Deuteronómio 21 - Biblia en Guaraní - ?anderuete ?e’? Por? 2015

Porojukahára jekuaa’ỹva

1Ha peike rire pe yvýpe Ñanderuete ome’ẽtava peẽme pene mba’erã ramo, ha ojejohu ramo peteĩ ojejukava’ekue ojepysóva ñúme, ha ndojekuaái ramo ijukahare,

2upéicharamo umi karai anciáno upe táva upévape osẽva’erã mbojovakeharakuéra ndive oha’ã hag̃ua mbovy métropa opyta pe táva ag̃uivéva pe te’õngue pévagui.

3Ha umi anciáno pe táva hi’ag̃uivéva ojapyhyva’erã peteĩ vaquillóna omba’apo’ỹva ha ne’ĩrava gueteri ogueraha peteĩ cangálla ijajúra rehe.

4Ha umi anciáno ogueruva’erã pe vaquillóna ysyrýpe, ijerekuévo ndaipóri kokue ha noñeñemitỹi gueteri araka’eve ha upépe omopẽva’erã hikuái pe vaquillóna ajúra.

5Upéi oñembojava’erã umi pa’i, Levi ñemoñaréva, Ñanderuete oiporavógui omba’apo hag̃ua ichupe g̃uarã, ha oporohovasa hag̃ua Ñanderuete rérape; ha iñe’ẽnguéra rupi ojekuaa hag̃ua mba’épa ojejapóta ñembojovaképe ha mba’éichapa ojejohúta pe pohã umi tavayguakuéra ojuavýva apytépe.

6Ha opaite karai anciáno pe táva hi’ag̃uivévagui, ojejohu hague pe te’õngue, ojoheiva’erã ipo pe vaquillóna oñemopẽva’ekue ajúra ári.

7Ha he’iva’erã hikuái: Ore po noñohẽi ko tuguy, ha ore resa ndohechái mba’eve.

8 Eperdona Nde, ore Ruete, ne retã Israélpe, Nde resalvava’ekue; ha ani oja orerehe ko tapicha ruguy oñeñohẽva’ekue. Ha uperire oñeperdonáta pe távape pe tuguy ñeñohẽnguégui.

9Upéicha nde reipe’áta pe angaipa oĩva pende apytépe, oñeñohẽ haguére heko potĩva ruguy, pejapopa hekoitépe Ñanderuete he’iuka haguéicha peẽme.

Ambue tembiapoukapykuéra

10Pesẽ ramo peñorãirõ hag̃ua penderehe ija’e’ỹva ndive, ha Ñanderuete omoĩ ramo ichupekuéra pende pópe, peguerahakuaa ichupekuéra pene rembiguairã ramo.

11Ha umi tembiguái apytépe rehecha ramo peteĩ kuña porãva, nde reipotáva ha rerahase ne rembirekorã ramo,

12emoinge ichupe nde rógape, emoperõ iñakã, eikytĩ ipyapẽnguéra,

13eipe’a hembiguái ao ha opytáta nde rógape ojahe’o hag̃ua isy ha itúva rehe peteĩ jasy pukukue; ha uperire ae reikokuaa hendive, ha ndéta iména, ha ha’éta ne rembireko.

14Ha sapy’a nde nderehayhuvéi ramo ichupe, repoikuaa ichugui sã’ỹre, anítei revende ichupe, ha anítei ha’e oiko ne rembiguái ramo, nde remotĩ haguére ichupe.

15Peteĩ kuimba’e hembireko mokõi ramo, peteĩme ohayhu ha ambuépe ndohayhúi, ha mokõivéva imemby ramo ichugui, ha pe ohayhu’ỹva imemby raẽrõ peteĩ mitãkuimba’e tenondeva’ekuépe,

16ha og̃uahẽvo pe ára itúva omboja’o hag̃ua opaite imba’e, pe onace raẽva oñeme’ẽveva’erã ambuekuéragui, ndikatúi oñemboyke ichupe ojehayhuvégui ambue ita’ýra sýpe.

17Pe ohayhu’ỹva membýpe oñeme’ẽva’eraã ita’ýra ypykue reko, ichupe oñeme’ẽva’erã mokõi párte (vore) itúva mba’égui ambue ita’yrakuérape katu peteĩteĩme peteĩ pártente; ha’égui itúva imbaretekue ra’y ypykue, ha imba’e voi ningo pe ta’ýra ypykue reko.

18Oime ramo ita’ýra oñembopy’ahatã mba’evai apópe, ha iñe’ẽrendu’ỹva itúva ha isýpe, ha ohaviráma ramojepe, ndojapói pe oje’éva ichupe ha oñemoĩ tapia itúva ha isýre,

19upéicharamo itúva ha isy, oguerahava’erã ichupe umi karai anciáno ha mbojovakeharakuéra rendápe, oñembyatýva hikuái táva rokẽguasúpe,

20ha he’iva’erã hikuái ichupekuéra: Ore ra’y oñembopy’ahatãma mba’evai apópe ha oñemoĩ tapia orerehe, naiñe’ẽrenduvéi, oiporu vai pe pirapire ha ika’úva.

21Upéicharamo opaite umi karai anciáno pe táva pegua ojapiva’erã ichupe itápe omano meve ha’e; upéichamante peipe’áta mba’evai pende apytégui, ha mayma Israelgua ohendúva guive tokyhyje avei.

22Ha oime ramo peteĩ oñemoangaipa vai haguére, ha pejuvy rire ichupe peteĩ yvyra rehe,

23katuete peñotỹva’erã he’õngue upe ára upévape, ani peheja osãingo pe pyhare pukukue Ñanderuete omaldecígui pe oñemosãingova’ekue; anítei péicha pemongy’a pende yvy Ñanderuete, Ñandejára, ome’ẽva’ekue peẽme pene mba’erã ramo.