Levítico 15 - Biblia en Guaraní - ?anderuete ?e’? Por? 2015

Tete ñemongy’a

1Ñanderuete oñe’ẽ Moises ha Aarónpe, ha he’i:

2Peñe’ẽ Israel ñemoñarenguérape ha peje ichupekuéra: Oimeraẽ kuimba’e, imba’e tykýva naipotĩri.

3Ko’ã mba’e rupi ha’e naipotĩri; otyky ramo térã ndotykyvéi ramo, ha’e naipotĩri.

4Opaite tupa oñeno haguépe imba’e tykýva, naipotĩri; ha opaite mba’e ha’e oguapy haguépe, iky’ava’erã.

5Oimeraẽ opokóva hupa rehe ojohéiva’erã ijao, ha ojahuva’erã avei, ha naipotĩri kuarahy oike peve.

6Ha peteĩ oguapy ramo pe imba’e tykýva oguapy haguépe ojoheiva’erã ijao ha ha’e ojahuva’erã avei, ha opyta iky’áva ramo kuarahy oike peve.

7Upéicha avei peteĩ opokóva pe kuimba’e imba’e tykýva rete rehe, ojoheiva’erã ijao, ha ojahuva’erã, ha opyta iky’áva ramo kuarahy oike peve.

8Ha pe kuimba’e imba’e tykýva ondyvu ramo peteĩ ipotĩva ári, kóa ojoheiva’erã ijao, ha ojahu rire, opyta iky’áva ramo kuarahy oike peve.

9Ha opaite kavaju aperegua pe imba’e tykýva oguapy haguépe, opyta iky’a.

10Ha oimeraẽva opokóva peteĩ mba’ére iguýpe oĩva’ekue iky’áta kuarahy oike peve; pe ogueraháva pe imba’e tykýva mba’e ojoheiva’erã ijao, ha ojahu rire, opyta iky’áva ramo kuarahy oike peve.

11Ha opaite tapicha opoko ramo imba’e tykývare ha ndojepohéiri ramo ýpe, ojoheiva’erã ijaokuéra ha ha’e ojahuva’erã, ha upéicharõ jepe ha’e iky’áta kuarahy oike peve.

12Pe imba’e tykýva opoko ramo peteĩ kambuchíre ojejokava’erã, ha opaite mba’yru yvyraguiguáva ojejoheiva’erã ýpe.

13Ha pe kuimba’e ipotĩha ára imba’e tykýgui oipapava’erã 7 ára ha’e okuera rire, ha ojoheiva’erã ijao, ha ojahuva’erã ysyrýpe ha ipotĩ jevy.

14Ha pe ára 8-hápe oguerahava’erã mokõi jeruti térã mokõi pykasura’y, ha oúta pende Ruete renondépe pe óga jojohuha rokẽme, ha ome’ẽmbáta pa’ípe;

15ha pe pa’i ojapóta peteĩgui kuave’ẽmby angaipa reheguáva, ha ambuégui kuave’ẽmby ojehapypa reheguáva ha pe pa’i omopotĩta ichupe imba’e tykykuégui pende Ruete renondépe.

16Pe kuimba’e imombarysẽva ojahuva’erã, ha naipotĩri kuarahy oike peve.

17Ha opaite aokuéra térã opaite mymba pirekue ári ho’a ramo pe mombarysẽ, ojejoheiva’erã ýpe, ha iky’áta kuarahy oike peve.

18Peteĩ kuimba’e oñeno ramo peteĩ kuña ndive ha ha’e omomba ramo, mokõivéva ojahuva’erã, ha opyta naipotĩri ramo kuarahy oike peve.

19Peteĩ kuña ohasa asy ramo kuñakuéra mba’asýgui, 7 ára oikova’erã ha’eñoháme; ha oimeraẽ opokóva hese, opyta iky’áva ramo kuarahy oike peve.

20Opaite mba’e ha’e oñeno térã oguapy haguépe, ikuña mba’asy aja, opyta iky’áva ramo.

21Ha oimeraẽ opokóva hupáre, ojoheiva’erã ijao, ha ojahu rire ramo, opyta avei iky’a kuarahy oike peve.

22Upéicha avei opaite opokóva oimeraẽ mba’ére ha’e oguapy haguépe, ojohéiva’erã ijao; upéi ha’e oñemopotĩva’erã ýpe, ha upéicharõ jepe opyta iky’áva ramo kuarahy oike peve.

23Ha umi mba’e oĩva pe tupa térã pe guapyha ári ha’e oguapy haguépe, upe opokóva guive umi mba’e rehe opyta iky’áva ramo kuarahy oike peve.

24Ha oime ramo peteĩ kuimba’e oiko hendive, ha imba’asy ruguykue oho ramo hese, opyta iky’áva ramo 7 ára peve; ha opaite tupa oke haguépe iky’áta.

25Ha pe kuña mba’asy ipukuve ramo jepiveguágui, huguy syry aja, opyta iky’áva ramo imba’asy ramoguáicha.

26Opaite tupa ha’e oke haguépe huguy syry aja pukukue, pe tupa péva iky’a; ha opaite mba’e ha’e oguapy haguépe opyta iky’a, ojehu ramoguáicha ikuña mba’asýpe.

27Oimeraẽ opokóva umi mba’e rehe, opyta iky’áva ramo, ha ojoheiva’erã ijao, ha ojahuva’erã, ha upeichavérõ jepe iky’áta kuarahy oike peve.

28Ha okueráma ramo huguy syrýgui, oipapava’erã 7 ára, ha upéi ipotĩ jevy.

29Ha pe ára 8-hápe oguerahava’erã pa’ípe mokõi jeruti térã mokõi pykasura’y pa’ípe, pe óga jojohuha rokẽ renondépe;

30ha pe pa’i ojapóta peteĩgui kuave’ẽmby angaipa reheguáva, ha ambuégui kuave’ẽmby ojehapypa reheguáva; ha pe pa’i omopotĩta ichupe pende Ruete renondépe ikuña mba’asýgui.

31Péicha pemopotĩta Israel ñemoñarenguérape, ani hag̃ua ha’e omano omongy’águi che róga, oñemopu’ãva ijapytepekuéra.

32Ko’ãva ningo tembiapoukapy huguy syrýva ha imombarysẽvape g̃uarã, oñemongy’águi umi mba’e rupi;

33ha kuña, ikuña mba’asýpe g̃uarã, ha umi imba’e tykývape g̃uarã, ha pe kuimba’e okéva pe kuña ipotĩ’ỹva ndive g̃uarã.