Ezequiel 33 - Biblia en Guaraní - ?anderuete ?e’? Por? 2015

Pe guárdia

rembiapo

1Ou chéve Ñanderuete ñe’ẽ ha he’i:

2Kuimba’e ra’y, eñe’ẽ ne retã ra’ykuérape, ha ere ichupekuéra: Ág̃a Che agueru vove ñorãirõ peteĩ tetãme, ha umi tetãygua oiporavo ramo peteĩ kuimba’e ijapytégui hetã ñangarekohára (guárdia) ramo,

3ha ha’e ohecha ramo ou hetãme hese ija’e’ỹva ha ombopu ramo turu oavisa hag̃ua hetãyguakuérape,

4ha peteĩ ohendu porã ramojepe ituru pu ha upéi oiko ohendu’ỹ ramoguáicha, ha og̃uahẽvo hese ija’e’ỹva ha ojuka ichupe, huguykue ho’áta iñakã árinte.

5Ha’e voi ohendu porã pe turu pu ha oiko ohendu’ỹva ramoguáicha, upévare huguykue ho’áta hi’ári; ha’e iñe’ẽrendu rire osalvava’erãmo’ã hekove.

6Ha pe tetã ñangarekohára ohecha ramo ou hetãme hese ija’e’ỹva ha nombopúi ramo ituru, ha hetãyguakuéra ndoikuaái ramo, ha ou hetãme hese ija’e’ỹva ojuka peteĩvape, kóa ojejapyhýta hembiapo vai rupi, ha pe tetã ñangarekohára pógui katu ajeruréta upe omanóva ruguy.

7Kuimba’e ra’y, Che romoĩma Israel ñangarekohára (guárdia) ramo ha opaichagua ñe’ẽ rehendúva guive che jurúgui embohasa ichupekuéra.

8Che ha’e ramo ndéve peteĩ heko vaíva omanota ha nde nderéi ichupe opoi hag̃ua heko vaígui, upe heko vaíva omanóta hembiapo vai rehe, huguykue katu Che ajeruréta nde pógui.

9Ha nde ere ramo upe heko vaívape opoi hag̃ua heko vaígui, ha ha’e ndopoíri heko vaígui, ha’e omanóta hembiapo vai rehe, nde katu resalváma nde rekove.

Ezequiel he’i hetãyguakuérape opoi hag̃ua heko vaígui

10Nde katu, kuimba’e ra’y, ere Israelguakuérape: Peẽ peje ramojepe: Ore reko vai ha ore rembiapo vai oĩmba oreári, ha umía rupi roñehundipáta, mba’éicha piko ikatu roikove.

11Ere ichupekuéra: Che rekovére, he’i pende Ruete, ndaipotái pe heko vaíva omano, aipota uvei ojevy hape vaígui, upévare pejevy peikove hag̃ua, pejevy joaite pende rape vaígui; mba’érehe piko pemanose peẽ, Israel retãyguakuéra.

12Ha nde, kuimba’e ra’y, ere ne retãyguakuérape: Peteĩ heko potĩva opoi ramo chehegui ha omano ramo, heko potĩngue ndosalvamo’ãi ichupe, katuete oñehundíta. Peteĩ heko vaíva katu opoi ramo heko vaígui osalváta katuete hekove, oiko vai ramojepe ñepyrũme.

13Ha Che ha’e ramo peteĩ heko potĩvape: Añetehápe reikovéta, ha ha’e ojeroviágui heko potĩ rehénte ha oñepyrũ oiko vai, heko potĩ rehe ndaiporimo’ãvéi mandu’a, omanóta katuete heko vai rupi.

14Ha Che ha’e ramo peteĩ heko vaívape: Añetehápe remanóta; ha ha’e oñembyasy ojapo vai haguére ha opoi ramo hembiapo vaígui, ojapo hag̃ua che rembipota ha che rembiapoukapy he’i háicha,

15ha upe heko vaíva omyengovia ramo pe mba’erepykue omondava’ekue, ha oguata ramo hekoitépe, ndojapovéivo tembiapo vai, katuete oikovéta ha nomanomo’ãi.

16Noñemomandu’amo’ãi ichupe mba’eveichagua tembiapo vai ojapova’ekue rehe; ojapoguihína che rembipota ha che rembiapoukapy he’i háicha, upévare katuete oikovéta.

