyvatetéva (gigánte) ha Amonguakuéra omboherava’ekue ichupekuéra Zomzomgua.

21Ko’ã tetãygua ituicha, heta ha ijyvateteva’ekue, Anac ñemoñarenguéraicha; Ñanderuete katu ohundi ichupekuéra Amonguakuéra renondépe. Péicha ojehu ichupekuéra, ha Amonguakuéra oiko hendaguépe.

22Upéicha Ñanderuete ohundi avei Horguakuérape, oikova’ekue Seírpe, omohenda hag̃ua hendaguépe Esau ñemoñarenguérape.

23Ha Avguakuéra oikomiva’ekue itava’ikuérape Gáza peve; umi Caftorgua katu, og̃uahẽvo Caftórgui, ohundi ichupekuéra, ha oiko avei hikuái hendaguépe.

24Pepu’ã, pesẽ ha pehasa Arnon yakã (arróyo) rupi; péina ápe, amoĩ pende pópe Sehon, Amorgua retã ruvichápe oikóva Hesbónpe ha peñepyrũ peñemomba’e hese, pejeitývo hi’ári.

25Ko árape añepyrũta amongyhyje ha amondýita pendehegui mayma tetãyguakuéra oĩva guive ára guýpe, ohendúvo hikuái pene rerakuãguasu, oryrýi ha ipy’atarováta pene renondépe.

Israel ojapo sarambi Sehon rehe

26Ñe’ẽ py’aguapy amondókuri ñe’ẽ rerahahára rupi Cademot desiérto guive Sehónpe, Amor retã ruvicha, oikóva Hesbónpe, péicha ha’euka ichupe:

27Ehejána tahasa ne retã rupi, tape rupínte ahasase, añemboyke’ỹ rehe akatúa ni asu gotýo.

28Che rembi’urã ha’útava ajoguase ndehegui pirapire rehe; avei pe y hay’útava pirapire rehe reme’ẽta chéve; ahasa hag̃ua ne retãpy rupi.

29Ojapo haguéicha cherehe Esau ñemoñarenguéra oikóva Seírpe ha Moabguakuéra oikóva Ar yvýpe; rohasa peve pe Jordan mboypýri, pe yvy Jahve, Ñanderuete, ome’ẽtavape ñandéve.

30Ha Sehon, Amorgua retã ruvicha oikóva Hesbónpe, ndoipotáikuri rohasa hetãpy rupi; Jahve, Ñanderuete katu ombopy’a hatã ichupe oity hag̃ua ichupe ipo rupi, ha ijyvy opyta hag̃ua pene mba’e ramo.

31Ha Ñanderuete he’i chéve: Péina Che añepyrũma amoĩ nde poguýpe Sehónpe, hetã reheve; eñepyrũ katu eñemomba’e ijyvýre opyta hag̃ua pene mba’etee ramo.

32Ha osẽ Sehon ha mayma hetãyguakuéra ndive, ojeity hag̃ua ñande ári Jaháspe.

33Ha Ñanderuete oity ichupekuéra ñane renondépe jajapo hag̃ua sarambi ichuguikuéra, ita’yrakuéragui ha mayma hetãyguakuéragui.

34Ñambopoguy rire itavakuérape, ñahundipaite itáva, kuimba’e, kuña ha imitãkuéra jepeve; ndajahejái oikove peteĩnte jepe.

35Hymbakuéramante jagueraha ñane mba’erã ramo, ha avei umi mba’erepy jajapyhyva’ekue itavakuéragui.

36Aroer guive, opytáva Arnon yakã rembe’ýpe, Galaad peve, opaite tavakuéra Jahve, Ñanderuete omoĩmbaite ñande pópe.

37Amon ñemoñarenguéra retãmemante ndajaikéi; ha umi táva oĩva Jaboc yakã rembe’y rupiguápe, ha umi oĩva pe cérro rupiguápe, ñande ndajaikéi, Ñanderuete ndoipotáigui.