Salmokuéra 32 - Biblia en Guaraní - ?anderuete ?e’? Por? 2015

Ñanderuete jehovasa ohupity opavave umi oñemombe’úvape - David purahéi

1Ovy’aite upe oñemopotĩmava’ekue ijejavýgui ha hembiapo vaikuégui.

2Ovy’aite upe kuimba’e Ñanderuete nombojáiva hese ijejavy ha ipy’apýpe ndaipóriva japu.

3Che akirirĩ aja, ikangypa che rete, che py’apy ñe’ẽ osapukái hatãgui.

4Arakue ha pyharekue katu nde po pohýi oĩ cheári, che pu’aka opamive ohóvo ku kuarahy aku guýpe ojehu háicha. Selah

5Upémaramo amombe’u ndéve che rembiapo vai, ha nañomíri ndehegui che ñaña reko ha ha’e: Amombe’upáta che angaipakuéra Ñanderuetépe, ha Nde reperdona che rembiapo vaikuerakuégui, Selah

6Ko’ã mba’e ko’ãva rupi opaite heko potĩva ojerure ndéve Nde reheja hag̃ua ndejohu, ha añetehápe yeta og̃uahẽ ramo jepe ijypýpe ndohupitymo’ãi ichupekuéra.

7Nde ningo che mo’ãha, ha Nde reñangareko porã cherehe mba’evaígui; purahéi vy’a reheguávape Nde chembojere. Selah

8Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.

9Aníke reikótei ku kavaju térã pe mburika naiñapytu’ũivaicha. Umívape oñemboguata porãhína oñemoĩ jave peteĩ fréno ijurúpe, upeicha’ỹro ndaikatúi ojeporu porã.

10Umi iñañáva ohasa asýta, umi ojeroviáva Ñanderuete rehe katu oñandúta Ñanderuete poriahuvereko.

11Pevy’aitéke ha penderoryetéke Ñanderuete ndive peẽ, heko potĩva, ha pepurahéike vy’apópe py’a potĩ reheve.