Isaías 53 - Biblia en Guaraní - ?anderuete ?e’? Por? 2015

1Máva piko oguerovia ore ñe’ẽ, ha mávape g̃uarã piko ojehechaukava’ekue Ñanderuete pu’aka.

2Ha’e okakuaa henondépe ku mba’e roky pyahúicha, ha yvyra rapóicha yvy perõme, Ha’e naiporãi ha ndoguerekói ijehe mba’e iporãva ñama’ẽ hag̃ua hese. Hova ha hete rehe ndaipóri mba’eve iporãva ñande jaipotaiterei hag̃uáicha.

3Hetãygua otĩ ichugui ha oñemomombyry ichugui. Ha’e ningo peteĩ kuimba’e ohasa asyetéva ha oikóva jepy’apýpe; hetãyguakuéra oñomi hova ichugui, upévare avave noma’ẽséi hese ha ñande ñañemboyke avei ichugui.

4Añetehápe Ha’e ogueraha ñane mba’asykuéra, ha ohasa avei ñane rembiasa asy; ñande katu ñaimo’ã Ñanderuete omboyke, ohavira ha omotĩndy hague ichupe, (Hesu Crísto).

5Ojekutu ichupe ñane rembiapo vai rupi ha oñenupã vaipa ichupe Ha’e oñemoangaipa haguére ñane rendaguépe, Ñanderuete ohavira ichupe ñande jahupity hag̃ua ipy’aguapy, ijekutukue rupi ñande jakuera hag̃ua avei umi mba’e rupi.

6Mayma ñandekuérava japia joaite tape porãgui ku ovecháicha, peteĩteĩva opia ha oho hape rehe; Ñanderuete katu omoĩ hi’ári (Hesu Crísto) ñane rembiapo vaikue (angaipa) repy.

7Oñembosarái ramojepe hese ha Ha’e oipy’apy vaiete ramojepe, Ha’e ndoipe’ái ijuru, ku ovecha ra’yrusúicha ojegueraháva ojejuka hag̃uáme okirirĩete avei; ha ku ovecha oĩ háicha iñapĩhanguéra renondépe, okirirĩete ha ndojejurupe’ái.

8Jepokuapýpe ojegueraha ichupe ombojovake hag̃ua hekope’ỹ; hetãyguakuéra apytépe mávapa ohechakuaa ko’ã mba’e. Oñemondoro ichupe yvyarigua oikovéva apytégui ojejuka hag̃ua, che retãyguakuéra rembiapo vai rehe.

9Ha’ekuéra ojuka ichupe tekove ñaña apytépe, ha hetekue oñeñotỹ ipirapire hetáva ndive, Ha’e ndojapói ramojepe mba’eve ivaíva, ha ijurúpe ndaipóri ramojepe japu.

10Upeichavéramo jepe, Ñanderuete oipy’apy ichupe, oñapytĩ ichupe jehasa asy poguýpe. Ha ikuave’ẽmby heko potĩ rupi Ha’e omoingove yvyariguakuérape, Ha’e ohecháta iñemoñare oikove pukútaha, ha Ñanderuete rembipota ojejapopáta hekoitépe Ha’érupi.

11Hi’ánga ohasa asyete rire Ha’e ohecháta hembiapo hi’a porã, ha ovy’áta ikuave’ẽmby porã rupi. Ha’e, pe Heko potĩva omopotĩ heta yvyariguápe hembiapo vaígui ha umía Ha’e voi ogueraháta ijapére.

12Upévare Ñanderuete omohendáta ichupe umi karaiguasu apytépe, ha umi imbaretéva ndive omboja’o hag̃ua hembiapo repykue, oñohẽ hekove ha omanóvo Ha’e ogueraha ijapére heta yvyarigua rembiapo vai ha ojepapa ichupe heko vaíva apytépe Ha’e oñembo’e ramojepe hekove vaíva rehe.