2 Samuel 23 - Biblia en Guaraní - ?anderuete ?e’? Por? 2015

David ñe’ẽ paha

1Ko’ãva hína David ñe’ẽ paha. David, Isai ra’y, pe kuimba’e oñemopu’ãva yvateite, Jacóbo Jaratee oiporavova’ekuégui, opurahéi he’ẽ asy Israelguakuéra apytépe:

2Ñanderuete Pytu Porãitéva oñe’ẽ chérupi, ha iñe’ẽ oĩ che jurúpe.

3Israel Jaratee, oñe’ẽ chéve, Israel mo’ãhára oñe’ẽma chéve, Ha’e oisãmbyhyhína tetãnguérape ha oisãmbyhy hekópe umi okyhyjéva guivépe Ñanderuetégui.

4Péva ko’ẽju resakãicha, ku kuarahy mimbi pyhareve ijarai’ỹvéicha, ku ama omoheñóiva temitỹnguéra.

5Ndaupéichai piko che róga Ñanderuete renondépe; Ha’e oñembopy’apeteĩ chendive opaite árape g̃uarã, ha ã mba’e hekoitépe Ha’e omohenda porã; che salvación ha che rembipota Ha’e oheja heñói porã.

6Umi heko ñañáva katu oñemondoro ñuatĩcha, umíva avave ndojapyhyséi ipópe.

7Upe opokoséva hese ojekutu, yvyra puku akuápemante ojeity oity hag̃ua tatápe.

David irũnguéra ipy’aguasuvéva

8Ko’ãva hína umi ipy’aguasuvéva omoirũva’ekue Davídpe: Joseb-basébet, peteĩ Tacmongua, peteĩ mburuvichaguasu mburuvichakuéra apytépe; kóva omyakã umi mbohapy ipy’aguasuvévape; peteĩ jevy ha’e ojuka 800 hese ija’e’ỹvape ijyvyra puku akuápe.

9Kóva rire oĩ Eleazar, Dodo ra’y, peteĩ Ahohygua, peteĩ umi mbohapy ipy’aguasuvéva apytégui omoirũva’ekue Davídpe. Peteĩ jevy Filisteayguakuéra oñembyatyrõguare ojeity hag̃ua Israelguakuéra ári, opavave okañy,

10ko Eleazar kóvante katu opyta ha oha’ãrõ ichupekuéra ha oikutu Filisteayguakuérape ikane’õite peve, ha ipo ijapa peve ikyse puku rehe. Upe árape Ñanderuete ombopoguy Filisteayguakuérape Eleazar rupi; omono’õ hag̃uánte Filisteayguakuéra mba’e repykuénte, umi okañyva’ekue ojevy hikuái.

11Kóva rire oĩ Sama, Age ra’y, peteĩ Arargua. Filisteayguakuéra oñembyatýkuri Lehípe, oĩháme peteĩ kokue kumanda’i (lentéja) reheve, ha Israelguakuéra okañymbákuri Filisteayguakuéragui.

12Upémaramo ha’e oñembo’y pe kokue mbytépe oñorãirõ hag̃ua, ha ojuka umi Filisteayguápe; upépe Ñanderuete ohundi Sama rupi Filisteayguakuérape.

13Peteĩ ára mbohapy umi 30 ipy’aguasúva apytégui oguejy oñemono’õ jave ñemitỹnguéra ha og̃uahẽ hikuái David rendápe, Adulam itakuaguasúpe; ha umi Filisteaygua oñembyaty ha opyta Refaim cérro pa’ũme.

14Upejave David oĩhína pe tenda oñemombarete porãvape, ha Belénpe og̃uahẽ peteĩ Filisteaygua soldádo aty.

15Ha David he’i hi’ánga mbytete guive: Máva piko ikatu chemboy’u Belen rokẽ ykua peguarégui.

