Levítico 3 - Biblia en Guaraní - ?anderuete ?e’? Por? 2015

Kuave’ẽmby py’aguapy reheguáva

1Ha oñekuave’ẽse ramo kuave’ẽmby py’aguapy reheguáva, togueru peteĩ tymba, peteĩ tóro térã vaka iporãitéva pende Ruetépe g̃uarã.

2Upe oikuave’ẽséva tomoĩ mbarete ipo ikuave’ẽmby akã ári, ha oajúra kytĩva’erã pe óga jojohuha rokẽ renondépe; ha umi pa’i, Aaron ra’ykuérava, ohypýita huguykue pe kuave’ẽmby renda tápia jerekuévo.

3Upéi oikuave’ẽta pe kuave’ẽmby py’aguapy reheguáva, kuave’ẽmby hendýva ramo pende Ruetépe g̃uarã, ohapýta avei ikyrakue oĩva guive ipype,

4mokõive ipitikiri’ĩngue (riñon) ha ikyrakue oñu’ãva pitikiri’ĩngue, pe perevy (bázo), ha pe py’akue arigua kyrakue.

5Ha Aaron ra’ykuéra omyendyva’erã pe jepe’a oĩva kuave’ẽmby renda ári ohapy hag̃ua pe kuave’ẽmby py’aguapy reheguáva, péva ningo kuave’ẽmby hyakuã porãva pende Ruetépe g̃uarã.

6Oñekuave’ẽ ramo kuave’ẽmby py’aguapy reheguáva omomba’eguasu hag̃ua pende Ruetépe, ojeporavokuaa avei peteĩ ovecha térã kavara, taha’e mácho térã kuña iporãitéva.

7Ha upe oikuave’ẽva ovecha ra’yrusu kuave’ẽmby ramo ogueruva’erã pende Ruete renondépe,

8omoĩ mbareteva’erã ipo ikuave’ẽmby akã ári, ha upéi oajúra kytĩva’erã pe óga jojohuha rokẽme; ha Aaron ra’ykuéra ohypýiva’erã huguy pe kuave’ẽmby renda jerekuévo.

9Ha pe kuave’ẽmby py’aguapy reheguágui ojehapyva’erã pende Ruetépe g̃uarã ikyrakue, oñu’ãva hyekue, ha huguaikue, ojepe’ava’erã hapoite guive,

10upéicha avei mokõive ipitikiri’ĩngue (riñon) ha ikyrakue oĩva guive hese, pe iperevykue (bázo) ha pe ipy’akue ikyrakue reheve.

11Ha pe pa’i omyendyva’erã ko’ã mba’e kuave’ẽmby renda ári; kóva omyatatĩ tembi’u hendýva ramo pende Ruetépe g̃uarã.

12Ha oikuave’ẽ ramo peteĩ kavara ikuave’ẽmby ramo, togueru pende Ruete renondépe,

13ha ipo omoĩ mbareteva’erã iñakã ári ha oajúra kytĩva’erã pe óga jojohuha renondépe; ha Aaron ra’ykuéra ohypyiva’erã huguykue pe kuave’ẽmby renda jerekuévo.

14Upéi ohapyva’erã kuave’ẽmby hendýva ramo pende Ruetépe g̃uarã: Hyekue kyrakue ha opaite kyrakue oĩva guive hyepýpe,

15mokõive ipitikiri’ĩngue ha ikyrakue oĩva hese, pe kyrakue oĩva iperevykue (bázo) rehe ha pe kyrakue oĩva ipy’akue rehe.

16Ha pe pa’i omyendyva’erã ko’ãva pe kuave’ẽmby renda ári tata rembi’u ramo ha kuave’ẽmby hyakuã asýva ramo pende Ruetépe g̃uarã; opaite ikyrakue pende Ruete mba’e meménte.

17Ko tembiapoukapy opyta opaite pene ñemoñarenguérape g̃uarã, mamo peikoha rupi, mba’eveichagua kyrakue ha mba’eveichagua ruguy ndape’uiva’erã.