17Ne retãygua he’i ramo: Ñanderuete rape ndahekoitéi (ndaijústoi); Che katu ha’e Israel rapekuéra ndahekoiteha voi.

18Peteĩ heko potĩva opoi ramo heko potĩgui ha hembiapo vai ramo, upéva katuete omanova’erã.

19Peteĩ heko vaíva katu opoi ramo heko vaígui ha ojapo ramo che ñe’ẽ ha che rembiapoukapy he’i háicha, katuete ha’e ojesalvava’erã.

20Ha peje ramojepe: Ndahekoiteiha Ñanderuete rape, Che voi pombojovakéta, peẽ Israel retã, peteĩteĩvape Che ambojovakéta hembiapo vai rupi.

Jerusalen oñembopoguýma

21Ojehu ningo ore roiko riréma 12 áño, 10 jasy ha 5 ára jepokuapyhápe, ou che rendápe peteĩ okañymava’ekue Jerusaléngui, ha he’i: Jerusalen ho’áma ambue tetã poguýpe.

22Ha pe ka’aru pytũme og̃uahẽ mboyve pe okañyva’ekue, Ñanderuete voi omoĩma ipo cheári ha oipe’a jevýma che juru ha añe’ẽkuaáma. Ambue pyhareve og̃uahẽ pe okañyva’ekue ha uperire nacheñe’ẽnguvéima, (Ezequiel 24,25-27).

23Ha ou chéve Ñanderuete ñe’ẽ, ha he’i:

24Kuimba’e ra’y, umi hembýva Israel retãgui he’i: Abraham ha’eñominteva’ekue, ñande katu ñañemomba’e ko yvy rehe; ñande katu ñandereta; ñandéve oñeme’ẽ ko yvy ñañemomba’e hag̃ua hese,

25upévare ere ichupekuéra, péicha he’i pende Ruete: Pe’u so’o huguykue reheve, pemomba’eguasu ambue jarakuérape, peñohẽ rei pende rapicha ruguy ha upeichavéramo jepe piko peñemomba’ese ko yvy rehe.

26Peiko pende kyse puku reheve, pejapo mba’evaiete, ha pemongy’a joaite pende rapichakuéra rembirekokuérape; ha upeichavéramo jepe piko peñemomba’ese ko yvy kóva rehe;

27upévare eréta ichupekuéra: Péicha he’i pende Ruete, che rekovére, umi oikóva umi taperekuépe ho’apáta kyse pukúpe, ha upe ñu rupi oĩva, ho’okuéra ame’ẽta umi mymba saitépe hi’upyrã ramo; ha umi oĩva cérro ha itakuápe omanóta mba’asy vai rupi.

28Ha pene retãgui ajapóta yvy perõ ha tapere, pende pu’aka oguepáta peẽ peñembotuicha haguére; ha Israel cerrokuéra itaperéta ndaiporivéi peve avave ohasava’erãva upérupi.

29Ág̃a ambotapere vove pene retã ojeikove’ỹ meve ipype, pejapógui heta mba’evaiete, upépe ae peikuaáta Che ha’eha pende Ruete.

30Ha nde, kuimba’e ra’y, ne retãygua ra’ykuéra oñembohory nderehe umi óga tápia ha hokẽnguéra rupi, oñopehẽnguekuéra oñe’ẽ joa oñondive he’ívo: Peju ko’ág̃a ha pehendu mba’eichagua ñe’ẽpa ou jevýma Ñanderuetégui.

31Ha oñombyatýta hikuái ne rendápe ku tetãygua atyguasúicha, ha oguapýta hikuái ne renondépe ku che retãteéicha, ha ohendu porãta ne ñe’ẽ, ág̃a ndojapomo’ãi, ijuruhe’ẽ asy hikuái, ipy’apýpe katu oiko hembipota vai rapykuérinte.

32Eikuaa porãke, ha’ekuéra nderereko ku mborayhúpe opurahéiva ramo ha rembopu porã ramojepe ha’ekuéra nerendu porãta, ndojapomo’ãi katu ne ñe’ẽ.

33Ha ojehupa rire nde ereva’ekue oikuaáta hikuái oĩ hague peteĩ proféta ijapytepekuéra.