Levítico 25 - Biblia en Guaraní - ?anderuete ?e’? Por? 2015

1Ñanderuete oñe’ẽ Moiséspe Sinai cérrope, ha he’i:

2Eñe’ẽ Israel ñemoñarenguérape ha ere ichupekuéra: Ág̃a peikeha ára guive pe yvy Che ame’ẽtava peẽme, pe yvy opytu’uva’erã peteĩ áño Jahvépe g̃uarã.

3 Seis áño pukukue peñemitỹva’erã pende kokuépe ha 6 áño aja pehakã kytĩta pende parralty ha pemono’õta hi’akue.

4Pe áño 7-hápe katu pe yvy opytu’uva’erã, toĩ pytu’u oñemomba’eguasu hag̃ua pende Ruetépe; napeikytĩmo’ãi pende parralty rakã ha napeñemitỹmo’ãi pende kokuépe.

5Umi heñóiva ijeheguínte pende kokuépe napemono’õmo’ãi ni pende parral’akue napemono’õmo’ãi; péva ningo kokue pytu’uha áño.

6Ha pe kokue opytu’úva ome’ẽta peẽme pekaru hag̃ua, pene rembiguaikuéra kuimba’e ha kuñáme, pene remimongakuaakuérape ha umi tetã ambueygua oikóvape pende apytépe;

7ha pene rymba ha mymbakuéra ka’aguy pegua oikóva guive pene retãme ho’úta hi’akue.

8Ha peipapáta 7 koichagua sábado pytu’uha áño, péva he’ise pembohetáta 7 jevy koichagua pytu’uha áñope, (7x7= 49), pehupity hag̃ua 49 áño.

9Upéramo pembopu hatã pe turu, pe jasy 7-ha jave, pe ára 10-hápe, og̃uahẽmagui pe ñemoĩ porã jevyha áñope, pembopu pe turu opaite pene retãpy rehe.

10Ha pemboaretéta upe áño 50-ha, ha pemoherakuãta oñeme’ẽtaha sãso (libertad) opaite tembiguái (esclávo) oikóva guive pene retãme; upe áño upévape oĩta perdon peẽme, ha peteĩteĩ ojevy joaitéta ijyvyteépe ha maymáva ojevýta igentekuéra apytépe.

11Pe áño 50-ha opytáta peẽme g̃uarã perdon áño ramo, napeñemitỹiva’erã ni napemono’õiva’erã, umi heñói reíva jepe pende kokuépe ha pende parral’a napemono’õiva’erã.

12Ko perdon áño oñemboykeva’erã pende Ruetépe g̃uarã, pe koga’a okakuaa reíva pe’uva’erã okakuaa haguépe, (ani pegueraha pende rógape).

13Ko perdon áñope peteĩteĩ ou jevýta ijyvyteépe (ilotekuépe), ha’e opyta jevy hag̃ua ijaratee ramo.

14Ha revende ramo nde rapichápe oimeraẽ mba’e, térã rejogua ramo nde rapichágui oimeraẽ mba’e, anítei avave ombotavy hapichápe.

15Pe perdon riregua áño heta háicha gueteri upéicha rehupi térã remboguejy ne mba’e repy; umi áño hetakue ojepapa háicha, upéicha nde revendeva’erã nde rapichápe.

16Umi año hetave ramo, upéicha avei hepyveva’erã imba’erepy, ha umi año mbovyve ramo, imbovyvéta avei pe mba’e repy; pe ñemitỹngue ñemono’õ áño heta háicha upéicha ha’e ovendéta ndéve.

17Ha aníke avave ombotavy hapichápe, pekyhyjékena pende Járagui; Che ningo Jahve, pende Jára (pende Ruete).

18Pejapóke che ñe’ẽ ha che rembiapoukapykuéra, ha pene rembiapo tahekoitépe peiko hag̃ua pytu’upópe pene retãme;

19péicha pe yvy ome’ẽta hi’akue, ha pe’úta ichugui peneryg̃uatã meve, ha peikóta ipype kyhyje’ỹre.

