1Ñanderuete oñe’ẽ Moiséspe, ha he’i:
2Eñe’ẽ Israel ñemoñarenguérape ha ere ichupekuéra: Pe kuña imembyramóva peteĩ kuimba’e, naipotĩriva’erã 7 ára pukukue; pe kuña mba’asy hi’are háicha naipotĩri gueteri.
3Pe ára 8-hápe oñekytĩ’ova’erã pe mitãkuimba’e pire’i.
4Ha pe kuña imembyva’ekue oha’ãrõta 33 ára oñemopotĩ jevy hag̃ua huguýgui; ndopokoiva’erã umi mba’e oñemboykemava’ekue rehe pende Ruetépe, ha ndohomo’ãi pe óga jojohuha rendápe og̃uahẽ meve pe ára ha’e ipotĩ jevytaha.
5Ha imemby ramo peteĩ kuña, naipotĩriva’erã mokõi semána pukukue, ku kuña mba’asy ramoguáicha, ha oha’ãrõ 66 ára pukukue oñemopotĩ jevy hag̃ua huguýgui.
6Ha oñembotývo iñemopotĩha arakuéra, imemby kuimba’e térã imemby kuña ramo, ogueruva’erã peteĩ ovecha ra’y oguerekóva peteĩ áño kuave’ẽmby ojehapypava’erãva ramo, ha peteĩ jeruti térã peteĩ pykasura’y kuave’ẽmby angaipa reheguáva ramo, pe óga jojohuha rokẽ renondépe, pa’i rendápe.
7Ha umía ha’e oikuave’ẽta pende Ruete renondépe, ojapo hag̃ua hese kuave’ẽmby angaipa reheguáva ha ipotĩ jevýta huguy oñehẽva’ekuégui. Kóa ningo tembiapoukapy imemby ramo kuimba’e térã kuñáme g̃uarã.
8Ha ndoguerekói ramo peteĩ ovechara’y repy, upéicharamo ojapyhyva’erã mokõi jeruti térã mokõi pykasura’y, peteĩ kuave’ẽmby ojehapyva’erãva ha ambue kuave’ẽmby angaipa reheguáva ramo, upéicha pe pa’i omoĩ porãta ichupe ha pe kuña ipotĩ jevýta.
Who We AreWhat We EelieveWhat We Do
2025 by iamachristian.org,Inc All rights reserved.
