1Upéramo David oñemongeta umi soldádo ruvicha 1.000 ha 100 arigua ndive, ha opaite mburuvicha ndive,
2ha he’i avei opaite ambue Israelguakuéra ijatývape: Oĩ porã ramo peẽme, ha Ñanderuete oipota ramo avei, ñamondóta ko tetãpy rupi ñane pehẽnguekuéra opytava’ekue piári, pa’ikuéra ha Leviguakuéra piári oĩva hendivekuéra itávape, oñembyaty hag̃ua ñanendive;
3upérõ jaguerúta Ñanderuete karameg̃ua ñande apytépe, Saul oikoveha ára guive nañapenavéi hese.
4Ha mayma ijatýva guive he’i upéicha ojejapo hag̃ua, opaite tetãyguápe iporãitereírõ guáicha.
David oñeha’ã ogueru hag̃ua Ñanderuete karameg̃ua5Upéramo David ombyatyuka opaite Israelguápe, Sihor, Egípto pegua guive, Hamat ojeikeha peve, ojegueru hag̃ua Ñanderuete karameg̃ua Quiriat-jearimgui.
6Ha David opaite Israelgua ndive ojupi Baalápe, Quiriat-jearim pegua, oĩva Juda retãme, ogueru hag̃ua upégui Ñanderuete karameg̃ua, oikóva kerubinkuéra (ángelkuéra) pa’ũme ha Ñanderuete réra oñehenoiháme.
7Ha ogueru hikuái Ñanderuete karameg̃ua Abinadab rógagui peteĩ cárro pyahúpe; ha Uza ha Ahío omboguata pe cárro.
8David ha Israelguakuéra ovy’aiterei Ñanderuete renondépe, ha imbaretekue reheve opurahéi, ojeroky ha ombopu árpa, mbaraka, mba’epu pararã, platíllo ha trompéta.
9Ha og̃uahẽvo Quidon ñemitỹngue ñemopotĩha rendápe, Uza ipojái Ñanderuete karameg̃ua rehe ojoko hag̃uáicha, oñepysãnga haguére gueikuéra.
10Ha Ñanderuete ipochy Uza ndive, ha ombohasyete ichupe, ipojái haguére ikarameg̃uáre; ha upepete ha’e omano Ñanderuete renondépe.
11Ha David oñembyasyeterei, Ñanderuete oinupã haguérehe Uzápe; upévagui pe yvy pehẽngue péva oñembohéra Peres-Uza ko ára peve (he’ise: Uza oñenupã haguépe).
12Ha David okyhyje Ñanderuetégui pe árape, ha he’i: Mba’éicha piko che aguerúta che távape Ñanderuete karameg̃ua.
13Ha ndoguerúi Ñanderuete karameg̃ua itávape, oguerahánte Obed-edómpe, peteĩ Gatgua rógape.
14Ha Ñanderuete karameg̃ua opyta Obed-edom rógape mbohapy jasy pukukue; ha Ñanderuete ohovasa Obed-edom róga, ha opaite mba’e oguerekóva upete guive.
Who We AreWhat We EelieveWhat We Do
2025 by iamachristian.org,Inc All rights reserved.
