Matéo 16 - Biblia en Guaraní - ?anderuete ?e’? Por? 2015

Hesu ndojaposéi mba’e hechapyrã umi hese ija’e’ỹvape

1Ha umi fariséo ha saducéo oñemboja Hesu rendápe oipy’ara’ã hag̃ua ichupe ohechaukami hag̃ua avei ichupekuéra mba’e hechapyrã yvagaguiguáva.

2Hesu katu he’i ichupekuéra: Ka’aruete jave peje, ko’ẽrõ peteĩ ára iporãta, ipytãgui pe ára.

3Ha pyhareve katu peje ko ára ivaíta, pe ára ijarai pytãmbágui. Peẽ tova mokõi pehechakuaáva pe ára iñambue jave hína, ndapehechakuaái katu pe techaukaha Ñanderuete ojapovahína ko’ã arakuérape pende apytépe.

4Ko’ã ñemoñare ñaña ha ipy’a mokõiva ojerure tembiapo techapyrãva, mba’eveichagua tembiapo techapyrãva noñeme’ẽmo’ãi ichupekuéra, pe Jonas rehegua techaukahámante. Upérõ Hesu oheja ichupekuéra ha oho.

5Ha hemimbo’ekuéra og̃uahẽvo yguasu mboypýri ohechakuaa hikuái, hesarái hague oguerahava’erãha pan.

6Ha Hesu he’i ichupekuéra: Pema’ẽ ha peñeñangarekóke pendejehe umi fariséo ha saduceokuéra levadúragui (mbo’epykuéragui).

7Ha he’i hikuái ipy’apypekuéra: Péicha he’i, ndajaguerúigui pan.

8Ha Hesu ohechakuaávo péva he’i: Mba’érehepa pejepy’apy rei ndapeguerúigui pan (pene rembi’urã).

9Ne’ĩrapa gueteri peikuaa, ha napenemandu’ái piko 5 pan ohupitypa ramoguare 5.000 kuimba’ekuérape g̃uarã ha mboy ajaka renyhẽ piko pemono’õ jevýra’e hembyre.

10Térã umi 7 pan ohupitypa ramoguare umi 4.000-pe ha mboy ajaka renyhẽ piko pemono’õ jevýra’e.

11Ha mba’éicha piko ndapehechakuaái ndaha’eiha pe pan rehe Che ha’eva’ekue peẽme ko mba’e kóva, peñeñangareko hag̃ua pendejehe umi fariséo ha saduceokuéra levadúragui ningo ha’e peẽme ko ñe’ẽ kóva.

12Upépe ae ohechakuaa hikuái nde’íri hague ichupekuéra oñeñangareko hag̃ua pe pan levadúragui, umi fariséo ha saduceokuéra rekombo’epýgui uvei.

Pédro he’i Hesu ha’eha pe Crísto

13Hesu og̃uahẽ rire Cesaréa, Filípo yvýpe, oporandu hemimbo’ekuérape: Mba’épa he’i tetãyguakuéra yvyarigua Ra’y rehe, (cherehe).

14Ha ha’ekuéra he’i ichupe: Oĩ he’íva, Juan Bautistaha; ambue katu he’i Eliasha; ha ambueve katu he’i: Jeremías térã peteĩva umi proféta apyteguiguavaha.

15Upérõ Hesu oporandu ichupekuéra: Ha peẽ, mávapa peje Che ha’eha.

16Ha Simon Pédro ombohovái he’ívo: Nde ningo pe Crísto, Ñanderuete oikovéva Ra’y.

17Upévo Hesu ombohovái ha he’i ichupe: Revy’aite nde Simon, Jonas ra’y, ndaha’éigui to’o térã tuguy ohechauka ndéve ko mba’e kóva, Che Ru yvága pegua añónte uvei.

18Ha Che ha’e ndéve, nde ha’eha Pédro, ha ko itaguasu kóva ári amopu’ãta che iglésia ha pe aña retã ndaipu’akamo’ãi hese.

19Ha ame’ẽta ndéve pe yvága rokẽ lláve ha reñapytĩva guive ko yvy ári, oñeñapytĩta avei yvágape; ha rejoráva yvy ape ári, ojejorava’erã yvágape.

20Ha he’i hemimbo’ekuérape ani hag̃ua omombe’u avavépe ha’eha pe Crísto (Ñanderuete Ra’y).

Hesu he’i omanotaha

21Ha upe ára guive Hesu Crísto oñepyrũ oikuaauka hemimbo’ekuérape Ha’e ohova’erãha Jerusalénpe ha ohasa asyva’erãha pa’ikuéra, karai ancianokuéra ha umi kuatia haihára pópe ha ipahápe ojejukava’erãha ichupe, oikove jevyva’erã katu mbohapy ára haguépe.

22Pédro katu omoha’eño Hesúpe ha oñe’e pohýi ichupe he’ívo: Mba’evéicharamo che Jára, anítei ojehu ndéve ko ñe’ẽ eréva oréve.

23Ha Hesu ojere ha he’i Pédrope: Ejei che ypýgui nde Satana, reikógui chéve ñepysãngaha ramo, nde yvyarigua rekógui ou ko pensamiénto kóva, ndaha’éi Ñanderuete rembipotágui.

24Upémaramo Hesu he’i hemimbo’ekuérape: Upe che rapykuéri ouséva toñembyesarái ijehegui jepeve, tohupi ikurusu ha tou che rapykuéri.

25Upe osalvaséva hekove katu, ohundíta; ha upe ohundíva hekove cherehehápe oikove jevyva’erã.

26Mba’épa oguenohẽta pe kuimba’e térã kuña oñemomba’epa ramo ko yvy arigua rehe, ha ohundi ramo hekove. Mba’épa pe yvyarigua ome’ẽkuaa hekove rekovia rehe.

27Yvyarigua Ra’y ningo ouva’erã Itúva reko jajaipápe hi’angelkuéra ndive, ha upépe ohepyme’ẽta peteĩteĩvape hembiapokue repy.

28Añetehápe Che ha’e peẽme: Ko’ãva apytépe oĩ nomanomo’ãiva ohecha mboyve yvyarigua Ra’ýpe ou ramo ijyvága pegua retãguasu pu’aka reheve.