Ester 3 - Biblia en Guaraní - ?anderuete ?e’? Por? 2015

Aman oñeha’ãmba ohundi hag̃ua opaite Judayguakuérape

1Ko’ã mba’e rire tetã ruvicha Asuéro ombotuicha Aman, Hamedata ra’ýpe, ha’e ningo peteĩ Agaggua, ha omomba’eguasu ichupe ha omoĩ ichupe opaite ambue mburuvichakuéra hendive oĩva ári.

2Ha opaite tetã ruvicha rembiguaikuéra oĩva guive tetã ruvicha rokẽme oñesũ joava’erã ha oñakãity joava’erã Aman renondépe, upéicha tetã ruvicha he’iukágui; Mardoquéo katu noñesũi ni noñemomirĩri henondépe.

3Ha tetã ruvicha rembiguaikuéra oĩva pe okẽme oporandu Mardoquéope: Mba’érehepa nderejapói tetã ruvicha he’iva’ekue.

4Ha ko’ẽ ko’ẽre oporandu hikuái ichupe, ha’e katu nopenái, upévare omombe’u hikuái Amánpe, ojehecha hag̃ua Mardoquéopa oñemohatãta iñe’ẽme; Mardoquéo he’íguima ichupekuéra ha’e Judayguaha.

5Pe karaiguasu Aman ohechávo Mardoquéo ndojapoiha mba’eve ramo ichupe, noñesũi haguére, ipochyeterei.

6Ha mba’e michĩ ichupe omoĩ hag̃ua ipo Mardoquéo rehe añónte, oñemombe’úguima ichupe mba’eichagua tetãyguápa hína Mardoquéo, upévare Aman oñeha’ã ohundipa hag̃ua opaite Judayguakuérape, oĩva guive Asuéro retãguasúpe.

7Pe jasy peteĩháme, péva hína Nisan (Abril), pe tetã ruvicha Asuéro oisãmbyhývo 12 áñoma ojeitýkuri Pur, péva hína pe po’a jeporavo, Aman renondépe; po’a jeporavo rupi Aman oikuaase araka’épa iporãve ojapo hag̃ua umi mba’e oguerekómava iñakãme, ha pe po’a ho’a pe jasy 12-hápe, péva hína Adar (Márzo).

8Ha Aman he’i tetã ruvicha Asuérope: Oĩ peteĩ tetã oñemyasãi ha oñemohendava’ekue tetãnguéra apyte rupi ha ne retãguasu tuichakue rupi, ha hembiapoukapy iñambue opaite ambue tetãnguéra mba’égui, ha ndojapói hikuái tetã ruvicha rembiapoukapy, ha mba’eve iporãva ndoguerúi tetã ruvichápe ojeheja hag̃ua oikove hikuái.

9Tetã ruvicha, oipota ramo, tomoĩ tembiapoukapy ramo oñehundipa hag̃ua umívape, ha che ame’ẽta 335.000 kílo pláta (óro morotĩ) ne mba’erepy ñangarekohárape, ojegueru hag̃ua tetã ruvicha rógape oñeñongatuhápe ne mba’erepyeta.

10Upémaramo tetã ruvicha oipe’a ikuãirũ ikuãgui, ha ome’ẽ Aman, Hamedata ra’ýpe, ha’e ningo peteĩ Agaggua, pe Judayguakuéra rehe ija’e’ỹva,

11ha he’i ichupe: Pe pláta reme’ẽséva topytapa ndéve, upeichavéramo ejapopa pe tetã pévare rejaposéva guive.

12Upémaramo oñehenói tetã ruvicha kuatiañe’ẽ haiharakuérape pe jasy peteĩha, ha pe ára 13-hápe ohai hag̃ua kuatia rehe opaite mba’e Aman he’íva guive, ha oñemondo hag̃ua umi tetã ruvicha mburuvichakuérape, soldádo aty ruvichápe ha umi tetã ambueygua ruvichakuérape oĩva guive Asuéro poguýpe. Umi kuatiañe’ẽ ojehai opaite tetã ñe’ẽteévape ha tetã ruvicha Asuéro ofirma ikuãirũme (osella) pe kuatiañe’ẽ péva.

13Ha oñemondo umi kuatiañe’ẽ tetã ruvicha remimondo rupi opaite tetãnguérape, ha he’iuka ipype ojejuka ha oñehundi hag̃ua opaite Judayguakuéra taha’e mitãrusu, tujakuéra térã kuñakuéra, pe ára 13-hápe, pe jasy 12-hápe, péva hína pe jasy Adar (Márzo), ojejukava’erã opaite Judayguakuérape, ha oñemomba’ epava’erã hikuái imba’erepykuéra rehe.

14Mokõi jevy ojehai ko kuatiañe’ẽ rembiapoukapy tetãnguéra ñe’ẽteépe, peteĩ kuatiañe’ẽ rembiapoukapy opyta Súsape ha pe ambue kuatiañe’ẽ oñemondo opaite tetãme oĩva guive Pérsia poguýpe, pe jejukaguasu oiko hag̃ua peteĩ araitépe.

15Tetã ruvicha Asuéro he’iuka pya’e pya’e ojegueraha hag̃ua ikuatiañe’ẽ rembiapoukapy, Súsagui, opaite tetãnguérape. Pe tetã ruvicha ha Aman katu ho’u víno oĩ jave jepy’apyguasu Súsa tavaguasúpe.