Nehemías 2 - Biblia en Guaraní - ?anderuete ?e’? Por? 2015

Artajérjes omondo Nehemías Jerusalénpe

1Ko’ã mba’e ojehu Nisan (Abril) jasy jave, tetã ruvicha Artajérjes oisãmbyhy aja 20 áñoma, aguerúvo pe víno henondépe, ha ame’ẽvo tetã ruvichápe tovasy reheve. Ha ndaikóigui araka’eve tovasy reheve henondépe,

2tetã ruvicha oporandu chéve: Mba’érehe piko nderovasy, nanderasýi piko. Rejepy’apýguinte nderovasy péicha. Ha che akyhyjeiterei apytávo.

3Ha ambohovái tetã ruvichápe: Toikove tetã ruvicha opaite árape. Mba’éguipa ndacherovasymo’ãi, itaperepa ramo pe táva che rukuéra oñeñotỹ haguépe, ha ojehapypa ore táva rokẽnguéra.

4Ha tetã ruvicha oporandu chéve: Mba’épa rejerure. Upéramo añembo’e yvága Járape,

5ha ha’e tetã ruvichápe: Ho’a porã ramo tetã ruvichápe, ha ne rembiguái ojohu ramo py’aporã ne renondépe, chemondomína Judápe, pe táva che rukuéra oñeñotỹ haguépe, amopu’ã jevy hag̃ua.

6Upéramo oporandu chéve tetã ruvicha, ha hembireko oguapýva ijykére: Mboy árapa nde’aréta, ha araka’épa reju jevýta, ha ha’e rire ichupe mboy árapa che’aréta, hi’ã porã ichupe chemondo hag̃ua.

7Che ha’e avei tetã ruvichápe: Tetã ruvicha, reipota ramo toñeme’ẽ chéve kuatiañe’ẽ, ne retã sãmbyhyharakuérape g̃uarã oikóva Éufrates mboypýri, oheja hag̃ua che ahasa pe yvy rupi, ag̃uahẽ meve Judápe.

8Ha kuatiañe’ẽ Asáfpe g̃uarã, pe tetã ruvicha ka’aguýre oñangarekóvape, ome’ẽ hag̃ua chéve yvyra pe ogaguasu rokẽrãme g̃uarã, ha pe táva tápia rehe g̃uarã, ha pe óga che aikotaha rehe g̃uarã. Ha tetã ruvicha, Ñanderuete po porãite oĩgui cheári ha’e ohaiukapa ha ome’ẽ chéve.

9Upéi aju ysyry mboypyrigua tetã sãmbyhyharakuéra rendápe (opytáva Artajérjes poguýpe), ha ame’ẽ ichupekuéra tetã ruvicha kuatiañe’ẽ. Tetã ruvicha omondókuri chendive avei soldádo aty ruvichakuéra ha avei kavaju ariguáva.

10Ha Sanbalat, peteĩ Horongua, ha Tobías, peteĩ Amongua ruvicha, ohendúvo péva ipochyeterei oĩgui oúva oheka hag̃ua mba’eporã Israel ra’ykuérape g̃uarã.

Nehemías omokyre’ỹ Judayguakuérape omopu’ã jevy hag̃ua Jerusalen tapiakuéra

11Ha ag̃uahẽ rire Jerusalénpe, aha’ãrõ upépe mbohapy ára pukukue,

12upéi apu’ã pe pyharépe, che ha mbovymi kuimba’ekuéra ndive, namombe’úi katu avavépe umi mba’e Ñanderuete omoĩmava’ekue che py’apýpe ha ajaposéva Jerusalénpe; ha ndaipóri ambue mburika ore apytépe, pe che aiporúvante.

13Ha pyharekuépe asẽ umi cérro pa’ũ (válle) rokẽ rupi, pe tejujaguaguasu pytã yrenda gotýo ha pe yty atýra rokẽme; ha ama’ẽ Jerusalen tápia ho’apapyréva rehe, ha hokẽnguéra tatápe ikusuguepava’ekue rehe.

14Upéi ahasa pe yvu rokẽme ha pe tetã ruvicha yrendápe, ha che mburika ndikatuvéi ohasa upérupi.

15Ha pyharekuépe ajupi pe ytororõ rupi ha ama’ẽ pe tápia rehe, ha ajere ahávo aike umi cérro pa’ũ rokẽ rupi, ha aju jevy.

16Ha umi soldádo ruvichakuéra ndoikuaái moõpa che ahára’e ni mba’épa ajapóra’e; ne’ĩragui gueteri che amombe’u Judayguakuérape ni pa’ikuérape, ni karai ancianokuérape, nisoldádo ruvichakuérape, ni ambue tembiapo apohakuérape umi mba’e che ajaposéva Jerusalénre.

17Upéramo che ha’e ichupekuéra: Peẽ ningo pehecha mba’eichagua mba’e vaípepa jaiko, Jerusalen itaperepa, ha hokẽnguéra tatápe ikusuguepáma; peju joaite, ha ñamopu’ã ko Jerusalen tápia, ha anivéma jaiko ñembohoryhára ramo.

18Upéramo amombe’u ichupekuéra mba’eichaitépa che Jára po mba’e porãite oĩkuri chendive, ha opaite mba’e tetã ruvicha he’imava’ekue avei chéve. Ha he’i hikuái: Ñapu’ã ha ñamopu’ã joaite. Ha péicha oñeha’ã mbarete hikuái pe tembiapoguasuetépe.

19Ha ohendúvo Sanbalat, pe Horongua; ha Tobías, pe Amongua ruvicha; ha Gesem, pe Arabiaygua ruvicha, oñembohory orerehe ha oreapo’i hikuái he’ívo: Mba’éiko hína pe mba’e peẽ pejapóva. Pepu’ãse piko tetã ruvicha rehe.

20Ha che ambohovái ichupekuéra: Yvága Jára orepytyvõta ha ore, hembiguaikuéra, romopu’ãta Jerusalen tapiakuéra ha peẽ naorepytyvõmo’ãi mba’evépe.