20Ha peje ramo: Mba’éiko ro’úta pe áño 7-hápe. Péina ápe noroñemitỹiriva’erã ni noromono’õiva’erã ore remitỹngue;

21upéramo Che ahovasáta peẽme pe áño 6-hápe ha ame’ẽta peẽme pemono’õ hag̃ua mbohapy áñope g̃uarãicha.

22Ha peñemitỹta pe áño 8-hápe, ha pe’úta pene ñemitỹngue itujáva pe áño 9-ha peve, oĩ jevy peve temitỹngue pyahu pe’úta pe itujávagui.

23Ndikatúi pevende tapia g̃uarã pende yvy, pe yvy ningo che mba’e; peẽ ningo chéve g̃uarã ku ohasáva ohóvoicha ha tetã ambueyguávaicha chendive g̃uarã.

24Upévagui pene retãpy javeve peme’ẽ jevýta ijarakuépe ijyvyteéva (ilotekue).

25Ha peteĩ Israelgua ou ramo imboriahu, ha ovende ramo ilóte térã ilóte pehẽngue, upéicharamo igénte hi’ag̃uivéva ichugui ouva’erã ha ikatu ojogua jevy ichupe g̃uarã.

26Ha pe kuimba’e ndoguerekói ramo igénte apytégui ojogua jevyva’erã ijyvykue, ha ha’e voi ohupitýta ramo hepyrã,

27upéicharamo pe ojoguava’ekue ijyvykue ovende jevyva’erãva katuete ijarakuépe, ohechakuaava’erã katu umi áño ha’e oiporuva’ekue hapicha yvykue ha ome’ẽ jevyva’erã pe yvy mbovyve pirapire rehe ijarakuépe.

28Ha pe yvy jarakue ndohupitýi ramo ojogua jevy hag̃ua ijyvykue, upérõ pe ojoguava’ekuépe g̃uarã opyta pe yvy og̃uahẽ meve pe perdon áño, ha pe perdon áño og̃uahẽ guive pe yvy jarakue ova jevýta ijyvyteépe ijarateéicha, (opaga’ỹre mba’evete).

29Peteĩ kuimba’e ovende ramo peteĩ óga oĩva peteĩ távape oñemongoráva tápia reheve, ikatu ojogua jevy ohasa mboyve peteĩ áño.

30Ha ndojoguái jevy ramo, ohasa mboyve peteĩ áño, pe óga oĩva táva oñemongorava’ekuépe opytáta opaite árape ijára pyahúpe ha iñemoñarenguérape g̃uarã noñeme’ẽveiva’erã ijarakuépe pe perdon áñope.

31Ha umi óga oĩva tava’i ikorapy jere’ỹvape, umíva ojererekóta yvy kokue ramo; umíva ikatúta ojejogua jevy térã oñeme’ẽjevyva’erã perdon áñope ijarakuépe g̃uarã.

32Ha umi Levigua ikatu ojogua jevy hóga oimeraẽ árape, oĩva guive itavateépe.

33Ha pe kuimba’e ojoguava’ekue peteĩ óga Leviguágui ovende jevyva’erã ichupe, ijarakue ipirapire ramo térã katuete osẽva’erã hóga pyahúgui og̃uahẽ ramo pe perdon áño, pe óga ojoguava’ekue oĩ ramo peteĩ Levigua távape.

34Ha pe ñu oĩva Levi tavakuéra jerekuévo rehe araka’eve ndikatúi ojejogua, imba’eteégui opaite ára peve.

35Ha nde rapicha Israelgua oñemomboriahu ramo, nde reipytyvõva’erã ichupe ku tetã ambueyguáicha oikóva nendive.

36 Nderecebiriva’erã ichugui hetave pirapire reiporuka haguére ichupe (interes reheve); rekyhyjeva’erã nde Járagui, ha nde rapicha opu’ãkuaa jevy hag̃ua.

