2 Samuel 5 - Biblia en Guaraní - ?anderuete ?e’? Por? 2015

Davídpe oñemoĩ Israel retã ruvicha ramo

1Uperire opaite Israel tríbu ou David rendápe Hebrónpe ha oñe’ẽ hikuái hendive, ha he’i ichupe: Roĩ ko’ápe, ore ningo ne kangue ha nde ro’o.

2Kueheve árama voi, Saul oresãmbyhývo gueteri, nde voi regueraha Israel retãyguakuéra ñorãirõme ha regueru jevy. Ko’yteve katu Ñanderuete he’íkuri ndéve: Nde reñangarekova’erã che retã Israel rehe, ha ndetaha Israel retã ruvicha.

3Péicha opaite Israel karai ancianokuéra oñe’ẽ tetã ruvichápe, Hebrónpe, ha tetã ruvicha David oñemoĩ peteĩ ñe’ẽme hendivekuéra Hebrónpe Ñanderuete renondépe; péicha omoĩ hikuái avei Davídpe tetã ruvicha ramo opaite Israel tríbu ári.

4David oguerekókuri 30 áño oñepyrũ ramoguare oisãmbyhy, ha oisãmbyhy 40 áño pukukue tetã ruvicha ramo.

5Hebrónpe David oisãmbyhy Juda ári 7 áño ha 6 jasy, ha Jerusalénpe 33 áño opaite Israel ha Juda ári.

David omoĩ ipoguýpe Sion táva

6Upérõ tetã ruvicha iñirũnguéra ndive oho Jerusalénpe oikohápe gueteri umi Jebusgua; ha’ekuéra katu oñe’ẽ Davídpe ha he’i: Nde ndereikemo’ãi ko táva kóvape, hesatũva ha ikarẽva jepe nemosẽta ko táva kóvagui.

7David katu omoĩ Sion ipoguýpe ha péva rire oñembohéra David táva.

8Ha David he’i pe árape: Mávapa ojupise yrape itakuaguasu rehegua rupi ojuka hag̃ua Jebusgua ikarẽ ha hesatũvape, umíva ningo ndacherayhuiete voi. Pévagui oje’e: Hesatũ ha ikarẽva ndoikeiva’erã ógape.

9Ha David opyta oiko hag̃ua Siónpe (Jerusalénpe) ha omongora porãve gueteri pe táva, upévagui oñembohéra David táva ha omopu’ã pu’ãve ijerekue rupi Milo guive hyepy gotyove.

10Ha David oñakãrapu’ã pu’ãve ha oñembotuicha tuichave ohóvo, Ñanderuete; pe yvaga atykuéra Jára oĩgui hendive.

Hiram omondo hemimondo David rendápe

11Hiram, Tíro retã ruvicha, omondo avei hemimondo David rendápe, omba’apokuaáva yvyra ha ita rehe omopu’ã hag̃ua David rogarã, ha avei umi oguerúva cédro.

12Ha David ohechakuaa Ñanderuete omoĩ hatãmaha ichupe Israel retã ruvicha guapyhápe ha ombotuichamaha ichupe hetã Israel rehehápe.

David ra’ykuéra onaceva’ekue Jerusalénpe

13Ha David ova rire Hebróngui Jerusalénpe omenda jevy ambue kuñakuéra rehe ha oñemokuña hetave avei, upéicha onaceve ita’ýra ha itajyrakuéra.

14Ko’ã mitã onace ichupe g̃uarã: Samúa, Sobab, Natan, Salomon,

15Ibhar, Elisúa, Nefeg, Jafía,

16Elisama, Eliada ha Elifélet.

David ipu’aka Filisteayguakuéra rehe

17Filisteayguakuéra ohendúvo ojeporavo hague Davídpe tetã ruvicha ramo opaite Israel tríbu ári, ha’ekuéra oñembyaty ojeity hag̃ua David ári, ha’e ohendúvo péva oguejy itáva oñemongora haguégui,

18Ha Filisteayguakuéra ou oñemyasãi Refain yvypépe (ñuguasúpe).

19Upéramo David omba’eporandu Ñanderuetépe, ha he’i: Ajeitýtapa Filisteayguakuéra ári ha remoĩtapa ichupekuéra che pópe. Ha Ñanderuete he’i Davídpe: Tereho, añetehápe Che amoĩta Filisteayguakuérape nde pópe.

20Ha David ou Baalperazímpe, ha upépe David ipu’aka hesekuéra, ha he’i: Ysyry pochýicha Ñanderuete ogueraha cherehe ija’e’ỹvape che renondégui. Upévare ombohéra pe tenda pévape Baalperazim.

21Filisteayguakuéra oheja upépe ijára gua’u ra’ãnga, umía David ha iñirũnguéra oguerahapa.

22Filisteayguakuéra ou jevývo katu, ha oñemyasãi Refain yvypépe.

23Ha David omba’eporandu jevy Ñanderuetépe. Ha’e he’i ichupe: Ani rejupítei henonderãme, ejere katu ha ejeity hi’arikuéra hapykuéguio.

24Ha rehendúvo ku oguatáva py ryapúicha umi yvyra ru’ãme, upérõ ejeity hi’arikuéra; pende Ruete voi osẽta ne renonderãme ojuka hag̃ua Filisteayguakuérape.

25Ha David ojapopa, Ñanderuete he’i haguéicha ichupe; ha ojuka Filisteayguakuérape Geba guive og̃uahẽ meve Gezer peve.