Eclesiástes 5 - Biblia en Guaraní - ?anderuete ?e’? Por? 2015

Pe ñemomba’eguasu oñeme’ẽva Ñanderuetépe ndovaléi

mba’eve nañañemomirĩri ramo.

1Nde reho jave Ñanderuete rógape, eñangareko porãke nde py guata rehe, tereho ejapysaka ha neñe’ẽrendu porã hag̃ua, ani reikuave’ẽ ivýrova ramoguáicha ha’ekuéra ningo oikuave’ẽnte omo’ã hag̃ua hembiapo vairã.

2Ha ani rembopya’e nde juru ome’ẽ hag̃ua peteĩ promésa Ñanderuete renondépe, nde reimégui yvy apére, Ha’e katu oĩ yvágape, upévare reñe’ẽ mboyve epensa porã ovale hag̃uáicha.

3Upe ojepy’apyetéva osoña vai, ha upe oñe’ẽitereíva oñe’ẽ ku ivýrova ramoguáicha.

4Nde rejapo ramo peteĩ promésa Ñanderuetépe, aníke reha’ãrõ rejapo peve, ejapo pya’e uvei nde reprometeva’ekue. Ha’e ndaipy’a rorýigui umi heko ñembotavýva ndive.

5Iporãiteve nereme’ẽi ramo nde promésa, reñe’ẽme’ẽ rãngue ha nderejapói.

6Aníke rehejátei nde juru nemohembiapo vai, ha aníke ere yvága rembiguáipe ajavy aipota’ỹre. Ma’erãpa rembopochy reíta Ñanderuetépe ne ñe’ẽ rei rupi, ha rehejáta Ha’e ombyai ne rembiapokue.

7Upévape ou heta kéra ha ñe’ẽ rei, nde katu ekyhyjéke Ñanderuetégui.

Heta jejavy oĩ yvyariguakuéra rekovépe

8Nde rehechárõ ojejopyha pe mboriahúpe ne retãme, noñembojovake porãigui ha oñemboyke ramo avei pe tembiapoukapy, upéramo ani ndepochyeterei, eikuaa porãke, umi mbojovakehára ári oĩ ambue ijyvatéva oñangarekóva hesekuéra, ha kóva ndojapói ramo cáso eikuaa porãke hi’ári oĩha pe Ijyvateitevéva.

9Peteĩ mba’e iporãitéva ojehu pe tetãme huvicha ojokuái porã ramo hetãyguakuérape ha opavave omba’apo porã ramo ikokuépe.

10Pe ohayhúva pirapire nahyg̃uatãmo’ãi araka’eve; ha upe ohayhúva imba’erepy, hetave katu oipota. Ko’ã mba’e reiete avei.

11Oñembohetavévo imba’eita, hetave oĩta avei umi okaruséva imba’eitágui. Ha mba’eichagua mba’eporã piko ijára oguerekóne umívagui, ohecha haguérente ichupekuéra.

12Pe omba’apóva katuete oke porã, okaru heta térã okaru sa’i ramojepe; ha pe ipirapire hetáva katu ndaikatúi oke porã ojepy’apýgui imba’eita rehe.

13Peteĩ mba’evai ñambyasýva ahechava’ekue ko yvy apére: Pe mba’erepyeta ñembyaty ombyai ijárape.

14Oñehundipa oiporu vai haguére, ha ita’ýra ramo, mba’eve nahembýi ichupe g̃uarã.

15Opívo osẽ haguéicha isy ryégui, péicha oho jevyva’erã; ha hembiapokuégui mba’eve ndoguerahamo’ãi ipópe.

16Kóa avei peteĩ mba’e porã ndetuicháva, imba’eita ou haguéicha ko yvy apére, oho jevyva’erã. Ha mba’éiko oguenohẽra’e hembiapo hetaitereívagui.

17Ha avei ko’ã mba’e ári, otĩgui okaruva’erã pytũ guýpe, heta angekõime, heta ñembyasy ha py’arópe, oikove aja pukukue.

18Pema’ẽ porãke umi mba’e che ahechakuaa porãva rehe: Iporã tojekaru, toñemboy’u ha tombovy’a hi’ánga hembiapokue repy pohýi rupi ojejapova’ekue yvy apére, ko’ãva ningo Ñanderuete me’ẽmby yvyariguakuérape g̃uarã.

19Ha upéicha avei opaite yvyariguápe Ñanderuete ome’ẽma heta mba’erepyeta térã pirapire, ha’e voi ikatu okaru ichugui, ha toñemomba’e imba’éva rehe, ha tovy’a hembiapokue rehe, péva hína Ñanderuete me’ẽmby ome’ẽva’ekue ichupe.

20Upéicharamo ha’e naimandu’avéima hekove ára ypy rehe, Ñanderuete omyenyhẽgui vy’águi ipy’apy.