1Upévare che hermanokuéra heko potĩva, Ñanderuete ohenoimava’ekuépe imba’erã ramo, pema’ẽ porãke Hesu Crísto rehe, Ñanderuete ombouva’ekue pa’iguasu ramo, jajerovia hag̃ua hese.
2Hesu Crísto ojapo hekoitépe Ñanderuete rembipota, Moises ojapopa haguéicha avei hekoitépe Ñanderuete rembipota ojeroviáva apytépe.
3Hesu Crísto katu oñemomba’eguasuve Moisésgui, oñemomba’eguasuve háicha pe óga apohare pe ógagui.
4Opaite óga ningo ijapohare, pe ojapova’ekue opaite mba’e katu ningo Ñanderuete voi.
5Moises ojapo hekoitépe opaite Ñanderuete rembipota, opaite ojeroviáva apytépe ha’e oikova’ekue uvei tembiguái ramo, oikuaauka hag̃ua Ñanderuete rembipota ha hembiapoukapy, ojehai háicha Moises kuatiañe’ẽme.
6Hesu Crísto katu ojapo hekoitépe Ñanderuete rembipota ita’yratee ramo opaite Ñanderuete rogayguakuéra apytépe, ha pe óga Ñanderuete omopu’ãvahína ñande voi, jajerovia ramo vy’apópe hese ha ñaha’ãrõkuaa ramo umi mba’e ñambo’etevañaína ipaha peve.
Anítei pepoi Hesu Crístogui7Upévare pe Pytu Porãmbáva he’i: Ko’ág̃a pehendu ramo pende Ruete ñe’ẽ,
8anítei pemohatã pene ñe’ã (py’apy), Israelguakuéra ojapo haguéicha, oñemoĩvo pende Ruete rehe ha oipy’ara’ãvo ichupe desiértope,
9upépe pende ypykuéra chepy’ara’ãva’ekue ohecha ramojepe che milagrokuéra 40 áño pukukue, he’i pende Ruete, (Salmokuéra 95,7-11; Números 20,2-5).
10Upévare Che chepochyva’ekue hendivekuéra, ha ha’e: Ipy’amokõi tapia hikuái, ha ndoikuaaséi che rape,
11upévare Che ha’e pochyhápe: Ndoikemo’ãi hikuái che pytu’uha rendápe, (Números 14,21-23).
12Pema’ẽke, che hermanokuéra, anítei peẽ avei pendepy’amokõi ha pepoi Ñanderuete oikovévagui.
13Peñomokyre’ỹ uvei opaite árape, oĩ aja perdon arakuéra, ani hag̃ua avave pende apytégui oñembopy’ahatã ni pe angaipa penembotavy.
14Ñande, Crísto reheguáva, jajejoko hatãkena ñande jerovia rehe ipaha peve, jarekóva iñepyrũha guive,
15upévare oje’e: Ko árape pehendu ramo pende Ruete ñe’ẽ, anítei peñembopy’ahatã avei, ojapo haguéicha Israelguakuéra oñemoĩ ramoguare pende Ruete rehe, (Salmokuéra 95,7-11).
16Máva piko ra’e umi oñemoĩva’ekue Ñanderuete rehe. Ndaha’éipa ra’e opaite umi osẽva’ekue Moises ndive Egíptogui.
17Ha máva ndive piko Ñanderuete ipochyraka’e 40 áño pukukue. Umi oñemoĩva’ekue Ñanderuete rehe desiértope, upévare he’õngue opyta avei desiértope.
18Ha mávape piko ome’ẽ iñe’ẽ ndoikemo’ãiha ipytu’uha rendápe. Umi naiñe’ẽrenduiva’ekue desiértope ndoikemo’ãi ipytu’uha rendápe.
19Ha upéicha jahecha ha’ekuéra ndaikatúi hague oike Ñanderuete pytu’úpe ndojeroviáigui hikuái hese.
Who We AreWhat We EelieveWhat We Do
2025 by iamachristian.org,Inc All rights reserved.
