Ezequiel 46 - Biblia en Guaraní - ?anderuete ?e’? Por? 2015

1Péicha he’i pende Ruete: Pe okẽ korapy ryepygua, opytáva kuarahyresẽ gotýo, oñembotyva’erã umi 6 ára oñemba’apo aja, ha ojepe’ava’erã pe pytu’uha árape; ha avei pe jasyra’yha árape.

2Ha pe tetã ruvicha oikeva’erã pe okẽ hyepy gotyogua rupi, ha oñembo’y jave pe okẽme umi pa’i oikuave’ẽva’erã kuave’ẽmby ojehapypáva ha py’aguapy reheguáva ha pe mburuvichaguasu omomba’eguasu rire osẽ jevyva’erã pe okẽ pévarupi ha upéi noñembotyiva’erã ka’aru peve.

3Umi tetãygua omomba’eguasúva pende Ruetépe ojeityva’erã hova yvýre omomba’eguasúvo Ñanderuetépe pe okẽ ojeikehápe ha péva ojapova’erã opaite jepytu’uha árape ha jasyra’yha árape.

4Pe tetã ruvichaguasu oikuave’ẽta pende Ruetépe pe jepytu’uha árape 7 ovecha ra’yrusu iporãva, ha peteĩ ovecha mácho iporãva;

5ha ome’ẽvéta kuave’ẽmby ramo peteĩ éfa (22 lítro) trígo peteĩteĩ ovecha mácho reheve; ha peteĩteĩ ovecha ra’yrusu reheve peteĩ me’ẽmby ha’e oipota háicha ha oimeraẽ éfa reheve peteĩ hin (3,66 lítro) acéite.

6Ha pe jasyra’yha árape katu oikuave’ẽta peteĩ tóro ra’yrusu iporãitéva hymba aty apytégui, 6 ovecha ra’yrusu ha peteĩ ovecha mácho iporãva.

7Ha oikuave’ẽta peteĩ éfa (22 lítro) trígo pe tóro ra’yrusu reheve, ha peteĩ éfa peteĩteĩ umi ovecha mácho reheve; ha umi ovecha ra’yrusu reheve ipu’aka háichante ha peteĩ hin (3,66 lítro) acéite peteĩteĩ éfa reheve.

8Ha pe mburuvichaguasu oikeva’erã pe ogaguy pegua rokẽguasu rupi ha upévarupi osẽ jevyva’erã.

9Umi tetãygua katu oike vove pende Ruete rendápe pe areteguasúpe, kóicha ojapova’erã: Upe oikéva pe okẽ yvate gotyogua rupi osẽva’erã pe okẽ yvy gotyogua rupi, ha upe oikéva pe okẽ yvy gotyogua rupi osẽva’erã pe okẽ yvate gotyogua rupi; nosẽveimava’erã pe okẽ oike haguérupi, osẽva’erã pe okẽ henonde rovaigua rupínte.

10Ha pe tetã ruvicha oikeva’erã ijapytepekuéra oñembyaty rire; ha ha’e osẽvo ohasa pe okẽ oike haguérupi.

11Umi ambue arete ha ñembyatyha árape peikuave’ẽva’erã peteĩ éfa (22 lítro) peteĩteĩ tóro ra’yrusu reheve ha peteĩ éfa peteĩteĩva ovecha mácho reheve; ha umi ovecha ra’y reheve ipu’aka háichante; ha peteĩ hin (3,66 lítro) acéite peteĩteĩ éfa reheve.

12Ha pe mburuvichaguasu ijehegui oikuave’ẽse ramo kuave’ẽmby ojehapypátava térã py’aguapy reheguáva pende Ruetépe g̃uarã, ojepe’ava’erã ichupe pe okẽ oma’ẽva kuarahyresẽ gotýo, ha oikuave’ẽmba rire ku jepytu’uha árape ojapo haguéicha ha’e osẽ jevyva’erã pe okẽ oike haguérupi, ha oñembotyva’erã pe okẽ ha’e ohasa rire.

13Ha upéi ko’ẽ ko’ẽre rembosako’iva’erã peteĩ ovecha ra’yrusu iporãva ombotýmava peteĩ áño, kuave’ẽmby ojehapypáva ramo, pyharevekuépe oñekuave’ẽva’erã.

14Ha hendive oñekuave’ẽveva’erã mayma pyharevekuépe kuave’ẽmby ramo 3,66 lítro trígo ku’i porã ha 1,22 lítro acéite ombojehe’a hag̃ua pe trígo ku’i porã reheve; ko’ã mba’e peikuave’ẽta pende Ruetépe g̃uarã opaite árape, kóva opyta tembiapoukapy ramo.

15Ha pembosako’iva’erã pyharevekue jave peteĩ ovecha ra’yrusu, trígo ku’i ha acéite, kuave’ẽmby ojehapypáva ramo, ha péva pejapova’erã tapia g̃uarã.

16Péicha he’i pende Ruete: Pe mburuvichaguasu ome’ẽ ramo peteĩ lóte ita’ýrape imba’eitágui péva opyta tapia g̃uarã ichupe imba’etee ramo.

17Pe mburuvichaguasu ome’ẽ ramo imba’eitágui peteĩ lóte hembiguáipe ha’e ome’ẽ jevyva’erã ijarakuépe og̃uahẽ vove pe jepoi áño paha (50 áño haguépe) ha opyta jevyva’erã imba’e térã ita’yrakuéra mba’etee ramo.

18Pe tetã ruvicha katu ndojapyhyiva’erã mba’eve hetãyguakuéra yvy pehẽnguégui, ndoipe’aiva’erã mbaretépe ichuguikuéra imba’eteéva; pe tetã ruvicha ikatu ome’ẽ ita’yrakuérape ijyvyteégui peteĩ lóte, ndaikatuiva’erã katu omosẽ hetãyguápe iloteteévagui.

19Upéi pe ángel chegueru pe okẽ ojeikeha rupi, umi pa’i koty oma’ẽva nórte gotýo, upépe ahecha oĩha peteĩ koty huguápe kuarahyreikeha gotýo,

20ha ha’e he’i chéve: Upépe umi pa’i ombojyva’erã pe kuave’ẽmby angaipa reheguáva ha pe kuave’ẽmby teko ky’a reheguáva rymba ro’o ha hendive ombojyva’erã hikuái avei pe kuave’ẽmby tembi’u reheguáva, ani hag̃ua oguenohẽ pe korapy oka gotyoguápe, ha tetãyguakuéra oñemboja ramo hendapekuéra oñemboykéma avei ñande Ruetépe g̃uarã.

21Upéi ha’e cheguenohẽ pe korapy oka gotyoveguápe, chereraha hag̃ua umi irundy korapy rugua apýrape (esquínape) ha peteĩteĩ hugua apýrape ahecha peteĩ korapy michĩva.

22Ha pe korapy michĩva ipuku 20,4 métro ha ipykue 15,3 métro, ha irundyve korapy michĩva peteĩcha meme.

23Ha pe korapy jerekuévo oñemopu’ã peteĩ kora’i itaguiguáva, ko kora jerekuévo ojejapo heta tatakua.

24Ha he’i chéve: Ko’ã tatakuápe ningo umi Ñanderuete rogaguasu rembiguái ombojyva’erã hetãyguakuéra kuave’ẽmby.