Salmokuéra 136 - Biblia en Guaraní - ?anderuete ?e’? Por? 2015

Pemomba’eguasu Ñanderuetépe, Ha’e ipy’a porãgui

1Pemomba’eguasu Ñanderuetépe, Ha’e ipy’a porã ha imborayhu ndopamo’ãi araka’eve.

2 Peagradece Ñanderuete, Ñandejára guasuetépe, imborayhu ndopamo’ãi araka’eve.

3Pemomba’eguasu ore Járape, Ha’e oiko opaite ambue jára ári, ha imborayhu ndopamo’ãi araka’eve.

4Ha’eñoiténte ojapo milagrokuéra, ha imborayhu ndopamo’ãi araka’eve.

5Arandupópe Ha’e ojapova’ekue umi yvága, ha imborayhu ndopamo’ãi araka’eve.

6Ha’e ningo omboguapy pe yvy yeta ári, ha imborayhu ndopamo’ãi araka’eve.

7Ha’e ojapova’ekue umi mba’e ndetuicháva ohesape hag̃ua: Kuarahy ha jasy, ha imborayhu ndopamo’ãi araka’eve.

8Pe kuarahy Ha’e ojapo, oisãmbyhy hag̃ua pe ára, ha imborayhu ndopamo’ãi araka’eve.

9Ha’e ojapo avei pe jasy ha mbyjakuéra, oisãmbyhy hag̃ua pe pyhare, ha imborayhu ndopamo’ãi araka’eve.

10Ha’e ojukava’ekue Egiptoygua ra’y ypykuérape, ha imborayhu ndopamo’ãi araka’eve.

11Ha’e oguenohẽva’ekue Israelguakuérape ijapytégui, ha imborayhu ndopamo’ãi araka’eve.

12Po mbarete ha jyva jepysopópe oikohína Ha’e, ha imborayhu ndopamo’ãi araka’eve.

13Pe Yguasu Pytã (Mar Rójo) omboja’ova’ekue imbyte rupi, ha imborayhu ndopamo’ãi araka’eve.

14Ha imbyte rupi ombohasava’ekue Israelguakuérape, ha imborayhu ndopamo’ãi araka’eve.

15Ha’e oityva’ekue faraónpe isoldádo aty tuicha ndive Yguasu Pytãme, ha imborayhu ndopamo’ãi araka’eve.

16Ha’e oñangareko hetã rehe oguata jave desiértoguasu rupi, ha imborayhu ndopamo’ãi araka’eve.

17Ha’e ohundiva’ekue tetã ruvichaguasukuérape, ha imborayhu ndopamo’ãi araka’eve.

18Ha’e ojukava’ekue tetã ruvicha imbareteitereívape, ha imborayhu ndopamo’ãi araka’eve.

19Ha’e ojukava’ekue Sehon, Amor retã ruvichápe, ha imborayhu ndopamo’ãi araka’eve.

20Ha’e ojukava’ekue Og, Basan retã ruvichápe, ha imborayhu ndopamo’ãi araka’eve.

21Ha’e ome’ẽ Israélpe ijyvy imba’etee ramo, ha imborayhu ndopamo’ãi araka’eve.

22Ñanderuete ome’ẽ hembiguái Israélpe ijyvyrã, imba’etee ramo, ha imborayhu ndopamo’ãi araka’eve.

23Ha’e imandu’ahína ñande ñaime vaiete jave, ha imborayhu ndopamo’ãi araka’eve.

24Ha’e ñaneguenohẽ ñanderayhu’ỹva poguýgui, ha imborayhu ndopamo’ãi araka’eve.

25Ha’e ningo omongaru maymáva oikovévape, ha imborayhu ndopamo’ãi araka’eve.

26Pemomba’eguasu Ñanderuetépe yvága pegua, ha imborayhu ndopamo’ãi araka’eve.