1Marandu Tíro rehe. Peẽ pemba’apóva Tarsis pegua barcoguasúpe pejahe’o soróke pende táva rogakuéra oñehundipáma. Ko profecía ha’ekuéra ohendu Chíprepe.
2Pekirirĩ peẽ Sidon ñemuhára peikóva yguasu rembe’y rupi ha peguerúva yguasu mboypýrigui hetaiterei mba’e (mercadería).
3Heta trígo ojegueruva’ekue Nílogui, hi’y omoheñói porã temitỹnguéra ysyry rembe’ýpe. Ha upépe ijatyva’ekue avei tetãnguéra ojogua hag̃ua hembi’urã.
4Etĩ Sidon, ha pe yguasu te’i: Araka’eve ndacheryeguasúi, nachemembýi, namongakuaái karia’y ni kuñataĩkuérape.
5Umi Egiptoygua ohendu vove, umi mba’e ojehúva Tírope, oryryipáta.
6Tapeho Tarsíspe ha pene rasẽ pukúke, peẽ peikóva yguasu rembe’y rupi.
7Kóva piko ndaha’éi pe táva horyeteva’ekue ha ymaiteguare oñemopu’ãva’ekue. Ijypykuéra oñemosarambi ha oñemohendáva tetã ambuépe.
8Máva piko ojapouka ko’ã mba’e Tíro rehe. Tíro omondo voi imbruvichakuéra ambue tetãnguérape iñemuharakuéra ndive ha upépe oñemomba’eguasuva’ekue ha oiko imburuvichakuéra ramo.
9Ñanderuete, yvága atykuéra Jára, péicha ojapoukava’ekue, omotĩ hag̃ua opaite oñembotuichávape, ha oity hag̃ua yvy rehe umi oñemoherakuã porãvape.
10Peẽ, Tarsis pegua, pehasa pene retã rupi pe ysyryguasu osyry háicha, ndaiporivéima pendejokokuaáva.
11Ñanderuete voi oipyso ipo pe yguasu ári, ha omboryryipa umi tetãme. Ñanderuete he’i voi umi táva oñemongoráva Canaan retãme, oñehundipataha.
12Ha he’ive: Nderevy’amo’ãvéi, nde Sidon rajy, kuñataĩ rejejopy asyvareína. Epu’ã ehasa Chíprepe, ha upépe nde nderepytu’umo’ãi avei.
13Ema’ẽna umi Caldeaygua retã rehe. Pe tetã péva yma ndaiporiva’ekue, Asiriayguakuéra ohejára’e ijyvy mymba ñarõ oiko hag̃ua ipype. Caldeayguakuéra katu omopu’ã hóga yvatekuéra (tórre) ombopoguy hag̃ua Tíro táva tápiape.
14Pejahe’o puku barcoguasukuéra Tarsis pegua, pende táva mbarete oñehundíma.
15Ha ojehuva’erã upe ára upévape, Tírogui oikóta tesarái 70 áño pukukue aja, ku tetã ruvicha oikove puku háicha. Ha umi 70 áño haguépe, Tíro opurahéita ku kuña reko vai opurahei háicha:
16Ejapyhy pe árpa ha ejere jere pe táva rehe, nde kuña reko vai reikómava tesaráipe; upévare epurahéi porãkena, ha epurahéi jevy jey, toĩ jevy mandu’a nderehe.
17Ha ojehuva’erã umi 70 áño haguépe, Ñanderuete oñandu jevýta Tírope; ha oñepyrũ jevýta omomba’eñemu, ha oñepyrũta oñemboheko vai jevy kuña reko vaícha mayma tetã oĩva ndive yvy apére.
18Hembiapo repykue hembýva katu oñemboykéta Ñanderuetépe g̃uarã; noñembyatýi ha noñeñongatumo’ãvéi, oñeme’ẽmbáta umi omba’apóva Ñanderuetépe g̃uarã, okaru porã hag̃ua hyg̃uatã meve ha oñemonde porã hag̃ua hese.
Who We AreWhat We EelieveWhat We Do
2025 by iamachristian.org,Inc All rights reserved.
