1 Réyes 15 - Biblia en Guaraní - ?anderuete ?e’? Por? 2015

Abiam oisãmbyhy

1Jeroboam, Nebat ra’y, Israel retã ruvicha oisãmbyhývo 18 áno, Abiam oñepyrũ oisãmbyhy Juda retãme.

2Ha’e oisãmbyhy mbohapy áño Jerusalénpe. Isy réra Maaca, Absalon rajy.

3Ha’e ojapopa umi mba’evai itúva ojapo haguéicha ha ndaipy’a porãi Ñanderuete ndive g̃uarã, itúva David py’apýicha.

4Ñanderuete ohayhúgui Davídpe oheja peteĩ iñemoñare oisãmbyhy hag̃ua itúva rendaguépe Jerusalénpe.

5David ojapo mba’eporãva Ñanderuete renondépe, ha hekovépe ndojeíri Ñanderuete rapégui. Pe Urías, Hetgua ndiveguare cásomante.

6Roboam ha Jeroboam oñorãirõ oikove aja pukukue hikuái.

7Ambue Abiam rembiapokue, ha mayma mba’e ojapova’ekue, ojehaipa Juda retã ruvichakuéra rembiapokue kuatiañe’ẽme. Ha pe ñorãirõ Abiam ha Jeroboam mbytépe ndopái oikove aja hikuái.

8Ha Abiam omano rire, oñotỹ ichupe hikuái David távape, ha Asa, ita’ýra, oisãmbyhy hendaguépe.

Asa oisãmbyhy

9Jeroboam, Israel retã ruvicha oisãmbyhývo 20 áño, Asa oñepyrũ oisãmbyhy Juda retãme.

10Ha’e oisãmbyhy 41 áño Jerusalénpe, ijarýi héra Maaca, Absalon rajy.

11Asa ojapo mba’e iporãva Ñanderuete renondépe, itúva David ojapo haguéicha.

12Ohekýi Juda yvýgui Sodomaygua rembiapo vaiete, ha oipe’a umi jára gua’u ra’ãnga ituvakuéra ojapova’ekue.

13Asa ndohejavéi ijarýi omandave hag̃ua, ojapógui Asera jára gua’u ra’ãnga. Asa ombyai avei ijarýi jára gua’u ra’ãnga, ha ohapy Cedron ysyry rembe’ýpe.

14Umi ñemomba’eguasu yvy yvaténte ndojepe’ái. Upeichavéramo jepe, Asa ipy’aporã Ñanderuete ndive g̃uarã oikove aja pukukue.

15Ha’e omoinge avei Ñanderuete rógape umi jopói itúva ha ha’e voi ome’ẽva’ekue: Óro, pláta ha jeguaka.

Asa ha Ben-adad oñemoĩ peteĩ ñe’ẽme

16Asa ha Basa, Israel retã ruvicha, oñorãirõ oñondive ha’ekuéra oikove aja pukukue.

17Basa, Israel retã ruvicha, ojupi ojeity hag̃ua Judayguakuéra ári, ha omopu’ã Rama, opa hag̃ua pe jeguata ijyvy rembe’y rupi.

18Upémaramo Asa oguerahauka opaite óro ha pláta oñeñongatuva’ekue gueteri Ñanderuete rógape ha tetã ruvicha rógape, ha oguerahauka hembiguaikuéra rupi Síria retã ruvicha Ben-adádpe, péva Tabrimon ra’y, Hezion ra’yre, oikóva Damáscope, ha he’iuka ichupe:

19Ñañemoĩna peteĩ ñe’ẽme, che ru ha nde ru oiko haguéicha. Péina ápe che amondo ndéve jopói pláta ha oroguiguáva ha tereho emondoro ne ñemopeteĩ Basa, Israel retã ruvicha ndivegua, ha’e opoi hag̃ua chehegui.

20Ha Ben-adad oñomoneĩ tetã ruvicha Asa ndive ha omondo isoldádo ruvicha ojeity hag̃ua Israel ári, ha ombopoguy ko’ã táva Ijon, Dan, Abelbet-maaca, Cinerot ha Neftali yvy tuichakuépe.

21Ha Basa oikuaávo ko’ã mba’e nomopu’ãvéi Rama, ha opyta Tirsápe.

22Upémaramo tetã ruvicha Asa, ombyatyuka opaite Judayguápe, oheja’ỹre avavetépe, ha ohekýi ita ha yvyra Ramágui, Basa oiporuva’ekue ha umi mba’épe tetã ruvicha Asa omombarete porã Geba, Benjamin pegua, ha Mizpa.

Asa ñemano

23Ambue hembiapo Asa ojapova’ekue, ha umi táva ha’e omopu’ãva’ekue ha herakuã porã ojehaipa Juda retã ruvichakuéra rembiapokue kuatiañe’ẽme. Ha ituja rire ou ipy rasy.

24Ha Asa omano rire, oñeñotỹ ichupe itúva David távape, ha ita’ýra Josafat oisãmbyhy hendaguépe.

Nadab oisãmbyhy

25Asa, Juda retã ruvicha, oisãmbyhývo mokõi áño, oñepyrõ oisãmbyhy Nadab, Jeroboam ra’y, Israel retãme mokõi áñonte.

26Ha ojapo mba’e ivaíva Ñanderuete resa renondépe, ha oiko itúva rape vai rehe, ha omoangaipa Israelguakuérape.

27Ha Basa, Ahías ra’y, Isacar tríbugui, opu’ã ñemi Nadab rehe ha oikutu ichupe Gibetónpe, Filisteaygua táva; Nadab ha opaite Israelgua omongora jave Gibetónpe.

28Basa ojuka Nadábpe, Asa, Juda retã ruvicha oisãmbyhývo mbohapy áño, ha Basa oisãmbyhy Nadab rendaguépe.

29Ha Basa ojevývo hetãme ojukapaite Jeroboam rogayguakuérape, oheja’ỹ rehe avavete, Ñanderuete he’i haguéicha hembiguái Ahías, pe Siloygua rupi,

30Jeroboam angaipa rehe ha omoangaipa haguére avei Israélpe, péva ombopochy Ñanderuetépe.

31Ambue Nadab rembiapokue ojapova’ekue guive, ojehaipa Israelgua retã ruvichakuéra rembiapokue kuatiañe’ẽme.

32Asa ha Basa, Israel retã ruvicha, oñorãirõ oñondive oikove aja pukukue.

Basa oisãmbyhy

33Asa, Juda retã ruvicha oisãmbyhývo mbohapy áño, Basa, Ahías ra’y, oñepyrũ oisãmbyhy hag̃ua Israel ári Tirsápe, ha oisãmbyhy 24 áño.

34Ha ojapo mba’e ivaíva Ñanderuete resa renondépe, ha oiko avei Jeroboam rape rehe, ha omoangaipa avei Israelguakuérape.