1He’i chéve Ñanderuete: Moises ha Samuel oñembo’y ramojepe che renondépe oñembo’eve hag̃ua hesekuéra Che ndaiporiahuverekomo’ãi ko tetã kóvape, amosẽ uvei ichupekuéra che ypýgui, ha tohopa hikuái.
2Ha oporandu ramo ndéve hikuái: Mamo piko rohóta, eréta ichupekuéra, péicha he’i yvága Jára: Upe ojeporavóva omano hag̃ua tomano; upe ojeporavóva omano hag̃ua kyse pukúpe tomano kyse pukúpe; upe ojeporavóva omano hag̃ua ñembyahýi rupi tomano ñembyahýi rupi, ha upe ojeporavóva ojegueraha hag̃ua jepokuapýpe tojegueraha avei jepokuapýpe tetã mombyrýpe.
3Che amboúta hi’arikuéra irundy jehavira, he’i pende Ruete: Kyse puku ojuka hag̃ua, jagua saite omondyryry hag̃ua, ñapykani ha mymba ñarõ ho’u hag̃ua hetekuéra.
4Péva ajapóta hesekuéra mayma tetã yvy ape arigua oñemondyiete hag̃ua, ha oikuaa hag̃ua mba’épa Manases, Ezequías ra’y, Juda retã ruvicha, ojapo vaieteva’ekue Jerusalénpe.
5Ha nde Jerusalen máva piko upéramo ndeporiahuverekóne. Máva piko ipy’a ñembyasýne nderehe, máva piko oúta ojerure asy ndepy’aguapy hag̃ua.
6Nde voi repoi chehegui, he’i pende Ruete; ha reñemomombyry haguére chehegui Che aipysóta ndeári che po rohundi hag̃ua; chekane’õma Che aiporiahuvereko jevy jey hag̃ua.
7Amosarambíta ichupekuéra ha aguerahaukáta ichupekuéra ambue tetã tavakuérape, aheja che retã imemby’ỹre, upeichavéramo jepe ha’ekuéra ndojevýi hape vaígui.
8Umi kuña imenave’ỹva oñemboheta hetave yvyku’i yguasu rembe’y peguágui; asajekuépe aguerúta hi’arikuéra ñehundiguasu omano hag̃ua sykuéra imemby ndive, amboúta ñemondýi ha kyhyjeguasu itavakuéra ári.
9Ikangypáma pe kuña imembyva’ekue 7, hi’ánga henyhẽ mba’embyasýgui, ig̃uaig̃ui mboyve og̃uahẽma hi’ára paha, oñemotĩ ha ipy’a tarovaite; ha imemby hembymíva ári aitýta umi hesekuéra ija’e’ỹva kyse puku, he’i pende Ruete.
Jeremías oñembyasyete10Angái, angái, chehegui, nde che symi, chemoheñoiva’ekue aiko’ínte ningo oñemoĩmbaháre cherehe. Avavégui ndaiporúi mba’eve ha avavépe ndaiporukái mba’eve, upeichavéramo jepe opavaveténte chemaldeci.
11Ñanderuete he’i chéve: Añetehápe Che roguenohẽta jejopy vaígui, nde rehasa porã hag̃ua. Upe jehasa asy árape Che voi rosalváta.
12Oĩnepa ikatúva omopẽ pe hiérro ha brónce nórte peguáva.
13Opaite Juda rembiapo vaikuéra rehe, amondaukáta ne mba’erepyeta ha umi mba’eporã ojejohúva guive ne retã ryepýpe; reiete ojeguerahapava’erã ndehegui.
14Ha ndéve rome’ẽta nderehe ija’e’ỹva rembiguái ramo, peteĩ tetã ndereikuaáivape; tata rendýicha hendy che pochy pendeári.
Jeremías oñembo’e Ñanderuetépe.15Nde ningo che Ruete, reikuaapa voi, nemandu’ána cherehe, cheandúna, emyengoviána umi cherehe ija’e’ỹvape hembiapo vai. Anítei amano avei nde pochyha árape; reikuaa porã ningo nderayhupápe che ahasa asyeteha.
16Ne ñe’ẽ che añamindu’úva chembovy’a ha chembohory, che ningo ne mba’etee, ha Nde che Ruete, Yvága Atykuéra Jára, tapia g̃uarã reikóva.
17Ndaguapýi avy’a hag̃ua umi oñembohorýva apytépe, che añoiténte aguapy, Nde chemyenyhẽgui nde pochýgui.
18Mba’érehe piko ndopái che ñembyasy, ha ko che mba’asy kóva chembopy’atarova ha ndaikatúi oñepohãno. Reiko piko chéve g̃uarã, ku ysyry hypa reívaicha, ku yvu hi’y’ỹváicha.
Ñanderuete ombohovái19Upéramo Ñanderuete he’i: Rejevyse ramo che rendápe, Che romog̃uahẽ jevýta ha che renondépe reiméta; ha reipe’a ramo umi mba’e iporãva umi mba’e ky’a vai apytégui, reikóta chéve che juru ramo. Ha’ekuéra tojevy ndéicha, nde katu ani reiko ha’ekuéraicha.
20Che romoĩta ko tetã kóvape g̃uarã ku korapyjere bronceguiguávaicha ha ojeitýta ramojepe hikuái ndeári, ndaipu’akamo’ãi nderehe; Che aĩgui nendive añangareko porã hag̃ua nderehe ani hag̃ua ojehu ndéve mba’eve ivaíva, he’i nde Ruete.
21Che roipe’áta umi iñañáva poguýgui ha roguenohẽta umi iñarõva pógui.
Who We AreWhat We EelieveWhat We Do
2025 by iamachristian.org,Inc All rights reserved.
