1Mba’érehepa reñemomombyryete chehegui, Nde, che Ruete, ha reñomi (nde rova) che jejopy vaiha árape.
2Ñembotuichapópe iñañáva omuñahína imboriahúvape, to’a jevy iñakã ári hembiapo vai ojaposéva guive.
3Pe tekove iñañáva oñembotuicha hi’ánga rembipota vai rupi. Ombyatysénte ipirapirerã ojopy jave hapichápe oñe’ẽvai hag̃ua Ñanderuete rehe.
4Pe ojeroviase’ỹva oñembotuicha ha ndohekaséi Ñanderuetépe ha ipy’apýpe he’i voi: Ndaiporiha Ñanderuete.
5Ha’e ojapóva guive osẽ porã ichupe, Nde nderehaviráigui ichupe, upévare ha’e oñembohory opaite hese ija’e’ỹvare.
6Ipy’apýpe he’i voi: Araka’eve nda’amo’ãi po’a’ỹme, péva ndacherupitymo’ãi araka’eve.
7Ijuru henyhẽ maldicióngui, jejopy vaígui ha japúgui, ha ikũme oĩ ñembohory ha ñeporombotavy.
8Oguapy omangea umi tava’i ypy rupi ojuka hag̃ua ñemiháme hapicha heko potĩvape. Hesakuérape omaña ñemi umi ijehe oñangarekokuaa’ỹva rehe.
9Ñemiháme omangea, ku leõicha ikañyha guive; omangea omonda hag̃ua mboriahúpe; mbaretépe ogueru imboriahúvape iñuhãme.
10Oñemocha’ĩ ha ojayvy ojeity hag̃ua ikangýva ári.
11Ipy’apýpe he’i: Ñanderuete hesaráima, oñomíma voi hova, araka’eve ndohechamo’ãi (che rembiapo vai).
12Epu’ãmína, Nde, che Ruete, emopu’ã nde po, anítei nderesarái imboriahúvagui.
13Mba’érehe piko pe iñañáva oñembohory Ñanderuetére. Ha ipy’apýpe he’i: Nderehekaichéne ichupe ha nereporandumo’ãi ichupe (hembiapo vaikue rehe).
14Nde rehechapa, rema’ẽgui iñanáva rembiapo rehe ha iñembohory rehe, remyengovia hag̃ua nde po rupive; nderehe ojeko umi ijehe oñangarekokuaa’ỹva, Nde voi ningo ityre’ỹva pytyvõhára.
15Emopẽ iñañáva jyva, ha emuña iñanáva rembiapo vai nderejohuvéi peve araka’eve.
16Ñanderuete ningo pe tetã ruvicha guasu tapia g̃uarãva, hesegua’ỹva oñehundiva’erã hetãme.
17Nde, che Ruete, rehendu umi oñemomirĩva mba’ejerure; Nde voi remokyre’ỹ jevy ichupekuéra, ha rejapysaka porã hesekuéra,
18reipytyvõ hag̃ua ityre’ỹvape ha ojejopy asývape, ikatu hag̃uáicha yvy ape árigua ndojapovéi hembipota vai.
Who We AreWhat We EelieveWhat We Do
2025 by iamachristian.org,Inc All rights reserved.
