1Nde, ore Ruete, ore apysakuéra rupive rohenduva’ekue, ore rukuéra omombe’uva’ekue oréve pe tembiapo rejapova’ekue hi’arakuérape, umi ára ymaguarépe.
2Nde po rupi remosẽmbava’ekue ambue tetãnguérape, ha hendaguépe remoĩ ore rukuérape; rehundi umi tetãyguápe, ha ore rukuéra oiko hendaguépe.
3Noñemomba’éiva’ekue ko yvy rehe ikyse puku rupive, ha ipyapykuéra noipytyvõi ichupekuéra, nde pu’aka rupi, nde pyapy mbarete rupi ha nde rova ohesapéva rupivénte katu, Nde rehayhu haguére Israelguakuérape.
4Che Ruete, Nde ningo che retã ruvicha, embou jevýna ne ñepytyvõ Jacóbope g̃uarã.
5Nderupive roity umi orerehe ija’e’ỹvape, nde rérape ropyrũmba umi opu’ãvape orerehe.
6Ndajeroviamo’ãi che guyrapa rehe, térã che kyse pukúre nachepytyvõmo’ãigui.
7Nde voi ningo oresalva umi orerehe ija’e’ỹvagui, ha remotĩ umi orerayhu’ỹvape.
8Romboetéta Ñanderuete rembiapo, ha opaite árape romomba’eguasúta héra guasuete. Selah
9Nde katu oremboyke, ha ropyta roñemotĩ, neresẽigui ore soldádo aty ndive.
10Oremboguevi umi orerehe ija’e’ỹva renondépe, ha umi orerayhu’ỹva omondapa ore mba’ekuéra.
11Nde oreme’ẽ ipópe ku ovecha ojererahávaicha ojejuka hag̃uáme ha oremosarambi tetãnguéra apyte rupi.
12Ha reme’ẽ reiete ningo ne retã, nderejeruréi hese mba’eveichagua hepykue.
13Nde oremotĩ umi ore jere rupi oikóva renondépe, oñembohory ha opuka hag̃ua orerehe ore retã ypy peguáva.
14Nde oremotĩ tetãnguéra apytépe, ha’ekuéra oñembohory orerehe.
15Ko’ẽ ko’ẽ rehe che añemotĩ, ha py’a tarova oñu’ã che rekove.
16Ahendu opaite árape umi oñe’ẽvaíva cherehe ha umi cherehe ija’e’ỹvape ahecha opaite árape ha ahendu iñembohorykuéra.
17Opaite ko’ã mba’e ojehu oréve, ore katu ndaoreresaráiri ndehegui, ha ndoropoíri ne ñe’ẽme’ẽgui.
18Ore ñe’ã ndoguevíri hapykuere gotýo, ha ore guata noñemboykéi nde rapégui.
19Nde katu orembohasa asy umi aguaraguasu oikoha rupi, ha Nde oreñu’ã ñemano kuarahy’ã reheve.
20Oreresarái rire ore Jára réragui, térã romopu’ã rire ore po ambue járape,
21nde rehechakuaava’erãmo’ã, Nde voi reikuaapágui pe yvyarigua py’apýpe oĩva guive.
22Ha nderehehápe katu ha’ekuéra orejuka oréve opaite árape, rojeguereko umi ovecha ojeguerahátavaicha ojejuka hag̃uáme.
23Ñanderuete orerendumína, mba’érehe piko rekirirĩreína. Orerendumína, anítei reñemomombyry orehegui opaite árape.
24Mba’érehe piko reñomi nde rova, ha nderesarái ore jepy’apy ha ore jejopy asýgui.
25Ore ánga ojáma yvýre, yvy timbo rehe, ha ore rete yvýre ojapajeréi.
26Epu’ãmína orepytyvõ hag̃ua, oreguenohẽmína ko jehasa asýgui, nde poriahuvereko rupi.
Who We AreWhat We EelieveWhat We Do
2025 by iamachristian.org,Inc All rights reserved.