16Upémaramo ko’ã mbohapy ipy’aguasúva ojasuru Filisteayguakuéra atyhápe, ha oguenohẽ hikuái y Belen rokẽ ykuágui, ha ogueru hikuái Davídpe, ha’e katu ndoy’uséi, oñohẽnte Ñanderuetépe g̃uarã ha he’i:

17Taimombyry chehegui, ajapóvo péva Ñanderuete resápe. Amboy’únepa ko’ã kuimba’e ruguy oguerokyhyje’ỹre omoĩva’ekue hekove ipópe cherehehápe, ha ndoy’uséi. Ko’ã mbohapy ipy’aguasúva ojapo ko’ã mba’e.

18Abisai, Joab pehẽngue, Sarvia memby, omyakã ko’ã 30-pe. Ha’e omopu’ã ijyvyra puku akua 300 hese ija’e’ỹva rehe, ha ojukapa ichupekuéra, oñemoherakuã porã avei ichupe ko’ã mbohapy apytépe.

19Oñemoherakuã porãgui umi 30 apytépe, oñemoĩ ichupe huvicha ramo; nombojojáimante umi mbohapy tenondeguápe.

20Upéi Benaía, Joiada ra’y, peteĩ kuimba’e ipy’aguasuetéva avei, ha’e peteĩ Cabseelgua ha ojapo tuicha mba’e techapyrãva: Ha’e ojuka mokõi leõ Moábpe; ha ha’e ojepoi peteĩ yvykuápe ha upépe ojuka peteĩ leõ ho’a jave ama rayvi rypy’a árape.

21Ha’e ojuka avei peteĩ Egiptoygua, kuimba’e tuichaitévape; Benaía oguereko ipópe peteĩ yvyra po’i, oipe’a hese ija’e’ỹva ñorãirõ rembiporu ha ojuka ichupe ijyvyra puku akuápe.

22Ko’ã mba’e ojapo Benaía, Joiada ra’y, ha oñemoherakuãguasu avei ichupe umi mbohapy ipy’aguasúva apytépe.

23Herakuãguasu umi 30 apytépe, ndohupitýi katu umi mbohapy tenondeguápe. Ha David omoĩ ichupe umi hese oñangarekóva ruvicha ramo.

24Asael, Joab ryke’y, umi 30 apyte pegua; Elhanan, Dodo ra’y, peteĩ Belengua;

25Sama, peteĩ Harodgua; Elica, peteĩ Harodgua;

26Heles, peteĩ Peletgua; Ira, Iques ra’y, peteĩ Tecoaygua;

27Abiezer, peteĩ Anatotgua; Mebunai, peteĩ Husaygua;

28Salmon, peteĩ Ahohygua; Maharai, peteĩ Netofaygua;

29Héleb, Baana ra’y, peteĩ Netofaygua; Itai, Ribai ra’y, peteĩ Gibeaygua, Benjamin ñemoñaréva;

30Benaía, peteĩ Piratongua; Hidai, peteĩ Gaas ysyrypegua;

31Abialbon, peteĩ Bet-arabaygua; Azmavet, peteĩ Bahurimgua;

32Eliaba, peteĩ Saalbimgua; Jonatan, peteĩ Jasen ñemoñare;

33Sama, peteĩ Arargua; Ahiam, Sarar ra’y, peteĩ Arargua;

34Elifélet, Ahasbai ra’y, peteĩ Maaca ra’yre; Eliam, Ahitófel ra’y, peteĩ Giloygua;

35Hezrai, peteĩ Carmelgua; Paarai, peteĩ Arbigua;

36Igal, Natan ra’y, peteĩ Sobaygua; Bani, peteĩ Gadgua;

37Selec, peteĩ Amongua; Naharai, peteĩ Beerotgua oiko Joab, Sarvia memby, mo’ãha rerahahára ramo;

38Ira, peteĩ Jatírgua; Gareb, peteĩ Jatírgua;

39Urías, peteĩ Hetgua; 37 oñondivepa.