37Nereme’ẽiva’erã ichupe nde pirapire reguenohẽve hag̃ua ichugui, ha hembi’urã nereme’ẽiva’erã hepyve ichupe.

38Che, pende Ruete, pende Jára, poguenohẽva’ekue Egípto retãgui, ame’ẽ hag̃ua peẽme Canaan yvy, ha aiko hag̃ua pende Jára ramo.

39Ha nde rapicha Israelgua oñemomboriahu ramo, ha ha’e voi oñeme’ẽ ramo ndéve pirapire rupi nderejokuairiva’erã ichupe tembiguái reícha (esclávoicha).

40Ne remimongakuaáicha, ku tetã ambueyguáicha, oikóta nendive, pe perdon áño pevénte oikóta ne rembiguái ramo.

41Ha og̃uahẽ vove pe perdon áño ha’e osẽta nde rógagui, ita’yrakuéra ndive, ha oho jevýta igentekuéra rendápe, ha ituvakuéra lóte oñeme’ẽ jevyva’erã ichupe.

42Ha’ekuéra ningo che rembiguái, Che aguenohẽva’ekue Egípto retãgui; ha ndojejoguamo’ãi ichupekuéra ku tembiguái reícha (esclávoicha).

43Nereñembojaraiva’erã hese mbaretepópe, rekyhyjeva’erã nde Járagui.

44Ambue tetãnguéragui, oikóva pende jerekuévo, pejoguakuaa umi tembiguái kuimba’e ha kuñáva (esclávo ramo).

45Ikatu pejogua avei umi tetã ambueygua ra’y oikóva pende apytépe ha imitãkuéra oútava yvy apére pene retãme ha oikótava penendive, umíva ikatu peguereko pene mba’e ramo.

46Ha ikatu peheja avei ichupekuéra pende ra’ýpe, imba’erã ramo; tapia peiporukuaa ichupekuéra; pene pehẽngue Israel ñemoñarenguéra rehe katu napeñembojaramo’ãi mbaretepópe.

47Ha peteĩ tetã ambueygua oñembopirapire ramo ikatu ojogua peteĩ Israelgua imboriahúva, ko imboriahúvape igentekuérava katu ojoguakuaa jevy.

48Upéicha avei ha’e voi oñevende rire igénte apytégui, peteĩ ipehẽngue ojoguakuaa jevy ichupe;

49 itio térã itio ra’y oguenohẽkuaa ichupe pirapire rehe, térã peteĩ igénte hi’ag̃uivéva ichugui, ipehẽnguekuéra apytégui oguenohẽkuaa ichupe pirapire rehe; térã ha’e voi, ikatu ramo, ojejogua jevy.

50Upérõ pe ojoguava’ekue ndive oipapava’erã, umi áño ha’e omba’apomava’ekue hendive, pe ára ha’e oñevendéma guive pe ára ohoseha peve, ha ojepagáta ichupe ojepaga háicha peteĩ personal omba’apóva estánciape; ha pe tembiapo repy oipe’ava’erã ichupe pe tembiguái reko repýgui.

51Ha oime ramo heta áño gueteri pe perdon áño peve, umi áño heta háicha omyengoviava’erã pirapire rehe osẽ hag̃ua, upéicha hetave ohepyme’ẽva’erã osẽ hag̃ua pe tembiguái rekógui.

52Ha oime ramo mbovy áño hemby ohupity hag̃ua pe perdon áño, upéicharamo oñondive oipapava’erã, umi áño hembýva ha umíva rehénte ojepagava’erã.

53Ku personálicha omba’apóva nendive rerekóta ichupe, nereñembojaraiva’erã hese mbaretepópe ijaratee ramo.

54Ha avave ndojoguái jevy ramo ichupe, katuete osẽva’erã ha’e ha ita’yrakuéra hendive, pe perdon áñope.

55Israelguakuéra che rembiguái voi; aguenohẽ haguére ichupekuéra Egípto retãgui. Che ningo Jahve, pende Jára.