Hebreoyguakuérape 6 - Biblia en Guaraní - ?anderuete ?e’? Por? 2015

1Upévare jahava’erã tenondeve gotýo jakakuaa peve ñande rekove pyahúpe, naiporãi ñambo’e tapia ramo ko’ã tekombo’e ñepyrũ reheguáva: Ñañembyasy ñañemoangaipa haguére, mba’éichapa jajeroviava’erã Ñanderuete rehe,

2 bautísmo, po ñemoĩ tapicha akã ári, omanomava’ekue jeikove jevy ha pe ñembojovake tapia g̃uarãva.

3Ko’ã mba’e jajapo Ñanderuete ñanepytyvõrõ.

4Ndaikatúi ningo umi ojehesape’amava’ekue ha oaprovámava (oha’ãmava) pe yvága me’ẽmby, ha oñeme’ẽmava’ekue ichupekuéra pe Pytu Porãmbáva,

5ha oaprovamava’ekue (oha’ãmava) Ñanderuete ñe’ẽ porãite ha oñandúmava pe ára atyguasurã pu’aka,

6ha uperire opoi jevýrõ hikuái (Hesu Crístogui); umíva ndaikatumo’ãvéima oñembyasyete jevy ojapo vai haguére, upe hembiapo vai rupi ha’ekuéra omosãingo jevýre Ñanderuete Ra’ýpe ikurusúre ha omotĩre Hesu Crístope.

7Ha’ete ku kokue oipytéva pe ama, heta jevy ho’áva hi’ári, ha heñói porã umi temitỹnguéra, péva ningo ombovy’a pe kokue járape, ohupitýgui Ñanderuete jehovasa,

8ha heñói ramo ñuatĩ ha ñana vai nombovy’amo’ãi pe kokue járape, ha’e omaldecíta ikokue ha ipahápe ohapypáta.

9Che rayhupára, ore roñe’ẽ pohýi ramo jepe péicha, ore roha’ãrõ katu peẽ peguata porãve pehóvo pe salvacion rape rehe.

10Ñanderuete ndojapói mba’eve hekope’ỹ, upévare Ha’e ndahesaráiri avei pene rembiapo porã ha pene mborayhúgui pehechaukava’ekue héra rehehápe, peipytyvõ ramoguare pene hermanokuérape, ha peipytyvõ gueteri pehóvo ichupekuéra.

11Ore roipotánte peteĩteĩ peẽva peñemokyre’ỹve pehóvo pehupity hag̃ua pe esperánza ru’ã.

12Anítei peñemoate’ỹ, peñeha’ãmba uvei pehupity peve jerovia ha paciéncia rupi Ñanderuete me’ẽmby, Ha’e he’imava’ekue ome’ẽtaha.

13Ñanderuete ome’ẽ ramoguare iñe’ẽ Abrahámpe, ome’ẽ iñe’ẽ ijehe, ndaipórigui tuichavéva ichugui.

14Ha’e he’i Abrahámpe: Che rohovasáta ha ambohetaitereirasáta ne ñemoñarenguérape, (Génesis 22,17).

15Ha upéicha Abraham oha’ãrõ pukuete ohupity peve pe mba’e Ha’e he’imava’ekue ome’ẽtaha ichupe.

16Yvyariguakuéra ome’ẽ ramo iñe’ẽ oñe’ẽme’ẽ peteĩ téra tuichavéva ichugui, opa hag̃ua opaichagua ñe’ẽ joapi.

17Upévare Ñanderuete avei omoañete pe he’imava’ekue iñe’ẽme’ẽ rupi (juraménto rupi), Abraham katuete ohupitytaha Ha’e he’iva’ekue ichupe, iñe’ẽ noñemoambuemo’ãi araka’eve.

18Upéicha, mokõi mba’e noñemoambuéiva rupi Ñanderuete ohechaukase Ha’e ndaikatuiha ijapu, ha Ha’e ñanemoangapyhyse, upévare jajejoko hatãve jahávo pe esperánza rehe jarekóva Ha’érupi.

19Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

20Upépe Hesu Crísto oike yma, oiko hag̃ua tapia g̃uarã pa’iguasu ramo, Melquisedec reko reheguáva ramo ombosako’i hag̃ua pe tape ñande jaike hag̃ua avei.